ءۇي جانۋارلارىنىڭ جولعا شىعىپ كەتۋىنەن بولاتىن كولىك وقيعالارىن ەسكەرتۋ جانە جول قوزعالىسى قاۋىپسىزدىگىن قامتاماسىز ەتۋ ماقساتىندا جامبىل وبلىسى پوليتسيا دەپارتامەنتىنىڭ قىزمەتكەرلەرى وبلىستىق جانە رەسپۋبليكالىق ماڭىزى بار جولدارعا جاقىن ورنالاسقان ەلدى مەكەندەردىڭ تۇرعىندارى مەن قوسالقى شارۋاشىلىق يەلەرى اراسىندا الدىن الۋ جۇمىستارىن جۇرگىزۋدە.
جالپى 27 قازاننان باستاپ مال جايۋ ەرەجەلەرىن بۇزۋدىڭ 269 دەرەگى انىقتالدى, 242 ەسكەرتۋ جاسالىپ, 27 اكىمشىلىك ايىپپۇل سالىندى.
«31 قازان-1 قاراشا ارالىعىندا اۋدانداردىڭ جەرگىلىكتى اتقارۋشى ورگاندارىمەن, ونىڭ ىشىندە اكىمدەرمەن, ۆەتەريناريالىق دارىگەرلەرمەن جانە پروكۋراتۋرا قىزمەتكەرلەرىمەن بىرلەسىپ, قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 408-بابىنىڭ 1-بولىگى بويىنشا 44 دەرەك انىقتالدى. اتاپ ايتقاندا, بايزاق اۋدانىندا 5 دەرەك, جۋالى اۋدانىندا – 5, قورداي اۋدانىندا – 3, مەركى اۋدانىندا – 2, مويىنقۇم اۋدانىندا – 5, تۇرار رىسقۇلوۆ اۋدانىندا – 9, سارىسۋ اۋدانىندا – 4, تالاس اۋدانىندا -11 دەرەك. سونىمەن قاتار, ءۇي جانۋارلارىن جارىق شاعىلىستىرعىش ەلەمەنتتەرمەن جابدىقتاۋ قاجەتتىگى تۋرالى, سونداي-اق اۆتوموبيل جولدارىنىڭ جانىندا مال جايۋعا جول بەرمەۋ تۋرالى حالىقپەن كەڭ كولەمدە ءتۇسىندىرۋ جۇمىستارى جۇرگىزىلۋدە», دەپ حابارلادى جامبىل وبلىسىنىڭ پد جپقب باستىعى راحىمبەردى اشكەەۆ.
