جاس ارحيۆشىلەر جارىستى

ەلىمىزدىڭ جاس ارحيۆشىلەر بايقاۋى وسىمەن ءتورتىنشى مارتە ۇيىمداستىرىلىپ وتىر. بۇل شارانىڭ باستى ماقساتى – جاس مامانداردىڭ كاسىبي بىلىكتىلىگىن ارتتىرۋ، ارحيۆ قۇجاتتارىنىڭ قۇندىلىعىن دارىپتەۋ، «رۋحاني جاڭعىرۋ» باعدارلاماسى اياسىندا ارحيۆ سالاسىنىڭ ءرولىن، ءارحيۆشى ماماندىعىنىڭ مارتەبەسىن كوتەرۋ جانە جاستار اراسىندا ارحيۆ سالاسىنىڭ ماڭىزدىلىعىن ءتۇسىندىرۋ ەكەن. ورال قالاسىندا ۇيىمداستىرىلعان ونلاين-بايقاۋعا قازىلار القاسى قاتارىندا قاتىسىپ، جاس ارحيۆشىلەردىڭ تارتىستى سايىسىنا كۋا بولدىق.

ايتا كەتەيىك، پاندەميا سالدارىنان العاش رەت ونلاين فورماتىندا وتكەن بۇل بايقاۋدى باتىس قازاقستان وبلىسىنىڭ مەملەكەتتىك ءارحيۆى مەن قازاقستان رەسپۋبليكاسى پرەزيدەنتى ءارحيۆى بىرلەسە ۇيىمداستىردى. باتىس قازاقستان وبلىسى اكىمدىگى ەرەكشە  قولداۋ كورسەتتى. بايقاۋدىڭ اشىلۋ سالتاناتىنا باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ قاتىسىپ، قۇتتىقتاۋ ءسوز سويلەدى. سونداي-اق ورال قالاسىنا قازاقستان رەسپۋبليكاسى مادەنيەت جانە سپورت مينيستىرلىگى ارحيۆ ىستەرى جانە قۇجاتتامانى باسقارۋ كوميتەتى توراعاسىنىڭ ورىنباسارى باعدات تانىسبەكوۆ پەن قازاقستان رەسپۋبليكاسى پرەزيدەنتى ءارحيۆىنىڭ ديرەكتورى ءجاميلا ابدىقادىروۆا ارنايى كەلدى.

تارتىستى باسەكەگە الماتى قالاسى مەملەكەتتىك ءارحيۆىنىڭ «ۆەرنىي» كومانداسى، اقتوبە وبلىسى مەملەكەتتىك ءارحيۆىنىڭ «امانات» كومانداسى، اتىراۋ وبلىسى مەملەكەتتىك ءارحيۆىنىڭ «مۇنايلى استانا» كومانداسى، جامبىل وبلىسىنىڭ مەملەكەتتىك ءارحيۆىنىڭ «تاراز عيبراتى» كومانداسى، جەزقازعان قالاسى مەملەكەتتىك ءارحيۆىنىڭ «تاۋەلسىزدىك تۇمارى» كومانداسى، سولتۇستىك قازاقستان وبلىسى مەملەكەتتىك ءارحيۆىنىڭ «قىزىلجار قىراندارى» كومانداسى، قازاقستان رەسپۋبليكاسى پرەزيدەنتى ءارحيۆىنىڭ «قىران» كومانداسى قاتىستى.

