جاريالاعان قۇجاتتارى اگەنتتىكتەردىڭ جاڭالىقتارىنا نەگىز بولعان Facebook اشكەرەلەۋشىسى رەتىندە تانىلعان فرەنسيس حاۋگەن وتكەن اپتادا بريتانيانىڭ زاڭ شىعارۋشى ورگانىنا جۇگىنىپ, كومپانيانىڭ بيلىگىن شەكتەۋ بويىنشا جوسپار ۇسىندى. بۇعان دەيىن اتالعان كومپانيادا ونىمدەر جونىندەگى مەنەدجەر قىزمەتىن اتقارعان ف.حاۋگەننىڭ ۇسىنىسى وڭ قابىلداندى.
بىرىككەن كورولدىك – حاۋگەننىڭ العاشقى تۇراعى عانا. ويتكەنى ول بريۋسسەلدە ەۋروپالىق وداقتىڭ وكىلدەرىمەن كەزدەسۋدى جوسپارلاپ وتىر. ودان كەيىن پاريجگە اتتانباق.
Facebook كومپانياسىنا ەۋروپادان تىركەلگەن 450 ملن قولدانۋشى جىلىنا 20 ملرد اقش دوللارى كولەمىندە پايدا تۇسىرەدى. بۇل – كومپانيانىڭ جىلدىق تابىسىنىڭ شيرەگى. ال بۇل ايماق تەحنولوگيالىق كومپانيالارعا قاتىستى قاتال شارالارىمەن تانىمال. بۇعان دەيىن دە كرەمني القابىنىڭ بىرقاتار مەكەمەسىنە مونوپولياعا قارسى زاڭدى بۇزعانى, جەكە اقپاراتتارعا قول سۇققانى ءۇشىن ايىپپۇل سالىپ, جازا قولدانىلعان.
بريۋسسەلدەگى رەسمي تۇلعالار Facebook-ءتى زيان كونتەنتپەن قالاي جۇمىس ىستەيتىنىنە قاتىستى جۇيەلى تۇردە تاۋەلسىز تەكسەرىس وتكىزۋگە ءماجبۇر ەتەتىن جاڭا ەرەجەلەر دايىنداپ جاتىر. ودان بولەك ەرەجەلەر ماتەريالداردى قولدانۋشىلارعا ۇسىنۋعا قاتىستى ەرەكشە قورعالاتىن الگوريتمدەرىن جاريالاۋعا مىندەتتەيدى.
بۇل ەرەجەمەن كەلىسپەگەن جاعدايدا, جاقىندا عانا اتاۋى وزگەرگەن كومپانياعا جىلدىق تابىسىنىڭ 6 پايىزىنا جۋىقتايتىن ونداعان ملرد اقش دوللارى كولەمىندە ايىپپۇل سالىنادى.
بەرلين مەن لوندون دا وسىنداي ەرەجە دايىنداپ جاتىر دەگەن سىبىس بار. كەي باسىلىمدار زاڭ جوبالارى ۇلتتىق پارلامەنتتەردە تالقىلانىپ جاتقانىن جازادى. ساراپشىلار Facebook ەندىگى اقش-پەن ەمەس, ەۋروپامەن قاتىناسىنا الاڭداۋى كەرەك دەگەن وي ايتادى. ويتكەنى ەۋروپالىق ساياساتكەرلەر الەۋمەتتىك جەلىلەردە جاريالاناتىن ماتەريالداردى بىرنەشە جىل زەرتتەپ, وعان قاتىستى جاۋاپكەرشىلىك بولۋ كەرەك دەگەن ويدى بەرىك ۇستانىپ وتىر.
كونتەنت تۋرالى زاڭ قابىلدانار كۇن الىس ەمەس. اقش-تاعى جاعدايعا قاراعاندا ەۋروپالىق وداق پەن بىرىككەن كورولدىك الپاۋىت كومپانياعا جاۋاپكەرشىلىك جۇكتەۋگە اسىق.
مۇنىمەن قوسا ەۋروپالىق وداق تسيفرلى قىزمەتتەر تۋرالى زاڭدى قايتا قاراۋعا بەل بۋعان. اتالعان قادام وداقتىڭ Facebook-كە قاتىناسىنا دا وزگەرىس ەنگىزۋى مۇمكىن. زاڭعا وزگەرىس ەنگىزىلگەننەن كەيىن تەحنولوگيا كومپانيالارى جەككورىنىش پەن ارازدىق تۋعىزاتىن زاڭسىز كونتەنتتى دەرەۋ جويۋعا مىندەتتەلەدى. بۇدان بولەك زاڭدى, بىراق ساياسي تۇرعىدان قاۋىپتى, مىسالى ەلدەگى سايلاۋدىڭ ءادىل وتپەگەنى سياقتى كونتەنت تە جويىلىپ وتىرۋى كەرەك.
ۇلىبريتانيا تاعى جاڭا زاڭ قابىلداماق. بۇل ينتەرنەتتەگى قاۋىپسىزدىككە بايلانىستى. وسىلايشا, بۇل مەملەكەت الەۋمەتتىك جەلىلەر ءوز قولدانۋشىلارىنىڭ قاۋىپسىزدىگىنە جاۋاپتى بولاتىن العاشقى ەلگە اينالماق. جىل سوڭىنا دەيىن قابىلدانۋى جوسپارلانعان زاڭدى بۇزعاندار ۇلكەن كولەمدەگى ايىپپۇل تولەيدى. سونىمەن قاتار كومپانيا باسشىلارى باس بوستاندىعىنان ايرىلۋى مۇمكىن.
ال Facebook-ءتىڭ ءوزى بۇل جاڭالىقتارعا قاتىستى تۇسىنىكتەمە بەرگەن جوق. ازىرگە كومپانيا تەك «رەبرەندينگ» (اتاۋىن وزگەرتۋ) تۋرالى ايتىپ ءجۇر. جىل باسىندا اقش كونگرەسىندە جاۋاپ بەرگەن مارك تسۋكەربەرگ زيان ءارى قاۋىپتى كونتەنتتى جويۋ ءۇشىن كومپانياسىنىڭ ميللياردتاعان دوللار جۇمسايتىنىن ايتتى. دەگەنمەن كوپ ۇزاماي مەكەمە قىزمەتكەرلەرى بۇل تۇرعىدا كوپ جۇمىس ىستەلمەيتىنىن حابارلادى.
بۇل كومپانيانىڭ ۇكىمەتتەرمەن العاشقى جانجالى ەمەس. بۇعان دەيىن Facebook سالىقتان جالتارعانى ءۇشىن دە سىنعا ىلىككەن. Express Tribune مالىمەتىنە سۇيەنسەك, مەكەمە سالىق تولەمەۋ ءۇشىن وففشور كومپانيالارعا جۇگىنگەن دەيدى. ماسەلەن, ميللياردتاعان تابىسىن يرلاندىق جانە گوللانديالىق سحەمالاردى قولدانىپ, كايمان ارالدارىندا تىركەلگەن بانك شوتتارىنا جىبەرىپ وتىرعان. ءبىر قىزىعى, كومپانيا اينالاسىندا قانداي داۋ تۋسا دا جەلى قولدانۋشىلارىنىڭ سانى كۇن ساناپ ارتىپ جاتىر.
