پرەزيدەنت قاسىم-جومارت توقاەۆتىڭ تاپسىرماسىمەن شىعىس قازاقستانداعى كۇرشىم مەن كوكپەكتى اۋداندارىن جالعايتىن «قىزىل تۋ» وتكەلىنە كوپىر سالىناتىنى بەلگىلى. بۇگىندە كوپىر قۇرىلىسى قارقىندى جۇرگىزىلۋدە.
«اينالما جول سالۋ, گەودەزيالىق جانە ەلەكتر جەلىلەرىن تارتۋ بويىنشا جۇمىستار اياقتالدى. ەندىگى كەزەكتە نەگىزگى كوپىردى سالۋعا قاجەتتى ۋاقىتشا كوپىردىڭ قۇرىلىسى جۇرگىزىلىپ جاتىر. سول جەردە ۆاحتالىق ادىسپەن 50 ادام جۇمىس ىستەۋدە. جۇمىسشىلار ءۇشىن 250 ورىندىق جاتاقحانا قالاشىعى سالىنعان. قۇرىلىسقا قاجەتتى ماتەريالدار جەتكىلىكتى», دەدى كۇرشىم اۋداندىق ىشكى ساياسات, مادەنيەت, تىلدەردى دامىتۋ جانە سپورت ءبولىمىنىڭ باسشىسى ا.قاسىمباەۆا.
بۇگىندە سۋداعى 92 مەتر جەرگە ديامەترى 1000 جانە 1450 سم بولاتىن ارنايى تەمىر تىرەۋلەر قاعىلىپ, ءۇستى بەتون كونسترۋكتسيامەن جابىلعان. جەلتوقسان ايىنان باستاپ نەگىزگى كوپىردىڭ تىرەۋلەرى قويىلا باستايدى.
ايتا كەتەيىك, بۇل قازاقستان بويىنشا ەڭ ۇزىن كوپىر بولماق. جوبا بويىنشا ونىڭ ۇزىندىعى 1,3 شاقىرىمنان اسادى.
