بۇگىنگە دەيىن كاسىبي شارشى الاڭدا ءۇش كەزدەسۋ وتكىزىپ, ونىڭ بارلىعىندا نوكاۋتپەن جەڭىسكە جەتكەن جەرلەسىمىز ەڭ كەيىنگى ايقاسىندا WBC International بەلبەۋىن يەلەنگەن بولاتىن. وسىنداي ايشىقتى جەڭىسىنىڭ ارقاسىندا بارشا جانكۇيەر جۇرتقا چەمپيوندىق ءۇمىتتى سىيلاعان تۇرسىنباي كاسىپقوي بوكستاعى نەبارى ءتورتىنشى كەزدەسۋىندە جەڭىلىپ قالدى.
ۇلىبريتانيا استاناسى – لوندونداعى York Hall ارەناسىندا وتكەن بوكس كەشىندە وتانداسىمىز دومينيكاندىق حۋان كارلوس ابرەۋمەن (24-6-1, 22 كو) قولعاپ ءتۇيىستىردى. كەزدەسۋ ون راۋندقا جوسپارلانعانىمەن, جەكپە-جەك 7-رانۋدتا ءوز مارەسىنە جەتتى. كەزدەسۋ بەل ورتاسىنان اۋعان شاقتا دومينيكاندىق بوكسشى اۋەلى قۇلاحمەتتى نوكداۋنعا ءتۇسىرىپ, ىلە-شالا اۋىر سوققىسىمەن سۇلاتىپ سالدى. ءسويتىپ تۇرسىنباي قۇلاحمەت كاسىپقوي كارەراسىنداعى العاشقى جەڭىلىسىنە ۇشىراپ, وزىنە تيەسىلى WBC International تيتۋلىنان دا ايىرىلىپ قالدى.
