«جوبانىڭ جۇزەگە اسىرىلۋى تەڭىز, قاراشىعاناق جانە قاشاعان سىندى الەمدىك ولشەممەن الىپ قاراعاندا ءىرى كەن ورىندارىنا قۋاتتى سەرپىن بەردى. بۇگىندە ولارعا ەلىمىزدە وندىرىلەتىن بارلىق مۇنايدىڭ 60 پايىزى تيەسىلى. كونسورتسيۋم قازاقستان مەن رەسەيدىڭ, سونىمەن قاتار Chevron, Eni, لۋكويل, Shell جانە وزگە دە جەتەكشى مۇناي كومپانيالارىنىڭ قاتىسۋىمەن ءىرى حالىقارالىق مۇناي تاسىمالداۋ جوباسىنا اينالدى», دەدى قاسىم-جومارت توقاەۆ كاسپي قۇبىر كونسورتسيۋمىنىڭ 25 جىلدىعىنا ارنالعان سالتاناتتى جيىندا.
مەملەكەت باسشىسى كونسورتسيۋمعا قاتىسۋشىلاردىڭ اراسىندا ىمىراعا قول جەتكىزۋ ءۇشىن قازاقستان جانە رەسەي باسشىلىعىنىڭ ۇلكەن كۇش-جىگەرى جۇمسالعان ۇزاقجىلدىق كەلىسسوز ءالى ەسىندە ەكەندىگىن اتاپ ءوتتى.
«تۇڭعىش پرەزيدەنت نۇرسۇلتان نازارباەۆ ۇسىنعان سەرىكتەستىكتىڭ 10 ءپرينتسيپى كونسورتسيۋمنىڭ تابىستى جۇمىس ىستەۋىنە نەگىز قالادى. بۇل جوبا مەن ءۇشىن دە ەرەكشە مانگە يە. ويتكەنى, ونىڭ قۇرىلىسىنىڭ باستالۋىنا جانە ىسكە قوسىلۋىنا ارنايى قاتىسقان ەدىم. ۆاگيت الەكپەروۆ تە قاتىستى. تاياۋدا ول ماعان فوتوگرافيا تابىس ەتتى. ول كەزدە ءبىز ءسال باسقاشا, مۇمكىن مۇنان دا ناشارلاۋ ەدىك. قالاي دەسەك تە, اتالعان جوبانى ىسكە قوسۋ شاراسىنىڭ قالاي وتكەنى ەسىمىزدە», دەدى قر پرەزيدەنتى.
