شاراينا
وڭتۇستىك سۋدان كوتەرىلىسشىلەرى كەشە مالاكال قالاسىنا شابۋىل جاسادى. اتالعان قالا مۇناي وندىرەتىن ءوڭىردىڭ استاناسى سانالادى. بۇعان دەيىن دە مالاكال كوتەرىلىسشىلەر مەن ۇكىمەت اسكەرلەرىنىڭ قاقتىعىس الاڭىنا اينالعان ەدى.
وتكەن جىلدىڭ جەلتوقسان ايىندا قالانى جەرگىلىكتى بيلىككە قارسىلار باسىپ الىپ, ونى ءبىر اي شاماسىندا ءوز باقىلاۋلارىندا ۇستاعان بولاتىن. ال وسى جولعى شابۋىل ۇستىمىزدەگى جىلدىڭ 23 قاڭتارىندا ەكىجاقتى كەلىسىم جاسالعاننان كەيىنگى العاشقىسى بولىپ وتىر. ءتۇيىپ ايتقاندا, جانجالداسۋشى جاقتار ءوزارا كەلىسىمدى بۇزىپ, ءبىر-بىرىنە قارۋ كەزەنۋدى جالعاستىرۋدا. وڭتۇستىك سۋدانداعى قارۋلى قاقتىعىس ءىس باسىنداعى پرەزيدەنت سالۆا كير بۇرىنعى ۆيتسە-پرەزيدەنت ريەك ماچاردى مەملەكەتتىك توڭكەرىسكە دايىندىق جاسادى دەپ ايىپتاعاننان كەيىن باستالعان بولاتىن.
وزىنە ءوزى نەگە وت قويدى ەكەن؟
يراننىڭ مۇناي مينيسترلىگىندە ەر ادام وزىنە-ءوزى وت قويدى. ول وسى مەكەمەدە جۇمىس ىستەيتىن 58 جاستاعى قىزمەتكەر كورىنەدى. وقيعا مينيسترلىك عيماراتىن يران پرەزيدەنتى حاسان رۋحاني تاستاپ شىققاننان كەيىن ورىن العان.
ەل پرەزيدەنتى مۇناي مينيسترلىگىنە كۇتپەگەن جەردەن ساپارمەن كەلسە كەرەك. بىراق بۇل ەكى وقيعانىڭ اراسىندا ەشقانداي بايلانىس جوق دەلىنىپ وتىر. ال زارداپ شەگۋشى شۇعىل اۋرۋحاناعا جەتكىزىلىپتى. ونىڭ دەنەسىنىڭ 55 پايىزىن كۇيىك شالعان. مۇناي ساتۋ يران بايلىعىنىڭ نەگىزگى كوزى بولىپ تابىلاتىنى بەلگىلى.
نارازىلىق شارالارى جالعاسۋدا
ۋكراينادا بيلىك پەن وپپوزيتسيا اراسىنداعى قارسى تۇرۋشىلىق جالعاسىپ جاتىر. ونىڭ سوڭىنا قاشان نۇكتە قويىلاتىنى بەلگىسىز. ماسەلەن, ەل استاناسى – كيەۆ قالاسىنىڭ ورتالىعىنا وتۋگە توسقاۋىل رەتىندە قويىلعان ەكى «كاماز» جۇك كولىگىنە وت قويىلعان.
ارتىنشا-اق «كاماز-دار» ورتەلگەن شەلكوۆيچنايا كوشەسىن قارا ءتۇتىن الىپ كەتكەن. وسى ارالىقتا ميتينگكە شىعۋشىلار مەن ميليتسيونەرلەر اراسىنداعى قاقتىعىس جالعاسىپ جاتقان. بيلىك قاماۋعا الىنعان وپپوزيتسيونەرلەردى تولىقتاي بوساتۋ تۋرالى زاڭ قابىلداعانىمەن, قوس تاراپ ونىڭ تولىقتاي ورىندالاتىنىنا كۇمانمەن قارايدى. قازىرگى كەزدە وپپوزيتسيانىڭ ەۋرووداققا قارجىلاي كومەك سۇراپ قول جايعانى دا بەلگىلى بولىپ وتىر.
