جوبا قاتىسۋشىلارى 6-18 اي ىشىندە سپورت, دارىن مەن داعدى, كىتاپ وقۋ, ۇلتتىق مۇرا, ەرىكتىلىك, تۋريستىك ساياحاتتار, ەڭبەك تاجىريبەسى سىندى 7 باعىت بويىنشا تاپسىرمالار ورىندايدى. جوبانىڭ ۇزدىك قاتىسۋشىلارى جوعارى وقۋ ورىندارىندا تەگىن وقۋعا مۇمكىندىك الادى.
جوبانىڭ بەلسەندى ەلوردالىق قاتىسۋشىلارى «ەلباسى مەدالىنىڭ» كوپتەگەن باعىتى مەن قۇندىلىعىن كورسەتەتىن «بارىنەن مىقتى» موتيۆاتسيالىق بەينەبايانىن دايىندادى. روليك بالالاردى ماقسات قويا بىلۋگە, وزىنە سەنىمدى ءارى بەلسەندى بولۋعا, سپورتپەن شۇعىلدانۋعا ۇندەيدى. جاستار ءاننىڭ ءسوزى مەن اۋەنىن جازىپ, ءبيىن دە ويلاپ تاپقان. «قازىرگى تاڭدا تابىسقا جەتۋ مەن ەلدىڭ دامۋىنا ۇلەس قوسۋ ءۇشىن بەينەباياندا كورسەتكەن تالاپتارعا سايكەس بولۋ كەرەك. بۇل تۋىندى – ەلدىڭ بولاشاعىنا نەگىزدەلگەن قۇندىلىقتاردى بەينەلەيتىن ءبىزدىڭ جانە مەملەكەت جەتىستىگىنىڭ كورىنىسى. سول سەبەپتى, شىعارماشىلىق جۇمىسىمىزدى قازاقستان تاۋەلسىزدىگىنىڭ 30 جىلدىعىنا ارنادىق», دەيدى جوباعا قاتىسۋشىلار.
جوبا باستالعانعا دەيىن قاتىسۋشىلار قولا, كۇمىس نەمەسە التىن دەڭگەيدى تاڭداپ, 6 ايدان 18 ايعا دەيىنگى باعدارلامانى باستاۋى كەرەك. بەلگىلەنگەن باعىت بويىنشا تاپسىرمانى ورىنداپ, قاتىسۋشىلار اپتا سايىن ەسەپتى سايتقا جۇكتەيدى, ال ونى تالىمگەر تەكسەرەدى.
«ەلباسى مەدالى» جوباسىنا ەكى جىلدا ەلىمىزدىڭ ءار وڭىرىنەن 20 مىڭنان استام ادام قاتىستى. ەكى جىل ىشىندە ەلباسىنىڭ 4120 قولا جانە 8 كۇمىس مەدالى تابىس ەتىلدى. قازاقستان جوعارى وقۋ ورىندارىنا ءبىلىم گرانتتارىن تاعايىنداۋ كەزىندە مەدال يەگەرى ارتىقشىلىققا يە بولادى (ۇبت بالى تەڭ بولسا, ەلباسى مەدالىنىڭ يەسىنە باسىمدىق بەرىلەدى). مىسالى, 2021 جىلى 605 مەدال يەسى ءبىلىم گرانتىن الدى, ونىڭ 30%-دان استامى – اۋىل مەكتەبىنىڭ تۇلەكتەرى.
