تاۋەلسىز مەملەكەتتەر دوستاستىعىنا مۇشە مەملەكەتتەر باسشىلارىنىڭ 1941-1945 جىلدارعى ۇلى وتان سوعىسىنداعى جەڭىستىڭ 65 جىلدىعىنا بايلانىستى دوستاستىققا مۇشە مەملەكەتتەردىڭ حالىقتارىنا جانە الەم جۇرتشىلىعىنا
ۇندەۋى
2010 جىلدىڭ 9 مامىرىندا تاۋەلسىز مەملەكەتتەر دوستاستىعىنا مۇشە مەملەكەتتەردىڭ حالىقتارى ۇلى وتان سوعىسىنداعى كەڭەس حالقى جەڭىسىنىڭ 65 جىلدىعىن اتاپ وتەدى. بۇرىن-سوڭدى بولىپ كورمەگەن اسا اۋىر دا قاتىگەز سوعىستا كەڭەس وداعىنىڭ كوپۇلتتى حالقى جانە ونىڭ قارۋلى كۇشتەرى ءوز وتانىنىڭ ازاتتىعى مەن تاۋەلسىزدىگىن ساقتاپ, الەمنىڭ كوپتەگەن ەلدەرىن فاشيستىك ەزگىدەن قۇتقارىپ قالدى. مايداندا جانە تىلدا ءبىزدىڭ حالىقتارىمىز جانقيارلىق پەن جاپپاي قاھارماندىق كورسەتىپ, پاتريوتتىق پەن ينتەرناتسيونالدىق ونەگەسىن, كوز كورىپ, قۇلاق ەستىمەگەن قايسارلىق تانىتتى, ونسىز جەڭىسكە جەتۋ ءمۇمكىن ەمەس ەدى. مۇنداي قايسارلىقتى تاريح بىلگەن ەمەس. جەڭىسكە دەگەن مۇنداي ەرىك-جىگەردى دە بىلگەن ەمەس. جىل وتكەن سايىن ءبىزدىڭ حالىقتارىمىز جاساعان ەرلىك ونەگەسى سونبەيدى. ۋاقىت ءبىزدەن بۇل وقيعانى الىستاتقان سايىن بولاشاق ءۇشىن قاسقايىپ تۇرا بىلگەن جەڭىس سولداتتارى اتقارعان تاريحي ميسسيانىڭ ءمان-ماڭىزى سولعۇرلىم جارقىراي كورىنەدى. سوندىقتان دا دوستاستىققا مۇشە مەملەكەتتەردىڭ حالقىنا جانە الەم جۇرتشىلىعىنا ءسوز ارناي وتىرىپ, قازىر ءبىز ءوز مەملەكەتتەرىمىزدە امان-ساۋ جۇرگەن ارداگەرلەرگە “راحمەت” دەيمىز. ءبىز جەڭىمپاز قاھارماندارعا سوزبەن عانا ەمەس, سونىمەن بىرگە ناقتى ىسپەن دە قۇرمەت كورسەتۋگە, سوعىسقا قاتىسۋشىلار مەن تىل ەڭبەككەرلەرىن كۇندەلىكتى قامقورلىققا بولەۋگە, ولارعا كوڭىل ءبولىپ, جايلى تۇرمىس جاعدايلارىن جاساۋعا شاقىرامىز. 9 مامىر – جەڭىس كۇنى – ءبىزدىڭ ادامدار ءۇشىن ادىلدىك سالتانات قۇرعان, ماقتانىش جانە وسىناۋ شەكسىز قاتىگەز دە سۇراپىل شايقاستا وپات بولعان ميلليونداردى جالپىحالىقتىق ازا تۇتۋ كۇنى. ۇلى وتان سوعىسى جىلدارىندا ەرلىكپەن قازا تاپقانداردىڭ ەسىمدەرى ءبىز ءۇشىن قاسيەتتى دە قاستەرلى. ءوز ومىرلەرىن وتان ءۇشىن, دەمەك – ءبىزدىڭ ازاتتىعىمىز ءۇشىن قۇربان ەتكەندەردىڭ الدىندا وتەلمەستەي قارىزدارمىز. ءبىز الەمدى فاشيزمنەن قۇتقارىپ قالعان سولداتتار مەن تىل ەڭبەككەرلەرىنىڭ قاھارماندىعىن ۇمىتپايمىز. سوندىقتان دا ءوز وتانىنىڭ ازاتتىعى مەن تاۋەلسىزدىگى ءۇشىن قازا تاپقانداردى قاسيەتتەپ ەستە ساقتاۋعا, جاۋىنگەرلىك قورىمداردى, مەموريالدىق كەشەندەردى, ەسكەرتكىشتەر مەن وبەليسكتەردى, سونداي-اق پارتيزانداردىڭ, استىرتىن جۇمىس ىستەگەندەر مەن فاشيستىك لاگەرلەر تۇتقىندارىنىڭ مولالارىن ساقتاۋ جانە كۇتىپ ۇستاۋ جونىندە تۇراقتى قامقورلىق كورسەتۋگە; ۇلى وتان سوعىسى جىلدارىندا فاشيستىك باسقىنشىلاردىڭ قولىنان وپات بولعان جاۋىنگەرلەر مەن بەيبىت ازاماتتاردىڭ مۇردەلەرى قالدىقتارىن ىزدەستىرۋدى بەلسەندى جۇرگىزۋگە شاقىرامىز. ءبىز جەڭىستى وزىمىزدىكى جانە بوگدەنىكى دەپ بولمەيمىز, فاشيزمگە قارسىلىق كورسەتكەندەردىڭ ەرلىگىنە ارقاشان قۇرمەت ءبىلدىرەمىز. ءبىز انتيگيتلەرلىك كواليتسياداعى وداقتاستارىمىزدىڭ جەڭىسكە قوسقان ۇلەسىن, بىزگە كورسەتكەن كومەگىن ەستە ۇستايمىز. الايدا, بارىنشا اۋقىمدى جانە سايىپ كەلگەندە, باستى وقيعالار كەڭەس-گەرمان مايدانىندا بولدى. سوعىس جىلدارىندا ءبىزدىڭ ەلدەرىمىز ونداعان ميلليون ازاماتتارىنان ايىرىلدى. مايدان دالاسىندا قازا تاپقانداردىڭ اراسىندا بارلىق ۇلتتىڭ ادامدارى بار ەدى. ءبىزدىڭ مەملەكەتتەرىمىزدىڭ حالىقتارى جەڭىسكە جەتۋگە شەشۋشى ۇلەس قوسقانىن ەسكەرە وتىرىپ, ءبىز وسكەلەڭ ۇرپاقتىڭ بويىندا ورتاق قاھارماندىق تاريحىمىز جانە فاشيزممەن كۇرەستەگى ۇلى ەرلىگىمىز ءۇشىن ماقتانىش سەزىمىن تاربيەلەۋگە شاقىرامىز. حالىقارالىق قۇقىقتىڭ جالپىعا ورتاق قاعيداتتارى مەن نورمالارىن, بۇۇ جارعىسى مەن حەلسينكيدىڭ قورىتىندى اكتىسىنىڭ قاعيدالارىن جاقتايتىنىمىزدى قۋاتتاي وتىرىپ, ءبىز الەمدەگى قاۋىپسىزدىك پەن تۇراقتىلىقتى نىعايتۋدا بەلسەندى ءوزارا ىقپالداسۋعا, حالىقارالىق لاڭكەسشىلدىكپەن جانە ەكسترەميزممەن كۇرەستەگى كۇش-جىگەردى ارتتىرۋعا, قازىرگى بار قاقتىعىستاردى بەيبىت ساياسي رەتتەۋگە جانە مۇمكىن بولاتىن قاقتىعىستاردىڭ الدىن الۋعا شاقىرامىز.