بايقاۋ ونلاين فورماتتا وتكەندىكتەن، نەگىزگى كۇش تەحنيكالىق مۇمكىندىكتەرگە، كرەاتيۆتى يدەيالارعا ءتۇستى. كونكۋرس شارتىنداعى «كوماندانىڭ ءوزىن تانىستىرۋى»، «تاۋەلسىزدىك جىلدارىنداعى مەنىڭ ءارحيۆىمنىڭ جەتىستىكتەرى» تۋرى، «تاۋەلسىزدىك - ماڭگىلىك ەلدىڭ تۇعىرى» اتتى شىعارماشىلىق تۋر وتە قىزىقتى بولدى. ءار كوماندا دايىنداعان بەينەروليكتەر كوركەمدىك دارەجەسى جوعارى شىعارما دارەجەسىنە جەتىپ جاتتى. مىسالى، «قىزىلجار قىراندارى» توبىنىڭ پاتريوتتىق رۋحى، «ۆەرنىي» كومانداسىنىڭ جاڭاشىلدىعى، «تاراز عيبراتى» توبىنىڭ داستۇرشىلدىگى ۇنادى. «امانات» توبى ءاليا مولداعۇلوۆا حاقىندا كوركەمدىك ەلەمەنتتەرى مول بەينەفيلم جاساعان ەكەن. ال جەزقازعاندىق «تاۋەلسىزدىك تۇمارى» كومانداسى بارلىق تۋردا دا ەرەكشە دايىندىعىمەن، شىعارماشىل تاپقىرلىقتارىمەن كوزگە ءتۇستى. وبلىس ورتالىعى ەمەس، اۋداندىق دەڭگەيدەگى ۇجىمنىڭ اتىشۋلى ارىپتەستەرىنەن ەش قالىسپاي ونەر كورسەتكەنىنە جيۋري مۇشەلەرى ريزا بولىپ قول سوقتى.

رەسپۋبليكالىق جاس ارحيۆشىلەر بايقاۋىنىڭ 2-تۋرى تەست سىناعى ەدى. بۇل تۋردا قاتىسۋشىلارعا قازاقستان رەسپۋبليكاسىنداعى ارحيۆ سالاسىنا قاتىستى زاڭنامالار، ارحيۆ مەكەمەلەرى جۇمىسىنىڭ نورماتيۆتەرى مەن رەگلامەنتى بويىنشا 30 تەست سۇراعى بەرىلدى. كوماندالار 20 مينۋت ىشىندە بەرگەن جاۋاپ ناتيجەلەرىنە قاراي باعالاندى. بۇل ساتىدا 30 ساۋالدىڭ 24-نە دۇرىس جاۋاپ بەرگەن «قىران» كومانداسى توپ باستادى. الدىن الا دايىندالىپ، تاسپاعا تۇسىرىلگەن وزگە تۋرلارعا قاراعاندا، بۇل سايىس شىنايى سىناق بولعانى انىق. ناتيجەسىندە IV بايقاۋدىڭ باس جۇلدەگەرىن دە انىقتاۋعا وسى سەپ بولدى.

سونىمەن، ءىV رەسپۋبليكالىق جاس ارحيۆشىلەر بايقاۋىنىڭ باس جۇلدەسىن قازاقستان رەسپۋبليكاسى پرەزيدەنتى ءارحيۆىنىڭ «قىران» كومانداسى جەڭىپ الدى. شىنى كەرەك، ەلىمىز بويىنشا الدىڭعى قاتارلى مۇراعات ۇجىمىنىڭ بۇل جەتىستىگى زاڭدى دا. رەسپۋبليكاداعى ارحيۆ قىزمەتىنىڭ كوشباسشى تۋىن ۇستاعان ۇجىمدا لايىقتى ءىزباسار جاستار ءوسىپ كەلەدى ەكەن.

- بۇگىنگى بايقاۋدىڭ ءى ورىن جۇلدەسىنە جەزقازعان قالاسى مەملەكەتتىك ءارحيۆىنىڭ «تاۋەلسىزدىك تۇمارى» كومانداسىن لايىق دەپ تاپتىق. بايقاۋدىڭ باعالى سىيلىعى، التىن مەدالى مەن سەرتيفيكاتى كيەلى ۇلىتاۋ وڭىرىنە جولدانادى. سونىمەن بىرگە، 2023 جىلى وتەتىن V رەسپۋبليكالىق جاس ارحيۆشىلەر بايقاۋىن وتكىزۋ قۇرمەتتى مارتەبەسى دە قاراعاندى وبلىسىنا بەرىلەدى، - دەپ جاريالادى قازاقستان رەسپۋبليكاسى مادەنيەت جانە سپورت مينيستىرلىگى ارحيۆ ىستەرى جانە قۇجاتتامانى باسقارۋ كوميتەتى توراعاسىنىڭ ورىنباسارى باعدات تانىسبەكوۆ.

