قازاقستان رەسپۋبليكاسى اقپارات جانە قوعامدىق دامۋ مينيسترلىگى جانە Facebook بىرلەسكەن مالىمدەمە جاساعانى تۋرالى حابارلاما تاراتتى.
«قازاقستان رەسپۋبليكاسىنىڭ ۇكىمەتىنە اقپاراتتىق كەڭىستىكتىڭ قاۋىپسىزدىگىن ارتتىرۋ ماسەلەسىن شەشۋگە كومەك كورسەتۋ ماقساتىندا Facebook قازاقستانعا ىشكى «كونتەنتتى حابارلاۋ جۇيەسىنە» («Content Reporting System» (CRS)) تىكەلەي ەكسكليۋزيۆتى قولجەتىمدىلىك بەردى. CRS مينيسترلىككە Facebook جاھاندىق كونتەنتتىك ساياساتىنىڭ دا, قازاقستان رەسپۋبليكاسىنىڭ ۇلتتىق زاڭناماسىنىڭ دا بۇزۋشىلىقتارى بار كونتەنت تۋرالى جەدەل حابارلاۋعا مۇمكىندىك بەرەدى.
قازاقستان ورتالىق ازيادا كونتەنتتىك ساياساتقا جاۋاپ بەرەتىن Facebook كومپانياسىنىڭ حالىقارالىق كومانداسىمەن تىكەلەي بايلانىس ارناسىنا جانە جۇيەگە قوسىلعان العاشقى ەل بولىپ تابىلادى.
Facebook كومپانياسىنىڭ جۇرتشىلىقپەن بايلانىس جونىندەگى وڭىرلىك ديرەكتورى دجوردج چەن مىرزانىڭ مالىمدەۋىنشە: Facebook قازاقستان ۇكىمەتىمەن, اسىرەسە بالالاردىڭ ينتەرنەتتەگى قاۋىپسىزدىگىن قامتاماسىز ەتۋ باعىتىندا بىرلەسكەن جۇمىسقا ۇمتىلادى. ءبىزدىڭ ۇزاق مەرزىمدى ىنتىماقتاستىعىمىزدىڭ العاشقى قادامى رەتىندە ءبىز قازاقستان ۇكىمەتىنە ۋاكىلەتتى ورگاندارعا زياندى كونتەنتپەن نەعۇرلىم ءتيىمدى جانە پارمەندى كۇرەسۋگە كومەكتەسەتىن «كونتەنتتى حابارلاۋ جۇيەسىنە» قول جەتكىزۋگە قۋانىشتىمىز. Facebook كومانداسى كيبەركەڭىستىكتىڭ قاۋىپسىزدىگىن قامتاماسىز ەتۋ ماقساتىندا قازاقستاندىق مامانداردى وقىتۋدى جالعاستىرادى.
اقپارات جانە قوعامدىق دامۋ مينيسترلىگى, ءوز تاراپىنان, Facebook-پەن ەكىجاقتى ىنتىماقتاستىقتىڭ قول جەتكىزىلگەن دەڭگەيىن قاناعاتتانۋشىلىقپەن اتاپ وتەدى.
وسى جىلدىڭ 28 قازانىندا Facebook كومانداسى مينيسترلىكتىڭ ماماندارىنا «كونتەنتتى حابارلاۋ جۇيەسىن», سونداي-اق Facebook كونتەنتتىك ساياساتى جانە قوعامداستىق ستاندارتتارى بويىنشا جۇمىس بويىنشا ترەنينگ وتكىزدى.
قاراشا ايىنىڭ باسىنان باستاپ مينيسترلىك جۇيەدە جۇمىس ىستەي باستايدى.
ەكى تاراپ ءوزارا ءىس-قيمىلدىڭ تۇراقتى تەتىگىن بەلگىلەۋگە, ونىڭ ىشىندە مينيسترلىكپەن ءتۇرلى اسپەكتىلەر بويىنشا تىعىز جۇمىس ىستەيتىن Facebook وڭىرلىك وفيسىنەن ۋاكىلەتتى وكىلدى انىقتاۋ تۋرالى كەلىسىمگە كەلدى.
مينيسترلىك «كونتەنتتى حابارلاۋ جۇيەسىن» پايدالانۋ Facebook جانە Instagram پلاتفورمالارىندا قۇقىققا قارسى كونتەنتتىڭ تارالۋىنا قارسى ءىس-قيمىل بويىنشا جۇرگىزىلىپ جاتقان جۇمىستىڭ جەدەلدىگىن جانە جالپى تيىمدىلىگىن ارتتىرۋعا مۇمكىندىك بەرەتىنىنە سەنىم بىلدىرەدى.
وسى مۇمكىندىكتى پايدالانا وتىرىپ, مينيسترلىك قازاقستان نارىعىندا جۇمىس ىستەيتىن ينتەرنەت-كومپانيالارمەن سىندارلى ديالوگ قۇرۋعا جانە ىنتىماقتاستىق ورناتۋعا دايىن ەكەندىگىن جانە قاۋىپسىز اقپاراتتىق كەڭىستىكتى قۇرۋ باعىتىندا جۇرگىزىلىپ جاتقان باعىتتى ۇستاناتىنىن اتاپ ءوتتى», دەلىنگەن قر اقپارات جانە قوعامدىق دامۋ مينيسترلىگى تاراتقان مالىمدەمەدە.
