ساۋدا جانە ينتەگراتسيا مينيسترلىگىنىڭ تۇتىنۋشىلاردىڭ قۇقىقتارىن قورعاۋ كوميتەتىنىڭ حابارلاۋىنشا, بيىل العاشقى التى ايدا مەملەكەتتىك ورگاندار ءوز قۇزىرەتى شەڭبەرىندە تۇتىنۋشىلاردىڭ تاراپىنان تۇسكەن 21 100 ءوتىنىشتى قاراعان. بۇل بىلتىرمەن سالىستىرعاندا 5 061-گە از. شاعىمداردىڭ باسىم بولىگى بولشەك ساۋدا تاۋارلارىنا تيەسىلى. ساۋدا جۇرگىزۋشىلەردىڭ كوبى ساپاسىز تاۋارلاردى ساتۋ بارىسىندا اقشانى قايتارۋدان باس تارتقان. ەلەكتروندى ساۋدا بولىگىندە وتىنىشتەر سانى 3,6 ەسە ارتقان.
«تالداۋعا سايكەس, تۇتىنۋشىلاردىڭ قۇقىقتارى كوبىنەسە مەديتسينالىق قىزمەتتەر سالاسىندا بۇزىلادى, وندا شاعىمداردىڭ سانى 72 پايىزعا ارتتى. ازاماتتاردىڭ نارازىلىعى دارىحانالارداعى ءدارى-دارمەك باعاسىنىڭ وسۋىنە, جەدەل مەديتسينالىق جاردەمدى ۇزاق كۇتۋگە, ەمحاناداعى كەزەكتەرگە, مەديتسينا ماماندارىنىڭ بىلىكتىلىگىنىڭ تومەندىگىنە بايلانىستى. بۇدان باسقا, دەنساۋلىق ساقتاۋ سالاسىنداعى ۋاكىلەتتى ورگان ءونىمنىڭ قاۋىپسىزدىگىنە مونيتورينگ جۇرگىزدى, ونىڭ بارىسىندا تاماق ونىمدەرىنىڭ 12 117 ۇلگىسى زەرتتەلدى, ونىڭ 1 376-سى بەلگىلەنگەن تالاپتارعا جاۋاپ بەرمەدى. سونداي-اق حالىقتان قارجى, كولىك قىزمەتتەرى, بايلانىس, تكش ساپالارىنا قاتىستى كوپتەگەن شاعىمدار كەلىپ ءتۇستى», دەلىنەدى مينيسترلىك حابارلاماسىندا.
ماسەلەن, قارجى سەكتورى بويىنشا نەگىزىنەن ەكىنشى دەڭگەيلى بانكتەردىڭ جانە بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمداردىڭ, ميكروقارجى, ساقتاندىرۋ ۇيىمدارىنىڭ قىزمەتىندەگى ماسەلەلەر بويىنشا شاعىمدار بولعان.
ال كولىك قىزمەتتەرى سالاسىندا وتىنىشتەر سانى 6 ەسە تومەندەگەن. بۇل ءبىرىنشى كەزەكتە پاندەمياداعى جولساپاردىڭ ازايۋىنا بايلانىستى. بايلانىس سالاسىندا دا وتىنىشتەر ستاتيستيكاسى تومەندەپتى. شاعىمداردىڭ نەگىزگى سەبەپتەرى – ينتەرنەتتىڭ ءالسىز ساپاسى, ءتاريفتى وزگەرتۋدىڭ قيىندىعى, اقشانى نەگىزسىز الۋ.
تۇرعىن ءۇي-كوممۋنالدىق شارۋاشىلىعى سالاسىنداعى شاعىمدار جىلۋمەن, ەنەرگيامەن جابدىقتاۋ بويىنشا ساپاسىز سەرۆيسكە, تاريفتەردىڭ شامادان تىس مولشەرىنە جانە كوممۋنالدىق قىزمەتتەرگە اقى تولەۋ بويىنشا نەگىزسىز ەسەپتەۋلەرگە, ەلەكتر ەنەرگياسىن ەسەپكە الۋ اسپاپتارىن زاڭسىز تەكسەرۋگە جانە اۋىستىرۋعا, ەلەكتر ەنەرگياسىن وشىرۋگە جانە باسقا دا كوپتەگەن پروبلەمالارعا بايلانىستى ەكەن. 2020 جىلى تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا الەۋمەتتىك ساۋالداما جۇرگىزىلدى, ونىڭ ناتيجەلەرى ازاماتتاردىڭ دەنساۋلىق ساقتاۋ جۇمىسىنا ەڭ كوپ نارازىلىعىن انىقتادى دەيدى مينيسترلىك.
«رەسپوندەنتتەردىڭ 45,9 پايىزى مەديتسينالىق قىزمەت كورسەتۋ ساپاسىن تەرىس باعالادى. بۇل قىزمەتتەرگە الماتى قالاسىنىڭ تۇرعىندارى – 65,5 پايىز, الماتى وبلىسى – 61,1 پايىز جانە شىعىس قازاقستان وبلىسى 60,0 پايىز قاناعاتتانبايدى. ەكىنشى ورىندا تەمىرجول كولىگى بولدى, وندا رەسپوندەنتتەردىڭ قاناعاتتانباۋ پايىزى 43,2 پايىزدى قۇرايدى. تەمىرجول قىزمەتتەرىنىڭ ساپاسىنا قاناعاتتانباعانداردىڭ باسىم بولىگى شىمكەنتتە – (51,4 پايىز), الماتىدا – (50,3 پايىز), الماتى وبلىسىندا (48,8 پايىز) تۇرادى. 42 پايىز تەرىس جاۋاپ العان قالاارالىق جانە اۆتوموبيل كولىگىنە دە قاتىستى. تۇتىنۋشىلار سوتقا جۇگىنبەستەن بۇرىن ءۇش ساتىلى تەتىكتىڭ العاشقى ەكى كەزەڭىنەن دايەكتى تۇردە وتۋگە مىندەتتى. ءبىرىنشى كەزەڭ – ساتۋشى جانە تۇتىنۋشىلىق داۋلاردى سوتقا دەيىن رەتتەۋ سۋبەكتىسى. ەكىنشى كەزەڭ – مەملەكەتتىك ورگان. 2021 جىلدىڭ 5 ايىندا تۇتىنۋشىلىق داۋلار بويىنشا سوتتارعا 916 تالاپ ارىز ءتۇستى. ونىڭ ىشىندە: 339 نەمەسە 37 پايىزى سوتقا دەيىنگى رەتتەۋگە ءبىرىنشى كەزەڭگە قايتارىلدى, 235 نەمەسە 26 پايىزى ۋاكىلەتتى ورگانعا جۇگىنۋ قاجەتتىلىگىنە سىلتەمە جاساي وتىرىپ قايتارىلدى» دەپ حابارلادى ۆەدومستۆو.