قىسقا قايىرىپ ايتقاندا:
يراكتىڭ استاناسى – باعدات قالاسىندا قاتارىنان بىرنەشە لاڭكەستىك اكتىلەر جاسالدى. لاڭكەستىكتەر شيتتەر شوعىرلانعان اۋدانداردا ۇيىمداستىرىلعان. قازا تاپقاندار قاتارى قالىڭ. «انسار بەيت ءال-ماكديس» يسلامشىل توبى مىسىردا وڭتۇستىككورەيالىق تۋريستەر مىنگەن اۆتوبۋستا جاسالعان جارىلىسقا جاۋاپكەرشىلىكتى ءوز مويىندارىنا الدى. جارىلىس سالدارىنان ءۇش ادام قازا تاپقان بولاتىن. اۆستراليانىڭ پاپۋا اۋماعىنداعى مانۋس ارالىنا ورنالاستىرىلعان بوسقىندار ۇستالاتىن لاگەردە تارتىپسىزدىك ورىن الدى. تولقۋ كەزىندە ءبىر ادام ءولىپ, سەكسەنگە جۋىعى جارالانعان. بوسقىندار ەل اۋماعىنا زاڭسىز كەلگەندەر بولىپ تابىلادى. «بايقوڭىر» كوسمودرومىنىڭ باسشىسى ەۆگەني انيسيموۆ وتستاۆكاعا كەتتى. ول بۇل لاۋازىمدى ورىنتاقتا 2009 جىلدان بەرى وتىرعان ەدى. ءتۇرلى قاۋەسەتتەر ايتىلعانىمەن, وتستاۆكانىڭ ناقتى سەبەبى بەلگىسىز. رەسەي جانە ەستونيا سىرتقى ىستەر مينيسترلەرى سەرگەي لاۆروۆ پەن ۋرماس پاەت ەكى ەل اراسىنداعى شەكارا تۋرالى كەلىسىمگە قول قويدى. وعان سايكەس, ەكى ەلدىڭ كسرو كەزىندەگى شەكاراسى وزگەرمەيتىن بولدى. ەلشىسىن كەرى شاقىرىپ الدى يتاليا ۇكىمەتى كەشە يتاليالىق اسكەري تەڭىزشىلەردىڭ ەكى ۇندىلىك بالىقشىنى اتىپ ولتىرۋىنە بايلانىستى جاڭا پروتسەسسۋالدىق ءۇزىلىس پايدا بولۋىنا وراي نارازىلىق بەلگىسى رەتىندە ءوزىنىڭ ۇندىستانداعى ەلشىسىن كەرى شاقىرىپ الدى.
«ەلشى دانيەل مانچيني نيۋ-دەليدى شۇعىل تاستاپ شىعادى», – دەپ مالىمدەدى يتاليا سىرتقى ىستەر مينيسترلىگىنىڭ وكىلى. ونىڭ سوزىنە قاراعاندا, پروتسەستى ءۇندىستان جوعارعى سوتىنىڭ كەزەكتى رەت سوزۋى ءتوزىمدى تاۋىساتىن جايت بولىپ تابىلادى. مۇندايعا جول بەرۋگە بولمايدى. يتاليالىق اسكەري تەڭىزشىلەر 2012 جىلدىڭ 15 اقپانىندا بالىقشىلاردى پيراتتارعا بالاپ, اتىپ ولتىرگەن ەدى.
قايعىلى اياقتالعان كونتسەرت
وڭتۇستىك كورەيانىڭ كيوندجۋ قالاسىنداعى كۋرورتتىق كەشەن عيماراتىنىڭ قۇلاۋى كەزىندە قۇربان بولعاندار سانى 10 ادامنان اسىپ جىعىلادى. عيمارات قۇلاپ تۇسكەن كەزدە ونىڭ ىشىندە شامامەن ءبىرىنشى كۋرستىڭ 500 ستۋدەنتى بولعان.
قايعىلى وقيعاعا وتكەن اپتادا وسى وڭىرگە قاردىڭ ادەتتەن تىس كوپ جاۋعانى سەبەپ بولدى دەلىنىپ وتىر. سالماقتى كوتەرە الماعان عيمارات قۇلاپ تۇسكەن. سوڭعى مالىمەت بويىنشا, 73 ادام ءتۇرلى دەڭگەيدە دەنە جاراقاتىن العان. ارالارىندا حال ۇستىندە جاتقاندارى دا بار دەلىنۋدە. وسى سەبەپتى قۇرباندار سانى ايتارلىقتاي ارتۋى ىقتيمال.
جازا جەڭىلدەدى مە, الدە...
ءۇندىستاننىڭ جوعارعى سوتى ساياساتكەر رادجيۆ گانديدىڭ ولىمىنە قاتىسى بار دەپ ءولىم جازاسىنا كەسىلگەن ءۇش سوتتالۋشىنىڭ جازاسىن ءومىر بويى تۇرمەدە وتىرۋ جازاسىمەن الماستىردى.
ولار «تاميل يلامانى ازات ەتۋ جولبارىستارى» دەگەن قوزعالىستىڭ بەلسەندى مۇشەلەرى بولىپ تابىلادى. جەرگىلىكتى اقپارات اگەنتتىكتەرىنىڭ حابارلاۋىنشا, ەندى ەلدىڭ وڭتۇستىگىندەگى تاميلناد شتاتىنىڭ بيلىگى ولارعا راقىمشىلىق جاساۋعا قۇقىلى. قىلمىستىق ءىستى قايتا قاراۋعا قول جەتكىزگەن ادۆوكاتتار اتالعان ۇشەۋدىڭ 20 جىلدان استام ۋاقىتتان بەرى تۇرمەدە وتىرعاندارىن العا تارتقان. ولاردىڭ پىكىرىنشە, وسىنشا جىل تۇرمەدە وتىرعان ولارعا قاتىستى ءولىم جازاسىن ورىنداۋ ادامگەرشىلىككە جاتپايدى.
ينتەرنەت ماتەريالدارى نەگىزىندە ازىرلەندى.
