ونىڭ ايتۋىنشا, كەيبىر ۆەدومستۆولارداعى تسيفرلاندىرۋ جونىندەگى ۆيتسە-مينيسترلەر ولارعا سايكەس كەلمەيتىن جۇمىستارمەن اينالىستى.
«ولار كومپيۋتەرلىك تەحنيكانى ساتىپ الدى, سەرۆەرلەردى ساتىپ الۋ ءۇشىن تەحنيكالىق سيپاتتامالاردى جازادى. ەگەر باسشىلىقتا ينتەرنەتپەن بىردەڭە دۇرىس بولماسا, وندا ونى قامتاماسىز ەتۋ تسيفرلاندىرۋ جونىندەگى ۆيتسە-ءمينيستردىڭ يىعىندا بولدى. شىن مانىندە, تسيفرلاندىرۋ جونىندەگى ۆيتسە-مينيستر تسيفرلىق ترانسفورماتسيانى ىلگەرىلەتۋمەن اينالىسۋى ءتيىس», دەدى باعدات مۋسين وكق بريفينگىندە.
ول اۆتوماتتاندىرۋ مەن تسيفرلىق ترانسفورماتسيا جۇمىستارىنىڭ اراسىنداعى ايىرماشىلىقتى ءتۇسىندىردى.
«بىزگە ادىستەمەلىك تاپسىرمالار بەرىلگەن كەزدە ءبىز اۆتوماتتاندىرۋمەن اينالىستىق. مىسالى, جەر قويناۋىن پايدالانۋعا ليتسەنزيا نەمەسە قۇقىق بەرۋ. بۇل قۇقىق زاڭنامالىق اكتىلەردە جانە ءتيىستى نۇسقاۋلىقتاردا سيپاتتالعان. جەتەكشىلىك ەتەتىن سالالىق ۆيتسە-مينيستر نەمەسە سالالىق دەپارتامەنت ونى اۆتوماتتاندىرۋ كەرەك دەپ سيپاتتادى, سودان كەيىن IT ماماندارى ونى قىزمەتكە الدى جانە وسى پروتسەستەردى اۆتوماتتاندىردى. ءبىز قولدانىستاعى نورماتيۆتىك-قۇقىقتىق اكتىلەردى نەگىزگە الىپ, بيزنەس-پروتسەستەردى اۆتوماتتاندىرۋمەن اينالىستىق», دەپ ءتۇسىندىردى تسيفرلاندىرۋ ءمينيسترى.
مىسالى, بانكتەرمەن جۇمىس جاساۋدىڭ ارقاسىندا اۆتوكولىك ساتۋ, اۆتوكولىكتى تىركەۋ بويىنشا ونلاين-سەرۆيس پايدا بولدى. ءمينيستردىڭ ايتۋىنشا, مۇنىڭ بارلىعى تسيفرلىق ترانسفورماتسيا. ماسەلەن, بۇگىنگى تاڭدا اۆتوكولىكتەردىڭ 36%-ى ونلاين رەجيمدە قايتا راسىمدەلگەن, ادامدار حقكو-عا بارمايدى.
نەمەسە مۇگەدەكتىگى بار ادامدارعا مۇگەدەكتىك الۋ ءۇشىن كەم دەگەندە ءتورت ورىنعا بارۋ كەرەك بولدى. ەندى ولار ەمحاناعا ءبىر رەت قانا بارسا جەتكىلىكتى, سەبەبى مەديتسينا قىزمەتكەرلەرى بارلىق دەرەكتەردى بازاعا ەنگىزىپ, پروتسەسستى ونلاين وتكىزەدى.
«تسيفرلىق ترانسفورماتسيا - بۇل بارلىق پروتسەستەردى قايتا قاراۋ. بۇگىن بار نارسەنى اۆتوماتتاندىرۋدىڭ قاجەتى جوق. پرەزيدەنت تسيفرلاندىرۋ جونىندەگى ءاربىر ۆيتسە-ءمينيستردىڭ سالاعا ەنىپ, سىبايلاس جەمقورلىق كورىنىستەرى جانە تاۋەكەلدەرمەن قازىرگى جاعدايدى وزگەرتۋگە كومەكتەسەتىن يننوۆاتسيالاردى ۇسىنۋى دا وسىنى كۇتەدى. KPI ءبىزدىڭ ۇلتتىق جوبادان شىعاتىن بولادى. ءبىز بارلىعىن ەنگىزىپ, ءاربىر ۆيتسە-ءمينيستردىڭ الدىنا قويامىز», دەپ تۇيىندەدى مۋسين.
