ءىس-شارانىڭ ەكىنشى كۇنىندە ۇيىمداستىرىلعان دوڭگەلەك ۇستەل وتىرىسىنا قازاق مۋلتيپليكاتسياسىنىڭ وكىلدەرى مەن باۋىرلاس تۇركى ەلدەردىڭ بەلگىلى رەجيسسەر-انيماتورلارى قاتىسىپ, ويلارىن ورتاعا سالدى. ولاردىڭ قاتارىندا ۇلتتىق كينونى قولداۋ ورتالىعىنىڭ باس پروديۋسەرى اداي ءابىلدا, انيماتسيا پروديۋسەرى جانە رەجيسسەر مۋساب گۇندۇز (تۇركيا), رەجيسسەر-ستسەناريست, قر مادەنيەت قايراتكەرى باتىرحان داۋرەنبەكوۆ, Balapan تەلەارناسىنىڭ باس پروديۋسەرى ساندۋعاش بايماحانقىزى, كوميكس جانە قوزعالىس سۋرەتشىسى مۇستافا احمەت قارا (تۇركيا), رەجيسسەر-مۋلتيپليكاتور تۇردىبەك مايدان, قازاق ۇلتتىق ونەر ۋنيۆەرسيتەتىڭ وقىتۋشىسى ءلاززات بىلالقىزى, رەجيسسەر-انيماتور ازيزبەك مۋحامەدوۆ (وزبەكستان) جانە وتاندىق كينوستۋديالاردىڭ جەتەكشىلەرى بولدى.
انيماتسيا تاقىرىبىنا ارنالعان باسقوسۋعا قر پارلامەنتى ءماجىلىسىنىڭ دەپۋتاتى ماقپال تاجماعامبەتوۆا مەن «رۋحاني جاڭعىرۋ» قوعامدىق دامۋ ينستيتۋتى باسقارما توراعاسىنىڭ ورىنباسارى امانبەك تولەپبەرگەنوۆ قاتىسىپ, ءوز ويلارىمەن ءبولىستى.
ءىس-شارادا كوتەرىلگەن ماسەلەگە قاتىستى جينالعانداردىڭ ويى ءبىر ارناعا توعىستى. ولار كەلەشەكتە تۇركى دۇنيەسىنىڭ انيماتورلارىن بىرىكتىرۋ كەرەك دەگەن ماسەلەنى ءبىر اۋىزدان قولدادى.
تۇركىتىلدەس ەلدەردىڭ اراسىنداعى انيماتسيالىق فيلمدەر وندىرىسىنە قاتىستى ماماندار مەن كومپانيالاردى بىرىكتىرەتىن ورتالىق ۇيىمداستىرۋ ماسەلەسى بىرنەشە جىلدان بەرى كوتەرىلىپ كەلە جاتقانىن ايتقان ۇلتتىق كينونى قولداۋ ورتالىعىنىڭ باس پروديۋسەرى اداي ءابىلدا بۇل ۇسىنىستى ورىندى دەپ ەسەپتەيتىنىن جەتكىزدى.
«تۇركى ەلدەرىنىڭ انيماتسيا ماماندارىن بىرىكتىرىپ, سول جۇمىستى جۇيەلەسەك, اۋقىمدى اۋديتوريانى قامتۋعا مۇمكىندىك تۋادى. وسى باعىتتا جۇمىس ىستەۋىمىز كەرەك. قىزىعۋشىلىق بار, الايدا ارەكەت جوق. تۇركىتىلدەس مەملەكەتتەردىڭ اراسىندا كوپىر بولاتىن ۇيىم قۇرۋىمىز كەرەك», دەدى ا. ءابىلدا.
باسقوسۋعا تۇركيادان ارنايى كەلگەن انيماتسيا پروديۋسەرى جانە رەجيسسەر مۋساب گۇندۇز تۇركى حالىقتارى ءوز اراسىندا نيەتتەس, پىكىرلەس, جاناشىر بولۋ ماڭىزدى ەكەنىن باسا ايتىپ, ورتاق ۇيىم قۇرۋدىڭ ماڭىزى زور ەكەندىگىنە توقتالدى.
«تۇركيادا 85 ميلليونعا جۋىق حالىق بار دەسەك, ونىڭ 20 ميلليونى – ءبىزدىڭ نەگىزگى اۋديتوريا, ياعني, بالالار. ءبىز كەشە فەستيۆالدە قازاق كورەرمەنىنە ۇسىنعان «Istanbul Muhafizlary» ءفيلمىن تۇركيادا 10 ميلليون بالا تاماشالاپ, جوعارى رەيتينگكە قول جەتكىزدى. بۇل – ءبىز ءۇشىن ۇلكەن جەتىستىك, ول سونداي-اق ءبىزدى العا جەتەلەپ, ىنتالاندىرىپ وتىرادى. ال تۇركىتىلدەس ەلدەردىڭ اۋديتورياسى بۇدان دا ۇلكەن, شامامەن 200 ميلليوننان استام ادام بار. انيماتسيا – قىمبات جانر, كوپ قارجىنى قاجەت ەتەدى. ال وسى تۇركى ەلدەرى اۋديتورياسى ءبىز ءۇشىن ۇلكەن نارىق بولماق. تۇركى ەلدەرىنە ورتاق بىرلەستىك قۇرۋدى ءبىز دە قولدايمىز», دەدى تۇرىك انيماتسيا پروديۋسەرى.
سونىمەن قاتار, ساراپشىلار انيماتسياعا قاتىستى قارجى تارتۋ, قۇقىقتىق رەتتەۋ, اۋديتوريانىڭ تالعامى مەن تالابىنا ساي بولۋ, جاس دارىنداردى وقىتۋ, تەحنيكالىق جابدىقتاۋ سەكىلدى كەزەك كۇتتىرمەيتىن وزەكتى ماسەلەلەردى اتاپ ءوتتى.
باسقوسۋ بارىسىندا قر پارلامەنتى ءماجىلىسىنىڭ دەپۋتاتى ماقپال تاجماعامبەتوۆا مەن «رۋحاني جاڭعىرۋ» قوعامدىق دامۋ ينستيتۋتى باسقارما توراعاسىنىڭ ورىنباسارى امانبەك تولەپبەرگەنوۆ انيماتسيا ماماندارىنىڭ ۇسىنىستارىمەن تانىسىپ, قولداۋ كورسەتۋگە نيەتتى ەكەندىكتەرىن جەتكىزدى.
ءىس-شارادا وزبەكستاننان كەلگەن ازيزبەك مۋحامەدوۆ انيماتور-مۋلتيپليكاتورلار مەن مەملەكەت وكىلدەرىنىڭ ءبىر ۇستەل باسىندا كەزدەسىپ, پىكىر الماسىپ, ەركىن ديالوگ قۇرعانىنا ءدان ريزا ەكەنىن جاسىرمادى. ول جۇمىس ءدال وسىلاي بىرلەسە اتقارىلعاندا جاقسى دۇنيەلەر تۋاتىنىنا سەنىمدى.
دوڭگەلەك ۇستەل قاتىسۋشىلارى تۇركىتىلدەس ەلدەردىڭ انيماتسياداعى ىنتىماقتاستىعىن ودان ءارى نىعايتىپ, ورتاق مىندەتتەردى جۇزەگە اسىرۋعا قادام جاساۋعا ۋاعدالاسىپ تارقاستى.
