«ەكى جىلدان استام ۋاقىتتان بەرى پوليتسيا جۇرگىزۋشىلىككە ۇمىتكەرلەردەن تەوريالىق جانە پراكتيكالىق ەمتيحانداردى قابىلداۋعا قاتىسپايدى. پوليتسيا قىزمەتكەرلەرى ۆەدومستۆولىق ەسەپكە الۋ بويىنشا جۇرگىزۋشى كۋالىگىن الۋعا ۇمىتكەرلەردى جۇرگىزۋشى كۋالىگىنەن ايىرۋ جانە باسقا دا مالىمەت الۋ تۇرعىسىنان عانا تەكسەرۋدى جۇزەگە اسىرادى», دەدى ءىىم اكىمشىلىك پوليتسيا كوميتەتىنەن.
ۆەدومستۆو مالىمەتىنشە, بۇل جۇرگىزۋشى كۋالىكتەرىن بەرۋ كەزىندە ازاماتتاردىڭ پوليتسيامەن بايلانىسىن ازايتۋ جانە سىبايلاس جەمقورلىق فاكتىلەرىن بولدىرماۋ ءۇشىن جاسالدى. ناتيجەسىندە سوڭعى ءۇش جىلدا پوليتسيا قاتارىندا سىبايلاس جەمقورلىق قىلمىستارىنىڭ سانى 43% تومەندەدى.
«جول ەرەجەسىن بىلمەيتىن جۇرگىزۋشىلەر ازاماتتارعا ايتارلىقتاي قاۋىپ توندىرەدى. سوندىقتان كولىك تىزگىنىنە وتىرعىسى كەلەتىندەر ولارعا جۇكتەلەتىن جاۋاپكەرشىلىكتى سەزىنۋى كەرەك. ازاماتتاردان جولدا ساق بولىپ, جول ەرەجەسىن قاتاڭ ساقتاۋدى سۇرايمىز», دەدى پوليتسيادا.
ەسكە سالايىق, كەشە قر سىبايلاس جەمقورلىققا قارسى ءىس-قيمىل اگەنتىگى قوستاناي جانە اقمولا وبلىستارىندا مامانداندىرىلعان حالىققا قىزمەت كورسەتۋ ورتالىقتارىندا جۇرگىزۋشى كۋالىكتەرى زاڭسىز بەرىلىپ كەلگەنى تۋرالى حابارلادى.
«جۇرگىزۋشى كۋالىگىنەن ءۇمىتتى ازاماتتاردىڭ ورنىنا ەمتيحاندى ارنايى دايىندالعان تۇلعالار تاپسىرىپ وتىرعان. مىسالى, اقمولا وبلىسىندا ارنايى دايىندالعان ادامدار ەمتيحان كومپيۋتەرلەرىنە قاشىقتان قول جەتكىزىپ, بوگدە ازامتتاردىڭ ورنىنا دۇرىس جاۋابىن بەلگىلەپ وتىرعان.
ال قوستاناي وبلىسىندا ارنايى دايىندالعان ادامدار مەديتسينالىق ماسكا مەن باس كيىمنىڭ كومەگىمەن بەت الپەتىن تۇمشالاۋ ارقىلى وزگە ازاماتتاردىڭ ورنىنا كىرىپ كەلگەن. تەرگەۋ بارىسىندا 1 مىڭنان استام جۇرگىزۋشى كۋالىگىن زاڭسىز بەرۋ فاكتىلەرى تەكسەرىلىپ, ەمتيحاننان ءساتتى وتكەنى تۋرالى بەرىلگەن جالعان انىقتامالار قايتارىلدى», دەپ جازىلعان اگەنتتىك مالىمەتىندە.
