Finprom-نىڭ جازۋىنشا, جىل باسىنان بەرى ەلدەگى ءموبيلدى ينتەرنەت جىلدامدىعى 63 پايىزعا جاقسارعان. ورتالىق ازيا ەلدەرى اراسىندا قازاقستاننىڭ كورسەتكىشى جوعارى. قىرعىزستان – 103, وزبەكستان – 120, تاجىكستان 129-ورىن العان. كورشىلەس رەسەي 90-ورىن السا, بەلارۋس – 119-ورىندا. رەيتينگ ليدەرلەرى – ءباا, وڭتۇستىك كورەيا, نورۆەگيا, قاتار جانە قىتاي.
«قازاقستاندا ءموبيلدى ينتەرنەت جىلدامدىعىن ساپالى جانە قولجەتىمدى ەتۋ بويىنشا ماڭىزدى شارالار قابىلدانىپ جاتىر. مىسالى, بيىل 9 ايدا بايلانىس سالاسىنا جىبەرىلگەن ينۆەستيتسيا 17,8 پايىزعا ءوسىپ, 88,8 ملرد تەڭگەنى قۇراعان. سوڭعى بەس جىلدا كۇردەلى جوندەۋدەن وتكىزۋ ءۇشىن جۇمسالعان قارجى جىل سايىن 19 پايىزعا ءوسىپ كەلەدى. سونىمەن قاتار ءموبيلدى بايلانىستىڭ بەسىنشى بۋىنى 5G-ءدى ەنگىزۋ جۇمىستارى جالعاسىپ جاتىر. 2019 جىلى ءموبيلدى وپەراتورلار جاڭا جەلىنى تەستىلەۋدەن وتكىزە باستادى» دەپ جازادى Finprom.
بيىل قىركۇيەكتە تسيفرلىق دامۋ ءمينيسترى باعدات مۋسين ۇكىمەت جانىنداعى راديوجيىلىك جونىندەگى ۆەدومستۆوارالىق كوميسسيانىڭ 5G ستاندارتىن نۇر-سۇلتان, الماتى جانە شىمكەنت قالالارىندا سىناقتان وتكىزۋ تۋرالى شەشىم قابىلداعانىن ايتقان ەدى. گرافيك بويىنشا تەستىلەۋدى «كازاقتەلەكوم», «كسەلل», «كار-تەل», «موبايل تەلەكوم-سەرۆيس» وپەراتورلارى جۇرگىزەدى. ينفراقۇرىلىمدى جەتىلدىرۋ جانە ينتەرنەت ساپاسىن جاقسارتۋ جاۋاپكەرشىلىگى وسى وپەراتورلاردىڭ موينىنا جۇكتەلگەن. ءبىرىنشى جارتى جىلدىقتا Kcell ءموبيلدى بايلانىس وپەراتورىنىڭ كاپيتالدىق شىعىنى 4,7 ملرد تەڭگەنى قۇراپ, بىلتىرمەن سالىستىرعاندا 28,3 پايىزعا ءوسىم كورسەتكەن.
ۇلتتىق ستاتيستيكا بيۋروسىنىڭ دەرەگىنشە, ءموبيلدى بايلانىس سالاسىنا جىبەرىلگەن ينۆەستيتسيالارعا نەگىزىنەن ەسكى قۇرىلعىلار اۋىستىرىلىپ, ابونەنتتەر سانىن كوبەيتۋ بويىنشا ءوندىرىس قۋاتتىلىعىن كەڭەيتۋ جۇمىستارى اتقارىلعان. سونداي-اق قارجى جاڭا تەحنولوگيالاردى ەنگىزۋگە دە جۇمسالعان.
ءبىرىنشى جارتىجىلدىق ناتيجەسى بويىنشا ەلدە 24,2 ملن ابونەنت بار. بۇل بىلتىردان 1,2 پايىزعا كوپ. ءموبيلدى بايلانىس وپەراتورلارىنىڭ ىشىندە Kcell, كومپانياسىنىڭ ابونەنتى كوپ. ابونەنتىنىڭ كوپتىگىمەن Beeline جانە Tele2/Altel وپەراتورلارى دا ماقتانا الادى. بولجام بويىنشا 2025 جىلعا دەيىن ءموبيلدى ينتەرنەت پايدالانۋشىلارى 54 پايىزعا ارتپاق. ول كەزدە 3G جەلىسى جالپى نارىقتىڭ 28 پايىزىن عانا يەلەنسە, 4G 60 پايىزىن قامتيدى, ال 5G جاڭا جەلىسى نارىقتىڭ 12 پايىزىن يەلەنبەك.
الايدا جاقىندا وتكەن Digital Bridge حالىقارالىق تەحنولوگيالىق فورۋمىندا ءسوز سويلەگەن پرەزيدەنت قاسىم-جومارت توقاەۆ ەلدەگى ينتەرنەت ساپاسى مەن جىلدامدىعىنا قاتىستى رەنىش ءبىلدىرىپ, ۇكىمەتكە وسىعان وراي زاڭدىق تۇرعىدا سانكتسيا جانە اكىمشىلىك قۇرامدى رەگلامەنتتەۋ بويىنشا تاپسىرما بەردى.
«قازىرگى كەزدە ناقتى ەمەس نارسەنى ساتۋ قالىپتى جاعدايعا اينالدى. ولار ينتەرنەت پارامەترلەرىنىڭ ءبىرىن جارنامالايدى دا, شىن مانىندە مۇلدە باسقاسىن ۇسىنادى. جاقسارىپ جاتقان ەشتەڭە جوق. ماعان بەرىلگەن مالىمەت بويىنشا, ءتىپتى ەلوردانىڭ وزىندە, ءسوز بەن ءىستىڭ الشاقتىعى 40-50 پايىزعا دەيىن جەتەدى. بۇل, شىن مانىندە, تۇتىنۋشىلاردى الداۋ دەگەن ءسوز. مۇنداي ورەسكەلدىكتى دوعارۋ كەرەك. ۇكىمەتكە اكىمشىلىك قۇرامدى زاڭدىق نەگىزدە بەكىتۋدى جانە مۇنداي زاڭ بۇزۋشىلىقتار ءۇشىن سانكتسيالار بەلگىلەۋدى تاپسىرامىن. ءبىز ۇنەمى قازاقستاننىڭ اۋماعى 100 پايىزعا جۋىق ينتەرنەتپەن قامتىلدى دەپ ايتىپ ءجۇرمىز. كانەكي, ماسەلەنىڭ باسىن اشىپ الايىق, وسى ءىس جۇزىندە راستالعان اقپارات پا الدە جوق پا؟ نەمەسە ويىمىزداعىنى شىندىق دەپ سانايمىز با؟» دەپ قاتاڭ سىنعا العان ەدى.
قازىر قازاقستاندا 2 مىڭعا جۋىق اۋىل ينتەرنەتپەن قامتىلماعان. ءتيىستى مينيسترلىكتىڭ دەرەگى بويىنشا سونىڭ ىشىندە 617 اۋىلعا ينتەرنەت تارتۋ مۇلدە مۇمكىن بولماي تۇر.
