وبلىستىق پوليتسيا دەپارتامەنتى ءباسپاسوز قىزمەتىنەن ءمالىم ەتكەندەي, 29 جانە 23 جاستاعى ەكى كۇدىكتى بۇرىن سوتتى بولعان.
«الدىن الا ءسوز بايلاسقان ەكى كۇدىكتى 13 قازاندا ساعات 15:00 شاماسىندا «وركەن» شاعىن اۋدانىنداعى ۇيلەردىڭ بىرىنە سىرتقى پلاستيكالىق تەرەزەسىن ىعىستىرۋ ارقىلى كىرگەن. ءسويتىپ, 1984 جىلعى ايەلدىڭ ىشىگىن, باعالى قول ساعاتىن, سپورتتىق اياق كيىم مەن «سامسۋنگ» ماركالى ۇيالى تەلەفونىن ۇرلاعان», دەدى پوليتسيا دەپارتامەنتىنىڭ ءباسپاسوز قىزمەتىنەن.
ۇرلىق جاساعان كۇدىكتىلەر جابىرلەنۋشىگە 535 مىڭ تەڭگە ماتەريالدىق شىعىن كەلتىرىلگەن.
«ەكى كۇدىكتى 18 قازاندا ساعات 13:30 شاماسىندا «وركەن» شاعىن اۋدانىنداعى تاعى ءبىر ۇيگە پلاستيكالىق تەرەزەدەن كىرىپ, ۇرلىققا تۇسكەن. بۇل جولى 37 جاستاعى ايەلدىڭ ۇيىنەن «سامسۋنگ» ماركالى تەلەديدارىن, يۋتۋب كانالىن جالعاۋعا ارنالعان جابدىقتى, قۇندىز تەرىسىنەن تىگىلگەن ىشىكتى, باعالى كۇرتەشە مەن سمارت-ساعاتتى ۇرلاپ, وقيعا ورنىنان بوي تاسالاعان. جابىرلەنۋشىگە ماتەريالدىق كەلتىرىلگەن شىعىن كولەمى 605 مىڭ تەڭگەنى قۇرادى», دەپ حابارلادى دەپارتامەنتتىڭ ءباسپاسوز قىزمەتى.
پوليتسيا قىزمەتكەرلەرى ۇرلىق دەرەگىمەن ەكى كۇدىكتىنى ۇستادى. ولاردان ايعاق زاتتار تاركىلەنىپ, كۇدىكتىلەر تەرگەۋ يزولياتورىنا قاماۋعا الىندى.
«ەكى كۇدىكتىنىڭ بۇرىن ۇرلىق, توناۋ, قاراقشىلىق قىلمىستارىمەن سوتتى بولعانى بەلگىلى بولدى. قازىر كۇدىكتىلەرگە قاتىستى قر قىلمىستىق كودەكسىنىڭ 188-بابىنىڭ 2 جانە 3-بولىگىمەن قىلمىستىق ءىس قوزعالىپ, سوتقا دەيىنگى تەرگەۋ باستالدى. كۇدىكتىلەردىڭ باسقا قىلمىستارعا قاتىسى انىقتالىپ جاتىر», دەدى ءباسپاسوز قىزمەتى.
