«نەگىزگى باعىتتار – سىبايلاس جەمقورلىق تاۋەكەلدەرىن انىقتاۋ جانە جويۋ, سىبايلاس جەمقورلىققا قارسى مادەنيەتتى نىعايتۋ, كۆازيمەملەكەتتىك سەكتوردا كومپلايەنس قىزمەتىن كۇشەيتۋ. مەملەكەتتىك ورگانداردىڭ مىندەتى – ولاردى قالالار مەن اۋىلداردى قوسا العاندا, بارلىق دەڭگەيلەردە ءتيىمدى ىسكە اسىرۋ. ول ءۇشىن ءاربىر مەملەكەتتىك ورگاندا جوبالىق وفيستەر قۇرىلعان, ولار ارقىلى قوعامدى تارتا وتىرىپ, «ادالدىق الاڭى» قىزمەتى جالعاساتىن بولادى. بۇل جەردە ەڭ باستىسى – ارىپتەستىك, اشىقتىق قاعيداتتارىندا جانە شەكتەن تىس بيۋروكراتياسىز ءوزارا ءىس-قيمىل. وسىلايشا, نەگىزگى سىبايلاس جەمقورلىققا قارسى باعىتتار ارقىلى مينيسترلىكتەر مەن اكىمدىكتەردىڭ جۇمىسىن ۇيلەستىرىپ, مەملەكەتتىڭ سىبايلاس جەمقورلىققا قارسى ساياساتىن جۇرگىزەتىن بولامىز. ءبىز بارلىعىمىز ءۇشىن ماقساتتى ينديكاتورلاردى ازىرلەدىك. وڭىرلەردە ولارعا وسى ۆەدومستۆولاردا ارنايى تاعايىندالعان قىزمەتكەرلەر قول جەتكىزەتىن بولادى. ولار سىبايلاس جەمقورلىققا قارسى كوميسسارلار دەپ اتالادى. ارينە, ولار قوعام وكىلدەرىمەن ءبىر توپتا جۇمىس ىستەيتىن بولادى», دەپ ءتۇسىندىردى م.احمەتجانوۆ.
سونداي-اق اگەنتتىك باسشىسى باتىس ەلدەرىندە باق-تا سىبايلاس جەمقورلىق فاكتىلەرى تۋرالى ءبىر عانا جاريالانىم ءتيىستى تەكسەرۋلەرگە سەبەپ بولاتىنىن اتاپ ءوتتى. سوندىقتان جۋرناليستىك زەرتتەۋ ينستيتۋتىن ەنگىزۋ, جۋرناليستەردىڭ قۇقىقتارىن قورعاۋدىڭ زاڭنامالىق شەكتەرى مەن كەپىلدىكتەرىن بەلگىلەۋ ۇسىنىلادى.
