ونىڭ ايتۋىنشا, ترانزيتتىك الەۋەتتى ارتتىرۋ ءۇشىن 2022 جىلى تۇركىستان-شىمكەنت-تاشكەنت ۋچاسكەسىندە دوستىق – مويىنتى تەمىرجول جەلىسى, داربازا – ماقتاارال جانە جىلدامدىعى جوعارى تەمىرجول جەلىسىنىڭ جوبالارىن ىسكە اسىرۋ جوسپارلانۋدا.
«كولىك سالاسىندا پاندەمياعا قاراماستان, ءترانزيتتىڭ جالپى كولەمى وسى جىلدىڭ 9 ايىنىڭ قورىتىندىسىندا 17,5 ملن توننانى قۇرادى. بۇل 2020 جىلدىڭ سايكەس كورسەتكىشىنەن 2,4% جوعارى. ازاماتتىق اۆياتسيا پاندەمياعا بايلانىستى ەڭ كوپ زارداپ شەككەن سالالاردىڭ ءبىرى بولدى. بۇل رەتتە بيىل سالانىڭ نەگىزگى ستاتيستيكالىق كورسەتكىشتەرى ءوستى. 2021 جىلدىڭ 9 ايىندا بولجامدى دەرەكتەر بويىنشا تاسىمالدانعان جولاۋشىلار سانى 81%-عا ارتىپ, 6,9 ملن ادامدى قۇرادى. سونداي-اق اۋەجايلاردا قىزمەت كورسەتىلگەن جولاۋشىلار سانى 70%-عا ارتىپ, 12,6 ملن ادامدى قۇرادى. قازىر اپتاسىنا 756 رەيسپەن 57 باعىتتا ىشكى اۋە قاتىناسى تولىق قالپىنا كەلتىرىلدى», دەدى ول.
سونىمەن قاتار مينيستر بيىل اۆتوجول سالاسىن دامىتۋ بويىنشا بەلسەندى جۇمىستار اتقارىلىپ جاتقانىن ءسوز ەتتى.
«جول-قۇرىلىس جۇمىستارىمەن 8,4 مىڭ شاقىرىم قامتىلدى. ونىڭ ىشىندە رەسپۋبليكالىق جەلى بويىنشا 5 مىڭ شاقىرىم, جەرگىلىكتى جولدار مەن كوشەلەردە 3,4 مىڭ شاقىرىم. جىل قورىتىندىسىندا رەسپۋبليكالىق جولداردىڭ 2,2 مىڭ شاقىرىمىندا نەگىزگى جۇمىستاردى اياقتاۋ جوسپارلانىپ وتىر. قۇرىلىس سالاسىندا بيىل ەلىمىزدە 17 ملن شارشى مەتر تۇرعىن ءۇي سالۋ كوزدەلگەن. وتكەن 9 ايدا جالپى اۋدانى 10,3 ملن شارشى مەتر بولاتىن 89 مىڭ باسپانا پايدالانۋعا بەرىلدى», دەدى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ.
