قالالىق پوليتسيا باسقارماسى ءباسپاسوز قىزمەتىنىڭ مالىمەتىنە سۇيەنسەك, وقيعا شاھاردىڭ سول جاعالاۋىندا ورنالاسقان تەمىرجول تۇيىعىندا بولعان. «پوليتسياعا قوڭىراۋ شالعان ازامات كومىر كەزەگىندە تۇرعان جۇرگىزۋشىلەردىڭ ءبىرى كولىك جولىن جاۋىپ تاستاپ, ءوزىن-ءوزى ورتەپ جىبەرەتىندىگىن ايتىپ قورقىتقانى تۋرالى جەتكىزدى. سول جەرگە جەتكەن ءتارتىپ ساقشىلارى قولىنا كانيستر ۇستاعان ەر ادامدى كورگەن», دەلىنگەن حابارلامادا.
سوڭىنان انىقتالعانداي, ول – ۇلان اۋدانىنىڭ تۇرعىنى. بىرنەشە كۇن كومىر كەزەگىندە تۇرعان.
«پوليتسەيلەر ەر ادامنان كانيستردى تارتىپ الىپ, سابىرعا شاقىردى. جەرگىلىكتى اتقارۋشى ورگان وكىلدەرى مەن ساتۋشى كومپانيا وعان كومىردى كەزەكسىز بەرۋ جايلى ۇسىنىس جاسادى. كەزەكتە تۇرعان باسقا ازاماتتار بۇعان قارسى بولعان جوق», دەلىنگەن اقپاراتتا.
سونداي-اق جولدى جاۋىپ, باسقا كولىكتەردىڭ جۇرۋىنە كەدەرگى كەلتىرگەنى ءۇشىن ۇلان اۋدانىنىڭ تۇرعىنىنا 10 اەك (1 اەك – 2917 تەڭگە) كولەمىندە ايىپپۇل سالىندى.
