دەرەكتەرگە كوز جۇگىرتسەك, ىندەتتىڭ جايىلىپ كەلە جاتقاندىعىن اڭعارۋعا بولادى. ماسەلەن, وتكەن اپتادا COVID-19 جۇقتىرعان 945 جاعداي تىركەلىپ, ىندەتكە شالدىعۋشىلار سانى 1,03 ەسە وسكەن. ءتيىستى ورىندار ساقتاندىرۋ جولدارىن ايتىپ, الدىن الۋ شارالارىن جۇرگىزىپ جاتىرمىز دەگەنىمەن, ازىرگە جاعدايدىڭ وڭالا الماي تۇرعانى انىق. ەندى تالاپتى قاتايتپاسا بولمايتىن ءتۇرى بار.
Ashyq جوباسىنا قاتىسۋشىلاردى ەسەپتەمەگەندە, ارقيلى سالتاناتتاردى, ەسكە الۋ, وتباسىلىق ءىس-شارالاردى وتكىزۋگە تىيىم سالىنادى. ءبىز وسى ارادا كارانتين تالاپتارىن بۇزعاندارعا قاتاڭ شارا قولدانۋ كەرەك ەكەنىن ايتقىمىز كەلەدى. ايتپەسە, دەرتتىڭ زاردابىنان قورقىپ ايىلىن جيىپ وتىرعاندار از. بۇل جايدى وتكەن جولى دا جازىپ, ەلدىڭ ەتى ءولىپ كەتكەنىن ايتقان بولاتىنبىز. موبيلدىك توپتار ءتارتىپ بۇزۋشىلاردى انىقتاپ, اكىمشىلىك ايىپپۇل سالىپ جاتقانىمەن, وبلىس ورتالىعىنداعى اۋدانداردا دا جۇزدەگەن ادام جيناپ, توي-تومالاق وتكىزۋ, باتا بەرۋ تىيىلعان جوق. وسىنشاما ادامنىڭ ىشىندە ءبىردى-ەكىلى دەرتتى ادام بولسا, ونداعان, ءتىپتى جۇزدەگەن ادامنىڭ ىندەت جۇقتىرىپ الۋى وپ-وڭاي. ادامداردىڭ ساقتىق شارالارىن ەسكەرمەي, قاتەرگە باسىن تىگىپ, نەلىكتەن تاۋەكەل ەتەتىنى تۇسىنىكسىز. مەيرامحانا مەن ءدامحانا يەلەرى «قىزىل ايماقتاعى» قاۋىپتىڭ ۇستەمدىك قۇرىپ تۇرعانىن جاقسى بىلسە دە, وزدەرىنىڭ قاراقان باسىنىڭ قامىن ويلاپ, رۇقسات بەرۋى دە قيسىنعا كەلمەيدى. دەمەك كارانتيندىك ءتارتىپ بۇزعاندارعا سالىناتىن ايىپپۇل كولەمىن ءوسىرۋ كەرەك شىعار. بالكىم سوندا عانا اياعىن تارتا باسۋى مۇمكىن.
وبلىستىڭ باس مەملەكەتتىك سانيتارلىق دارىگەرى ايناگۇل مۋسينانىڭ ايتۋىنا قاراعاندا, وڭىردە (Sputnik V, QazVac, CoronaVac, Sinofarm (XayatVax + VeroCell) ۆاكتسينالارى قولجەتىمدى. ءسوز اراسىندا كۇنى بۇگىنگە دەيىن ۆاكتسينانىڭ ءبىرىنشى كومپونەنتىمەن 296 071 ادام ەگىلگەنىن ايتا كەتەلىك. بۇل – ەگىلۋگە ءتيىستى حالىقتىڭ 61,8 پايىزى. ال ەكىنشى كومپونەنت بويىنشا 270 761 ادام ەگىلىپ ۇلگەرگەن. بۇل كورسەتكىش جالپى حالىقتىڭ 36,8 پايىزىن قۇرايدى. وسى ارادا جۇمىستى ءالى دە شيراتا ءتۇسۋ كەرەك ەكەنىن ايتا كەتۋ پارىز. ۇجىمدىق يممۋنيتەتتى قالىپتاستىرۋ ءۇشىن حالىقتىڭ كەم دەگەندە 60 پايىزىن قامتۋ قاجەت ەكەنى بەلگىلى. مىنە, وسىنداي كورسەتكىشكە قول جەتكىزگەندە عانا كارانتيندىك شارالاردى ءسال بوساڭسىتۋعا بولار.
– وبلىس بويىنشا 296 071 ەكپە سالدىرعان ادامنىڭ 231-ءى
عانا ىندەت شەڭگەلىنە ءىلىندى, – دەيدى ايناگۇل مۋسينا, – مۇنداي جاعدايدىڭ ورىن الۋى جالعان تولقۇجات جاساتۋدىڭ سالدارى بولۋى ابدەن مۇمكىن.
جالعان تولقۇجاتتىڭ جۇرتشىلىققا تيگىزەر زاردابى كوپ ەكەنى تۋرالى از ايتىلىپ جۇرگەن جوق. دالەلدەنگەن كەزدە جالعان ۆاكتسينا جاساعاندار قىلمىستىق جاۋاپكەرشىلىككە تارتىلاتىنى دا بەلگىلى. بىلە تۇرىپ وسىنداي قادامعا بارعانداردى قالاي كەشىرۋگە بولادى. ءبىر ادامنىڭ عانا دەنساۋلىعىنا نۇقسان كەلىپ قويماي, جالپى حالىققا قاۋىپ توندىرۋگە جول بەرىپ وتىرعانداردى جازالاۋ قاتايتىلسا, مۇنداي قاساقانا ءتارتىپ بۇزۋ ازايار ما ەدى.
وڭىردە رەۆاكتسيناتسيا قاراشا ايىنىڭ ءۇشىنشى ونكۇندىگىنەن باستالادى. الدىمەن تاۋەكەلدى توپتار قامتىلماق. ۆاكتسينانىڭ ءبىر دوزاسى قايتا ۆاكتسينالاۋ ءۇشىن قولدانىلادى. قوسىمشا دوزانى ەنگىزۋ تولىق كۋرس اياقتالعاننان كەيىن 6-9 ايدان كەيىن ۇسىنىلادى.
قولدا بار دەرەكتەردى اقىل تارازىسىنا سالىپ ساراپتاساڭىز, ىندەتتىڭ ءورشىپ تۇرعانىنا الدىمەن ءوزىمىز كىنالى ەكەنىمىز ايدان انىق. حالىقتىڭ ءبارى توتەننەن كەلگەن دەرتتىڭ قارقىنىن تومەندەتۋ ءۇشىن الدىمەن ءوزى ساقتانسا, وزگە دە امان بولار ەدى. ءبىر اتتەگەن-ايى, جالقىنىڭ عانا ەمەس جالپىنىڭ جايىن ويلاۋ كەمشىن.
اقمولا وبلىسى
