مينيستر زيالى قاۋىم وكىلدەرىمەن كەزدەسۋدە 20-دان اسا كورسەتكىش پەن 60-تان استام ءىرى ءىس-شارانى قامتيتىن «ۇلتتىق رۋحاني جاڭعىرۋ» جوباسىن تانىستىرىپ, ونىڭ نەگىزگى ءۇش باعىتى بويىنشا جوسپارلانعان ءىس-شارالار تۋرالى باياندادى. بۇل – ەلدىڭ زياتكەرلىك الەۋەتى مەن مەملەكەتتىك ءتىلدىڭ مارتەبەسىن ارتتىرۋ, «ەل رۋحى» اتتى مادەنيەت سالاسىنداعى قىزمەتتەردىڭ قولجەتىمدىلىگىن ارتتىرۋعا بايلانىستى شارالار كەشەنىن ىسكە اسىرۋ, سونداي-اق «تاۋەلسىزدىك ۇرپاقتارى» اتالاتىن جاستار ءۇشىن جاڭا مۇمكىندىكتەر جاساۋ باعىتى.
– اتىراۋ ءوڭىرى – قاي كەزدە دە قازاقىلىعىن جوعالتپاعان, ۇلتتىق سالت-داستۇرگە بەرىك, رۋحانياتى جوعارى مەكەن. ءبىز قازىر «رۋحاني جاڭعىرۋ» باعدارلاماسى اياسىندا وتكەن تاريحىمىزدى تۇگەندەپ, كوپتەگەن وقيعاعا جاڭاشا باعا بەرىپ جاتىرمىز. وسى ورايدا ەل تاريحىن تۇگەندەپ, رۋحانياتىن كوتەرەتىن, وسكەلەڭ ۇرپاققا ۇلتتىق تاربيە بەرىپ, دۇرىس جول كورسەتەتىن ەل زيالىلارىنىڭ قولداۋى قاجەت. ويتكەنى مەملەكەت باسشىسى ۇلتتىق ينتەلليگەنتسيانىڭ رولىنە ەرەكشە كوڭىل ءبولىپ وتىر. سول سەبەپتەن ۇلتتىق جوبانى وڭىرلەردە دە جۇزەگە اسىرۋعا بەلسەندى اتسالىسۋعا شاقىرامىن, – دەدى مينيستر.
ءمينيستردىڭ ايتۋىنشا, ۇلتتىق ينتەلليگەنتسيا ەلىمىزدىڭ دامۋىنا ايرىقشا ۇلەس قوسىپ كەلەدى. ولار بۇعان دەيىن اعارتۋشىلىق قىزمەت ارقىلى جاستارىمىزدى, تۇتاس حالقىمىزدى العا جەتەلەدى. قازىرگىدەي اقپاراتتىق تاسقىن داۋىرىندە بالا ساناسىنا مۋلتفيلمدەردىڭ اسەرى جوعارى بولىپ وتىر. سول سەبەپتەن ۇرپاق تاربيەسىنە قاتىستى ماڭىزدى سالانىڭ ءبىرى – تانىمال بالالار ارنالارىن قازاقشا سويلەتۋ. ماسەلەن, اۋقىمدى جوبالار اياسىندا TiJi, Disney ارنالارىنىڭ مۋلتفيلمدەرى قازاق تىلىنە اۋدارىلادى. مۇنداي جوبالار بالالار كونتەنتى الاڭىنىڭ مەملەكەتتىك تىلدەگى ساپالى ماتەريالدارمەن تولىعۋىنا ىقپال ەتەدى.
– بيىلعى 1 قازاننان تۇركىستان وبلىسىنىڭ شەكارالىق ايماعىندا ورنالاسقان 30 ەلدى مەكەنگە «شالقار» راديوسى, شىعىس قازاقستان وبلىسىنداعى ەكى شەكارالىق اۋىلعا «قازاق راديوسى» تارالا باستادى. ەندى 2025 جىلعا دەيىنگى بەكىتىلگەن ۇلتتىق جوسپارعا سايكەس, ەلىمىزدە 300 ەلدى مەكەنگە راديو جەلىسى جەتەدى. جەلتوقساننىڭ سوڭىندا جانە الداعى قاڭتار ايىنىڭ باسىندا جاڭگىر حان, قانىش ساتپاەۆ, روزا باعلانوۆا سىندى تاريحي تۇلعالار جايلى 6-7 فيلم شىعارىلادى. سونداي-اق دينا نۇرپەيىسوۆا, ەرمەك سەركەباەۆ تۋرالى فيلمدەر تۇسىرىلەدى, – دەدى مينيستر ا.بالاەۆا.
مينيستر جىلىوي اۋدانىنىڭ تۇرعىندارىمەن كەزدەسىپ, وسىنداعى اقمەشىت قورىمىنا باردى.
اتىراۋ وبلىسى
