2021 جىلعى قازاندا قر ۇقك الماتى قالاسى بويىنشا دەپارتامەنتى الماتى قالاسى پروكۋراتۋراسىنىڭ ۇيلەستىرۋىمەن ءوڭىر اۋماعىندا سينتەتيكالىق ەسىرتكىلەردىڭ ءىرى پارتيالارىن ينتەرنەت-رەسۋرستار ارقىلى دايىنداۋعا جانە وتكىزۋگە قاتىسى بار 2 ەسىرتكى توبىنىڭ قىزمەتىن اشىپ, جولىن كەستى.
ءتىنتۋ ءىس-شارالارىن جۇرگىزۋ ناتيجەسىندە 4 كگ سينتەتيكالىق ەسىرتكى مەن ولاردىڭ 40 ليتر جارتىلاي فابريكاتى, 1 كگ گاشيش, 20 كگ-نان استام پرەكۋرسورلار مەن زەرتحانالىق جابدىقتار تابىلىپ, تاركىلەندى. قىلمىستىق تاۋار الەۋمەتتىك مەسسەندجەرلەر ارقىلى, جاسىرىن بەتبەلگىلەردى جۇزەگە اسىرۋ ارقىلى بايلانىسسىز تۇردە ساتىلعانى انىقتالدى.
اتالعان فاكتىلەر بويىنشا قر ۇقك الماتى قالاسى بويىنشا دەپارتامەنتى سوتقا دەيىنگى تەرگەپ-تەكسەرۋ ماتەريالدارىن قر قك 297-بابى 3-بولىگى بويىنشا سدتبت-عا تىركەدى.
قر ۇقك ءباسپاسوز قىزمەتى اتاپ وتكەندەي, ەسىرتكى قۇرالدارى مەن پرەكۋرسورلاردىڭ ءىرى پارتيالارىن الماتى قالاسىنىڭ «قارا بازارىنا» قولمەن دايىنداۋ مەن جەتكىزۋدىڭ ءوسۋى جالعاسۋدا. 2021 جىلدىڭ باسىنان بەرى ۇقك دەپارتامەنتى ەسىرتكى قۇرالدارىنىڭ زاڭسىز اينالىمىنىڭ 18 فاكتىسىنىڭ جولىن كەستى, سينتەتيكالىق ەسىرتكى ءوندىرۋ جونىندەگى 10 جاسىرىن ەسىرتكى زەرتحانالارىنىڭ قىزمەتىن جويدى. زاڭسىز اينالىمنان 255 كەلى ەسىرتكى تاركىلەندى. ەسىرتكى بيزنەسىمەن اينالىسقان 33 ادام ۇستالىپ, قىلمىستىق جاۋاپكەرشىلىككە تارتىلدى.
