اسىرەسە, باسپانا مۇقتاجدىعىن تارتىپ جۇرگەن كوپبالالى وتباسىلارعا قاراسىپ, ءۇي ساتىپ الىپ بەرىپ جۇرگەن كاسىپكەرلەردىڭ ىسىنە سۇيسىنەسىڭ. مۇنداي يگىلىكتى باستاما سوڭعى بىرەر جىل كولەمىندە جەتىسۋ جەرىندە جاندانىپ, جالعاسىن تاۋىپ وتىرعانى جانە قۋانىش. دەرەك بويىنشا, سوڭعى ەكى جىل ىشىندە عانا الماتى وبلىسىنىڭ جەكە كاسىپكەرلەرى ءوز قارجىسىنا ەكى جۇزگە جۋىق باسپانا ساتىپ الىپ, ءۇيسىز جۇرگەن وتباسىلارعا تەگىن سىيلاعان بولاتىن.
كۇنى كەشە وسى قايىرىمدىلىق كەرۋەنى پانفيلوۆ اۋدانىندا جالعاستى. اۋداندىق ءماسليحات دەپۋتاتى, «ەرنار» شارۋا قوجالىعىنىڭ باسشىسى, مەتسەنات ولجاس جاپپارقۇل بىردەن ءتورت وتباسىنا باسپانا كىلتىن تاپسىردى. ايتپاقشى, «اۋىل» پارتياسىنىڭ اتىنان اۋداندىق ءماسليحات دەپۋتاتى بولىپ سايلانعان مەتسەنات بۇعان دەيىن دە الەۋمەتتىك جاعدايى تومەن وتباسىلارىنا قولۇشىن سوزىپ كەلگەن ەكەن. ونىڭ ىشىندە باسپاناعا مۇقتاج 6 اۋلەت قايىرىمدى جاننىڭ قولىنان جەكە ءۇيدىڭ كىلتىن الىپتى. ياعني اۋىلدان شىققان كاسىپكەر وسىمەن 10 وتباسىنىڭ باسپانا ماسەلەسىن ءبىر ءوزى شەشكەن.
– «اۋىل» حالىقتىق-دەموكراتيالىق پاتريوتتىق پارتياسى ەل تاۋەلسىزدىگىنىڭ 30 جىلدىعىنا وراي «30 يگى ءىس» اكتسياسىن باستاعان بولاتىن. وسىنىڭ اياسىندا پارتيالىق تىزىممەن سايلانعان دەپۋتاتتار جەرگىلىكتى جەردە قايىرىمدىلىق شارالارىن قولعا الۋدا. بۇگىن ارىپتەسىمىز, پانفيلوۆ اۋداندىق ءماسليحاتىنىڭ دەپۋتاتى ولجاس جاپارقۇلدىڭ باسپاناعا مۇقتاج ادامدارعا تۇرعىن ءۇي كىلتىن تابىستاۋ سالتاناتىنا كۋا بولدىق. سونىمەن قاتار ءبىز پارتيالاس سەرىگىمىز باسقاراتىن «ەرنار» شارۋا قوجالىعىنىڭ تىنىس-تىرشىلىگىمەن تانىستىق. جالپى, «اۋىل» پارتياسى وڭىردەگى شارۋاشىلىقتاردا جۇمىس ىستەيتىن تۇرعىندارمەن كەزدەسىپ, اۋىلدىڭ الەۋمەتتىك پروبلەماسىن زەردەلەپ, تۇرعىنداردىڭ مۇڭ-مۇقتاجىن تىڭداۋدى ماقسات ەتىپ وتىرمىز. سول ارقىلى اگروونەركاسىپ كەشەنىن دامىتۋ بويىنشا ۇسىنىستار ازىرلەيتىن بولامىز, – دەيدى «اۋىل» حالىقتىق-دەموكراتيالىق پاتريوتتىق پارتياسىنىڭ حاتشىسى اناس باققوجاەۆ.
جالپى, كاسىپكەر ولجاس جاپارقۇل اۋىل تۇرعىندارىنىڭ قامسىز تىرلىك كەشۋى ءۇشىن قولىنان ءىس كەلەتىن ازاماتتار ايانباۋى كەرەك دەپ سانايدى. سول سەبەپتەن دە ول رەتىن تاۋىپ, قايىرىمدىلىق شاراسىن وتكىزۋدى جيىلەتۋگە تىرىسادى ەكەن. وسىعان دەيىن 6 وتباسىنا باسپانا سىيلاعانىن ايتتىق. ولاردىڭ دەنى مەتسەناتتىڭ «ەرنار» شارۋا قوجالىعىندا ەڭبەك ەتەدى. ال كاسىپكەر ساتىپ الىپ بەرگەن باسپانالار اۋىلداعى ەڭسەلى ۇيلەردىڭ قاتارىنان كورىنەدى. مىسالى, كەشە كىلتىن تاپسىرعان ءبىر ءۇيدىڭ 5 بولمەسى بار, جالپى اۋماعى 114 شارشى مەتر شاماسىندا. وعان قوسا ءۇيدىڭ ءىشىن تۇرمىسقا قاجەتتى جيھازبەن جابدىقتاپ, ءۇي ماڭىنداعى جەر ءتىلىمىن دە جاڭا قوجايىننىڭ اتىنا راسىمدەپ بەرىپتى. قازىرگى كۇنى شارۋا قوجالىعىندا 126 ادام جۇمىس ىستەپ, ناپاقاسىن تاۋىپ ءجۇر. ەگىن ەگىپ, مال ءوسىرىپ وتىرعان قوجالىقتىڭ تابىسى جىلدان-جىلعا ارتىپ كەلەدى.
– ءبىزدىڭ «اۋىل» پارتياسى ەل تاۋەلسىزدىگىنىڭ 30 جىلدىعىنا وراي «30 يگى ءىس» شاراسىن قولعا العان بولاتىن. سول ايتۋلى اكتسيانىڭ پانفيلوۆ اۋدانىنان باستالعانىن جاقسى ىرىمعا جورىپ تۇرمىز. بۇل جولى ءبىزدىڭ قوجالىقتىڭ جۇمىسشىلارىنا تۇرعىن ءۇي سىيلادىق. ولاردىڭ 5-6 بالاسى بار, باسپاناسىز جۇرگەن ەدى. قۋانىپ جاتىر. جالپى, مەن ادال ەڭبەك ەتىپ جۇرگەن ازاماتتاردىڭ مۇقتاجدىعىن قولدان كەلگەنشە شەشىپ بەرۋگە تىرىسامىن. مۇنان كەيىن ادامنىڭ مەرەيى تاسىپ, ەڭبەگى ونەتىن بولادى. بۇگىن كوپپەن بىرگە 4 ءۇيدىڭ كىلتىن تاپسىردىق. مۇنداي يگى ءىس ءالى دە جالعاسىن تابادى, – دەيدى پانفيلوۆ اۋداندىق ءماسليحاتىنىڭ دەپۋتاتى, «ەرنار» شارۋا قوجالىعىنىڭ باسشىسى, مەتسەنات ولجاس جاپارقۇل.
الماتى وبلىسى
