«جىل سايىن حالىق سانى ارتۋدا. تيىسىنشە سۋ تۇتىنۋ كولەمى دە ۇلعايدى. حالىقتىڭ كوشى-قونىنا بايلانىستى بۇگىنگى كۇنى 50 اۋىلدا سۋ قۇبىرى جەلىلەرىن كەڭەيتۋ قاجەت. بۇل اقمولا, الماتى, شقو, بقو, جامبىل, قوستاناي, ماڭعىستاۋ, تۇركىستان وبلىستارى. مىسالى, اقمولا وبلىسىنىڭ قاراوتكەل اۋىلىندا قازىر 18 مىڭعا جۋىق ادام تۇرادى. ال 2018 جىلى سالىنعان سۋ قۇبىرلارى 8 مىڭ ادامعا عانا ارنالعان», دەدى بەيبىت اتامقۇلوۆ ۇكىمەتتىڭ بۇگىنگى وتىرىسىندا.
ءمينيستردىڭ ايتۋىنشا, مۇنداي اۋىلدارداعى سۋ قۇبىرى جەلىسىن كەڭەيتۋ ءۇشىن بيۋدجەتتەن 40 ملرد تەڭگە ءبولۋ قاجەت.
«اكىمدىكتەر بۇل اۋىلدار ءۇشىن جوبالاۋ-سمەتا قۇجاتتاماسىن تەز ارادا ازىرلەۋى قاجەت», دەدى ب.اتامقۇلوۆ.
بۇعان دەيىن ب.اتامقۇلوۆ سۋمەن قامتاماسىز ەتۋ دەڭگەيىن ارتىرۋ ءۇشىن كورسەتكىشتەرى تومەن وڭىرلەرگە باسىم نەگىزدە قاراجات بولىنەتىنىن ايتتى.
