قازاقستان • 28 قازان، 2021

ءتىل – ۇلتتىڭ ۇياتى

49 رەت كورسەتىلدى

قازىرگى ۋاقىتتا قازاق ءتىلى عىلىم مەن ءبىلىمنىڭ تىلىنە اينالىپ كەلەدى. كۇننەن كۇنگە مارتەبەسى ارتپاسا كەمىگەن ەمەس. ارينە، زامان اعىمىنا قاراي وزگە تىلدەردى دە بىلگەن ابزال. ايتسە دە، انا ءتىلىمىزدىڭ ابىرويىنا نۇقسان كەلتىرىپ المايىق.

تامىرى تەرەڭدە جاتقان قازاق ەلىنىڭ ءتىل مادەنيەتىن دامىتۋعا، ونى دارىپتەۋگە، قۇرمەتتەۋگە دەگەن كوزقاراسى كۇن وتكەن سايىن ارتۋدا. بۇعان دالەل – قوعامىمىزداعى مەم­لە­كەتتىك تىلگە دەگەن سۇرانىستىڭ بىر­تىندەپ ءوسىپ كەلە جاتقانى. انا ءتىلىمىز مەملەكەتتىك ءتىل دەڭگەيىنە كوتەرىلىپ قانا قويماي، مەملەكەت پەن قوعامدى ۇيىمداستىرۋشى، بىرىكتىرۋشى كۇش­تەردىڭ بىرىنە اينالدى.

تاۋەلسىزدىككە قول جەتكىزگەلى قازاق ءتىلى – مادەني، عىلىمي، پۋبلي­تسيستي­كا، رەسمي ءىس-قاعازدار ءتىلى بولىپ سانالادى. سونداي-اق مەملەكەتىمىزدى وركەندەتۋگە سەبەپشى بولاتىن قۋاتتى كۇش، حالقىمىزدىڭ مادەني دارەجەسىن كوتەرۋشى پارمەندى قۇرال.

تۋعان ءتىلىنىڭ تاعدىرى ءۇشىن تار­تىس­قا تۇسپەگەن ۇلت جوق، سەبەبى ءتىل – ۇلت­تىڭ جانى، بويىنداعى رۋحى. سون­دىقتان ءاربىر ازامات انا ءتىلىن جەتىمسىرەتپەي، بوساعادان تورگە، تومەن­نەن بيىككە كوتەرۋگە ءتيىس. ۇرپاقتان ۇرپاققا، اتادان بالاعا جەتكەن باعا جەتپەس مۇرانى قاستەرلەۋىمىز قاجەت.

جالپى، ۇلت ءۇشىن تىلىنەن قىمبات نارسە بولماۋعا ءتيىستى. ءبىر ۇلتتىڭ تىلىندە سول ۇلتتىڭ سىرى، تاريحى، تۇرمىسى، مىنەزى ايناداي كورىنىپ تۇرادى. قازاق حالقىنىڭ تىرشىلىگى­نىڭ تىرەگى بولعان قازاق ءتىلى، تالاي عا­سىرلاردى باسىنان كەشىردى، تاريح تەزىنە دە توتەپ بەردى. اتا-بابامىز ات­تىڭ جالىندا، اتاننىڭ قومىندا ءجۇرىپ قورعاپ، شۇرايلى دا كورىكتى، وتكىر قالپىندا كەيىنگى ۇرپاعىنا امانات­ ەتە ءبىلدى.

اتادان بالاعا مۇرا بولىپ كەلە جاتقان انا ءتىلىمىزدى ساقتاپ، كەلەر ۇرپاققا جەتكىزۋ باعىتىندا مەم­لەكەتتىك ۇجىمداردا، مەكەمەلەردە ءتىلدىڭ زاڭدى مارتەبەسىن كوتەرۋىمىز قاجەت. جاستاردىڭ ادەبيەتىن، مادە­نيەتىن ناسيحاتتاۋ، وقىپ-ۇيرەنۋگە دەگەن ىقىلاسىن ارتتىرۋ باعىتىندا جۇ­مىستار العا قويىلۋى شارت. سول كەزدە عانا تۋعان ءتىلىمىز ماڭگىلىك ەلمەن بىرگە ماڭگىلىك ءومىر سۇرەرى انىق.

 

قاناتبەك دوسىمبەك،

№8 ورتا مەكتەپتىڭ قازاق ءتىلى مەن ادەبيەتى پاندەرىنىڭ مۇعالىمى

 

الماتى وبلىسى،

تەكەلى قالاسى

سوڭعى جاڭالىقتار

ۇقساس جاڭالىقتار