«ارسەلورميتتال تەمىرتاۋ» بارلىق شاحتالارىنىڭ قىزمەتكەرلەرى «ارسەلورميتتال تەمىرتاۋ» كومپانياسى باسشىلىعىنىڭ الدىنا ءوز تالاپتارىن قويىپ وتىر.
وسىعان بايلانىستى كەنشىلەردىڭ ماسەلەلەرىن قاراۋ ءۇشىن كەلىسىم كوميسسياسى قۇرىلدى. كوميسسيا قۇرامىنا كومپانيا باسشىلىعى, مەملەكەتتىك ورگانداردىڭ, كاسىپوداقتاردىڭ جانە ءار شاحتانىڭ باستاماشىل جۇمىسشىلار توبىنىڭ وكىلدەرى كىردى.
«قازىر ەڭبەك ۇجىمدارىن تولعاندىراتىن بىرقاتار پروبلەمالار ءبىرىنشى ورىنعا شىقتى. ءبىز باستاماشىل توپپەن بىرگە كومپانيا باسشىلىعىمەن تالقىلاعىمىز كەلەتىن ماسەلەلەر ءتىزىمىن قۇردىق», دەدى «قورعاۋ» كومىرشىلەر كاسىپوداعىنىڭ توراعاسى ەۆگەني بۋسلاەۆ.
ول 12 تارماقتان تۇراتىن سۇراقتار ءتىزىمىن اتاپ ءوتتى. ولاردىڭ اراسىندا ەڭبەكاقىنى كوتەرۋ, قاۋىپسىزدىكتى قامتاماسىز ەتۋ, شاحتالاردى ماتەريالدىق-تەحنيكالىق جابدىقتاۋ بار.
ء«بىز «ارسەلورميتتال تەمىرتاۋ» قىزمەتكەرلەرىنىڭ ەڭبەك جاعدايلارى مەن ءومىر ءسۇرۋ ساپاسىن جاقسارتۋ بويىنشا ماڭىزدى ءادىل شەشىمدەر قابىلداۋىمىز كەرەك. ءبىز ءبارىمىز كاسىپورىندارىمىزدىڭ تۇراقتى جانە قاۋىپسىز جۇمىس ىستەگەنىن قالايمىز. ەڭ الدىمەن قىزمەتكەرلەردىڭ مۇددەلەرى ەسكەرىلۋى ءتيىس», دەپ اتاپ ءوتتى جەڭىس قاسىمبەك.
ەسكە سالا كەتەيىك, 7 قاراشادا «اباي» شاحتاسىندا كەنەتتەن مەتان تاراپ, ناتيجەسىندە 6 كەنشى قازا تاۋىپ, ەكەۋى زارداپ شەككەن بولاتىن.
