مينيستر ۇلتتىق جوبا اياسىندا كۇردەلى جوندەۋدەن وتكەن جارما اۋدانىنىڭ اۋەزوۆ كەنتىندەگى باقىرشىق ورتا مەكتەبىنە باردى. ءبىلىم ورداسىندا ەدەندەر, ەسىكتەر, كارىز جۇيەسى, سۋ قۇبىرى, جىلۋ جانە ەلەكتر جەلىلەرى اۋىستىرىلىپ, سىرتقى جانە ىشكى ارلەۋ جۇمىستارى جۇرگىزىلگەن. بالالار بۇگىندە جاڭارتىلعان زاماناۋي كابينەتتەردە ءبىلىم الۋدا.
وسى كەنتتە قر يدم باسشىسى مادەنيەت ءۇيى قۇرىلىسىنىڭ بارىسىمەن تانىستى. نىساندى پايدالانۋعا بەرگەننەن كەيىن تۇرعىندار عيماراتتاعى 120 ورىندىق كىتاپحانا مەن 400 ورىندىق كورەرمەن زالىن پايدالانا الادى.
سونداي-اق بەيبىت اتامقۇلوۆ «تالدىقورعان-وسكەمەن» جانە «قالباتاۋ-مايقاپشاعاي» اۆتوجولدارىنىڭ قايتا جاڭارتىلعان ۋچاسكەلەرىن قاراپ, جول بويىنداعى قىزمەت كورسەتۋ نىساندارىنىڭ جۇمىسىمەن تانىستى.
مينيستر ۇلان اۋدانىندا سالىنىپ جاتقان قۇس فابريكاسىنا باردى. وندا ءوندىرىس كەڭەيتىلىپ, شىعارىلاتىن دايىن ءونىم كولەمى ەكى ەسەگە - جىلىنا 60 مىڭ تونناعا دەيىن ارتادى. 700-دەن استام تۇراقتى جۇمىس ورنى اشىلادى. قۇس وسىرۋدەن باستاپ وڭدەۋگە جانە كونسەرۆىلەۋگە دەيىنگى ءوندىرىس تسيكلى ۇيىمداستىرىلادى.
گلۋبوكوە اۋدانىندا قر يدم باسشىسى «اۋىل - ەل بەسىگى» باعدارلاماسى اياسىندا سالىنعان ءتورت اۋىلدىڭ نىساندارىمەن تانىستى. اۋىلدىق اۋماقتاردى دامىتۋدىڭ كەشەندى ءتاسىلى بويىنشا شىعىس قازاقستان وبلىسىنىڭ وڭ تاجىريبەسى اتاپ ءوتىلدى. وندا اۋىلداعى ءومىر ساپاسىن جاقسارتۋ ءۇشىن بىرنەشە مەملەكەتتىك باعدارلامانىڭ رەسۋرستارى شوعىرلاندىرىلادى.
گلۋبوكوە كەنتىندە مينيستر 300 ورىندىق كورەرمەن زالى بار مادەنيەت ۇيىنە بارىپ, زاماناۋي قۇرال-جابدىقتارمەن, حورەوگرافيا, مۋزىكا, ساندىك-قولدانبالى ونەر ۇيىرمەلەرىنىڭ جۇمىسىمەن تانىستى. مادەنيەت ءۇيى الدىندا قازاقتىڭ ۇلى اقىنى, اعارتۋشى اباي قۇنانباەۆتىڭ ءمۇسىنى ورناتىلعان.
سونداي-اق بەيبىت اتامقۇلوۆ 2018 جىلعى سۋ تاسقىنىنان كەيىن اپاتتى جاعدايدا تۇرعان ەسكى وتكەلدىڭ ورنىنا جاقىندا سالىنعان پروگرەسس اۋىلىنداعى كوپىردى قاراپ شىقتى.
بەلوۋسوۆكا كەنتى مەن تارحانكا اۋىلىنداعى جوندەلگەن كوشەلەرگە باردى. ول ەلدى مەكەندەردە 8 شاقىرىم جول جوندەلىپ, جارىق تىرەكتەرى ورناتىلدى.
7 شاقىرىمنان استام جولى جوندەلگەن كوكپەكتى اۋدانى سامار اۋىلىنىڭ كوشەلەرىن قارادى.
بۇل ەلدى مەكەندە «اۋىل – ەل بەسىگى» جوباسى اياسىندا باسسەين سالىنىپ جاتىر. بۇگىنگى تاڭدا وندا 80% جۇمىستار ورىندالعان.
سونداي-اق مينيستر كۇرشىم اۋدانىنداعى بۇقتىرما سۋ قويماسى ارقىلى وتەتىن كوپىر وتكەلى سالىناتىن جەرگە باردى. قازىر نىساندا دايىندىق جۇمىستارى جۇرگىزىلۋدە. ءوڭىر تۇرعىندارى وتكەلدى 2024 جىلدان باستاپ پايدالانا الادى.
شىعىس قازاقستان وبلىسىندا «اۋىل – ەل بەسىگى» باعدارلاماسىن جۇزەگە اسىرۋدىڭ نەگىزگى ماسەلەلەرى وبلىس باسشىلىعى, قالالار مەن اۋداندار اكىمدەرىنىڭ قاتىسۋىمەن وتكەن جۇمىس كەڭەسىندە تالقىلاندى. قر يدم باسشىسى شقو اكىمىنىڭ ءبىرىنشى ورىنباسارى الماسحان سماتلاەۆپەن بىرگە اۋىلدى كەشەندى دامىتۋ جوبالارىن قاراستىردى.
