كارتينا ابايدىڭ شىعارماشىلىعىنا تىكەلەي بايلانىستى بولماسا دا, ونىڭ ومىرىنە, وتباسىنا قاتىستى درامالىق كورىنىستى بەينەلەيدى. ابايدىڭ 15 جاسىندا اتا سالتىمەن ايتتىرىلىپ كەلگەن ءدىلدا بايبىشە مەن ارادا 15 جىل وتكەن سوڭ اقىننىڭ ءوزى ءسۇيىپ العان جارى ايگەرىم بەينەسى ارقىلى وتباسىلىق درامانى كورسەتكەن.
ءبىرىنشى سۋرەتتە اتاقتى الشىنبايدىڭ قىزى, تەكتى دە تەگەۋرىندى ءدىلدا قىزىل تازىنى – «قىزعانىشتىڭ قىزىل ءيتىن» تەجەپ ۇستاپ, ايگەرىمنىڭ وتاۋىنا – توقالدىڭ قۇتتى شاڭىراعىنا كوزىنىڭ الاسىمەن قاراپ تۇر. تازىنىڭ قارعىسى – قاقتاعان كۇمىس بولعانىمەن, اۋزىنداعى تۇمىلدىرىق – قىزعانىشتىڭ زالالسىزدىعىن, وزگەگە زيانى تيمەيتىنىن بايقاتقانداي. ال ەكىنشى كارتينادا ءازيز جاندى ايگەرىم قولىن قۋسىرىڭقىراي ۇستاپ, ءجۇزىن تومەن سالعان. كۇناسىز بولسا دا كىنالى بەينە سىندى.
كومپوزيتسيادا اباي بەينەسى كورىنبەسە دە قاتىسىپ تۇر: وسى ديپتيح ارقىلى ۇلى ويشىلدىڭ پاراساتى مەن ماحابباتى, ءداستۇر مەن جۇرەك قالاۋى قاتار كورىنەدى. سونىمەن بىرگە ايەل زاتىنىڭ جۇمباق جان-دۇنيەسى, قىزعانىش سەزىمى بەينەلەنگەن. ول سەزىم العاشقى كارتيناداعى قىزىل تازى مەن ءدىلدانىڭ قامزول استىنان كيگەن قىزىل كەۋدەشەسى بولىپ كورىنسە, ەكىنشى سۋرەتتەگى ايگەرىمنىڭ قىزىل تىستى بورىگى مەن باستان-اياق قىزىل كويلەگى ارقىلى كورىنىس تاپقان.
مىنە, ءبىر قاراعاندا ءبىر-بىرىنە قاراما-قارسى بەينەلەر ۇلى اباي وبرازى ارقىلى بۇتىندەلىپ, ءبىر شەڭبەرگە سىيىپ تۇر. كارتينانىڭ بۇعان دەيىن اباي قۇنانباي ۇلى تاقىرىبىنا سالىنعان وزگە شىعارمالاردان ەرەكشەلىگى دە وسىندا.
باتىس قازاقستان وبلىسى
