بيىلعى جازدا اتالعان قاۋىمداستىق جۇمىس باعىتىن, كەڭەس مۇشەلەرىن قايتا قارادى. بۇرىن كەڭەس قۇرامىندا مەملەكەتتىك قىزمەتكەرلەر كوپ بولسا, قازىر وعان بيزنەس, باسقا دا الەۋمەتتىك سالا وكىلدەرى ەنىپ وتىر. ويتكەنى الداعى ۋاقىتتا بيزنەستى, ىسكەرلىكتى دامىتۋ قولعا الىنباق. جاڭا باعىتتىڭ ءبىر بەلگىسى بولار, «بولاشاق» وكىلدەرى قاۋىمداستىقتىڭ 20 جىلدىعى اياسىندا Alawwal Partners كومپانياسىمەن بىرلەسىپ, كاسىپكەرلەرگە ارنالعان رەسپۋبليكالىق بيزنەس-جوبالار بايقاۋىنىڭ بەسىنشى ماۋسىمىنىڭ باستالعانىن جاريالادى.
«بولاشاق» قاۋىمداستىعىنىڭ مۇشەسى, كومپانيانىڭ باسقارۋشى سەرىكتەسى قانىش تولەۋشين: «Startup Bolashaq رەسپۋبليكالىق بايقاۋى قازاقستاندىقتاردىڭ بيزنەس باستامالارىن قولداۋعا, سونداي-اق جۇمىسىن جاڭا باستاعان كاسىپكەرلەردىڭ ارماندارىن ورىنداۋعا دەگەن ىنتاسىن وياتۋعا جانە دامىتۋعا باعىتتالعان. بايقاۋعا قازاقستاننىڭ كەز كەلگەن ازاماتى قاتىسا الادى. وتىنىمدەر 22 قاڭتارعا دەيىن قابىلدانادى. جارتىلاي فيناليستەر الماتىداعى دەمالىس ايماعىندا جينالادى. وندا ءبىر اپتا بولادى. ولاردى قارجىلىق مودەلدەۋ, بيزنەس-جوسپارلاۋ, ينۆەستورلارمەن كەلىسسوزدەر جۇرگىزۋ بويىنشا ماماندار وقىتادى. ال دايىندىقتان سوڭ ءوز جوبالارىن «بيزنەس-پەرىشتەلەر» (جوبانى قولداۋشى نەمەسە ينۆەستور) الدىندا تانىستىرادى. ايتا كەتەيىك, جاس ەرەكشەلىكتەرى بويىنشا شەكتەۋلەر جوق. بايقاۋدىڭ «بيزنەس-پەرىشتەلەرى» جوبانىڭ 10 فيناليسىمەن پيتچ-سەسسيالار ۇيىمداستىرادى. ەڭ قىزىقتى يدەيالاردىڭ اۆتورلارى ينۆەستورلاردان ينۆەستيتسيا الادى», دەدى.
بايقاۋدىڭ قورىتىندىسى بويىنشا, سەرىكتەستەردەن بەرىلەتىن سالىم كولەمى 10 ملن تەڭگەدەن باستالادى. جوبالاردى قارجىلاي قولداۋشى نەمەسە ينۆەستورلاردىڭ ءبىرى – بەلگىلى جۋرناليست دينارا ءساتجان. ول بۇعان دەيىن جوبانىڭ باسىندا مەنتور بولعان. ونىڭ «شاكىرتى» 5 جىل بۇرىن ءبىرىنشى ماۋسىمنىڭ جەڭىمپازى اتاندى. مۇگەدەكتىگىنە قاراماستان, الاكولدە ەرەكشە قاجەتتىلىكتەرى بار ادامدار ءۇشىن دەمالىس ايماعىن اشۋ سياقتى ارمانىن جۇزەگە اسىرا الدى.
«زور الەۋەتى بار يدەيالار كوپ, بىراق ولاردى جۇزەگە اسىرۋ مۇمكىن ەمەس. ءبارىنىڭ دە بيزنەسپەن اينالىسقىسى كەلەدى, پاندەميا كەزىندە ءبىراز ادام بيزنەستىڭ ءتۇر-ءتۇرىن ۇيرەندى. مىنە, سونداي جاندارعا بايقاۋ رەسۋرستار ۇسىنادى. ينۆەستيتسيا كولەمى 10 ملن تەڭگەدەن باستالادى. مەنىڭ دە «بيزنەس-پەرىشتە» بولعىم كەلەدى, بىراق ءسان يندۋسترياسىندا. بەلسەندى ديزاينەرلەردىڭ, جاستاردىڭ قاتىسقانىن قالايمىن, قولداۋ كورسەتۋگە دايىنمىن. شاعىن بيزنەستە ايەلدەر كوپ. وتىنىمدەردىڭ 60%-ى ايەلدەردەن كەلىپ تۇسەدى دەپ ويلايمىن», دەدى د.ءساتجان.
Startup Bolashaq 5-ماۋسىمىنىڭ كونكۋرسىنا قاتىسۋعا وتىنىمدەردى قابىلداۋ 20 قاڭتارعا دەيىن جالعاسادى. قۇجاتتار www.startup-bolashaq.kz سايتىندا ونلاين تۇردە قابىلدانادى. جەڭىمپازداردىڭ ەسىمدەرى ءساۋىر ايىندا بەلگىلى بولادى.