ورالدا وتكەن بايقاۋدىڭ ەكىنشى-ءۇشىنشى جۇلدەلەرىن «تاراز عيبراتى» مەن «ۆەرنىي» كوماندالارى ءبولىستى. ولاردىڭ ءبارى بايقاۋدىڭ باعالى سىيلىقتارىمەن ماراپاتتالدى. ال سولتۇستىك قازاقستان، اتىراۋ، اقتوبە وبلىسى كوماندالارى العىس حاتقا يە بولدى.

ارينە، وتكەنى جوق ەل، تاريحى جوق حالىق بولمايدى. تاريح قويناۋىنا تەرەڭدەپ ەنگەن ءاربىر عاسىردىڭ، ءاربىر كەزەڭنىڭ ايتۋلى وقيعالارى، جىلناماسى ارحيۆ قورلارىندا جاتىر. حالىقتىڭ قۇجاتتىق جادىن وسكەلەڭ ۇرپاق ءۇشىن ساقتاپ وتىرعان قازاقستان ارحيۆتەرىنىڭ ءرولى وتە زور. ەلىمىزدە ءار جىلدارى قولعا الىنعان «مادەني مۇرا»، «رۋحاني جاڭعىرۋ»، «ارحيۆ-2025» باعدارلامالارى، ەلباسىنىڭ « ۇلى دالانىڭ جەتى قىرى»، پرەزيدەنتىمىزدىڭ «تاۋەلسىزدىك بارىنەن قىمبات» ماقالالارىندا ايتىلعان مىندەتتەر، ءتىپتى ءدال قازىر قولعا الىنعان رەپرەسسيا قۇرباندارىن تولىق اقتاۋ بويىنشا قۇرىلعان كوميسسيالار قىزمەتى دە ءارحيۆسىز ەش جۇزەگە اسپاس ەدى. ارحيۆ ۇجىمدارى دا قۇجاتتاردى ساندىق جەتكىزگىشتەرگە اۋدارىپ، عىلىمي-انىقتامالىق اپپارات پەن ارحيۆ قورلارىنىڭ اۆتوماتتاندىرىلعان دەرەكقورىن قۇرىپ، مەملەكەتتىك ورگانداردا «ەلەكتروندى قۇجاتتار قويماسى» سەرۆيستىك باعدارلامالىق ءونىمى ەنگىزىلىپ، زامان تالابىنا ساي دامىپ كەلەدى. ارحيۆ سالاسى قىزمەتكەرلەرىنىڭ جالاقىسى دا كوتەرىلىپ، مۇراعاتشى دەگەن مارتەبەلى ماماندىققا اينالدى. ورالدىق ارداگەر ۆياچەسلاۆ ينوچكيننىڭ ايتۋىنشا، وسىدان وتىز جىل بۇرىنعى ارحيۆ پەن قازىرگى مۇراعاتتاردىڭ اراسى جەر مەن كوكتەي، سالىستىرۋعا كەلمەيدى. بۇل ءۇردىس توقتاماۋى ءتيىس، ءاردايىم العا دامۋى كەرەك. سوندىقتان دا ەلىمىزدە ەكى جىل سايىن ءداستۇرلى تۇردە ءوتىپ كەلە جاتقان جاس ارحيۆشىلەر بايقاۋى جاڭا بۋىن ماماندارعا ەرەكشە ستيمۋل بەرەرى انىق.