جەرگىلىكتى بيلىك بەيبىت جيىندار الدىن الا ەسكەرتىلگەننەن كەيىن ءوتۋى كەرەك ەكەنىن ءتۇسىندىردى.
بقو جانە قالا اكىمدىكتەرى ماڭىنداعى الاڭعا 50-گە جۋىق ادام جينالعان. حالىقپەن كەزدەسۋگە بقو جانە ورال قالالارى اكىمدىگىنە قاراستى باسقارما مەن ىشكى ساياسات ءبولىمى وكىلدەرى شىقتى. جۇرگىزۋشىلەرگە بەيبىت جيىنداردى وتكىزۋ ءتارتىبى ءتۇسىندىرىلدى. كەيىن جۇرتشىلىق ورال قالاسى اكىمدىگىنىڭ ۇلكەن زالىنا شاقىرىلدى.
ءتارتىپ ساقشىلارى مالىمەتىنشە, جول-كولىك وقيعالارىنىڭ جارتىسىنا جۋىعىن شەتەلدە تىركەلگەن كولىك جۇرگىزۋشىلەرى جاساعان.
«بيىلعى 10 ايدا شەتەلدە تىركەلگەن كولىك جۇرگىزۋشىلەرى 89 جول-كولىك وقيعاسىن جاساپ, ونىڭ سالدارىنان 32 ادام قازا تاۋىپ, تاعى 122-ءسى جاراقات العان. 1400 جول-كولىك وقيعاسى زالال كەلتىرگەن», دەدى بقو ءىىد جەرگىلىكتى پوليتسيا قىزمەتىنىڭ باسشىسى مەرحات اجەنوۆ.
بۇعان دەيىن قازاقستاندا رەسەيدە تىركەلگەن نەمەسە ەلىمىزدە تىركەلمەگەن كولىكتەردى جاپپاي تەكسەرۋ باستالعانى حابارلانعان ەدى. مۇنداي كولىكتەر سانى 88 مىڭ بولسا, ونىڭ 9 مىڭى بقو-دا. بقو پوليتسەيلەرى تەكسەرۋ باستالعاننان بەرى تۇراققا 39 كولىك الىنعانىن, ونىڭ 21-ءى ايىپپۇل تولەنگەننەن كەيىن يەسىنە قايتارىلعانىن قوستى. بىراق مۇنداي كولىكتەردى پوليتسياعا تىركەۋ كەرەك.
ەسكە سالايىق, قازىر رەسەيلىك تىركەۋدەگى كولىكتەر قۇقىق قورعاۋ ورگاندارىنىڭ ءجىتى باقىلاۋىندا. قازاقستان رەسپۋبليكاسىنىڭ ىشكى ىستەر مينيسترلىگى رەسەي فەدەراتسياسىنان اكەلىنگەن 88 مىڭ اۆتوكولىككە قاتىستى جاعداي رەسەي فەدەراتسياسىنان كولىك ساتىپ العان, بىراق ولارعا قۇقىقتى زاڭداستىرماعان قازاقستاندىقتاردىڭ ارەكەتىنەن تۋىنداعانىن باسا ايتتى.
