كيەۆتەن كەلگەن ارنايى بورت قر قورعانىس مينيسترلىگى 19232 اسكەري بولىمىنە كەشكى ساعات 19:00-دە كەلىپ قوندى. قازاقستاندىق ساربازدىڭ قۇرمەتىنە وراي قۇرمەت قاراۋىل روتاسى ساپ تۇزەپ, اسكەري وركەستر ەلىمىزدىڭ ءانۇرانىن ورىندادى. ەرلىك جولىندا قازا تاپقان جاۋىنگەردى قارسى الۋ سالتاناتىنا قورعانىس مينيسترلىگى, ۇلتتىق ۇلان ساردارلارى, «اتامنىڭ اماناتى» قوعامدىق بىرلەستىگى جانە اسكەري ءبولىم باسشىلىعى مەن جەكە قۇرامى قاتىستى.
«اتامنىڭ اماناتى» قوعامدىق بىرلەستىگى الەمدىك پاندەمياعا قاراماستان بيىل توعىز وتانداسىمىزدىڭ سۇيەگىن تۋعان جەرىنە الىپ كەلۋدى ىسكە اسىردى.
«ۋكراينادان ۇلى وتان سوعىسىندا قازا تاپقان قازاقستاندىق ساربازدىڭ سۇيەگىن العاش رەت جەتكىزىپ وتىرمىز. وسى يگىلىكتى ىسكە كومەكتەسكەن «پلاتسدارم» ىزدەۋ توبىنا اعىسىمىزدى بىلدىرەمىز. ولار ساربازدىڭ سۇيەگىن تاۋىپ, اتى-ءجونىن انىقتاپ, كوپ جۇمىس اتقاردى. سونداي-اق, قازاقستان رەسپۋبليكاسىنىڭ ۋكرايناداعى ەلشىلىگىنە, ۇشاقپەن كومەكتەسكەن ۇلتتىق ۇلان باسشىلىعىنا, جاۋىنگەردىڭ سۇيەگىن سالتاناتتى تۇردە قارسى الۋعا اتسالىسقان قورعانىس مينيسترلىگىنە ۇلكەن العىس ايتامىز. بۇل جۇمىس ەرلىك تۋرالى ەستەلىكتەردى ساقتاۋعا, ۇرپاق تاربيەسىنە وتە قاجەت دەپ بىلەمىز», دەدى «اتامنىڭ اماناتى» قوعامدىق بىرلەستىگى باسقارماسىنىڭ توراعاسى مۇرات مولداعاليەۆ.
قازاقستاندىق سارباز وكسىكباي بوزارباەۆ قان مايدانعا تۇركىستان وبلىسى العاباس اۋىلىنان اتتانعان. ستالينگراد شايقاسىندا ەرلىك كورسەتىپ, بىرنەشە مارتە جاراقات الىپ, بىرقاتار مەدالدارمەن ماراپاتتالعان. ول ۋكراينا ەلىنىڭ دونەتسك وڭىرىندە ورىن العان شايقاستا ەرلىكپەن قازا تاپتى. العاباس اۋىلىندا وكسىكباەۆتان تاراعان نەمەرەلەرى تۇرادى. مۇرات جاناتاي ۇلىنىڭ ايتۋىنشا, قازاقستاندىق جاۋىنگەردى قورعانىس مينيسترلىگىنىڭ ارنايى بورتىمەن تۋعان اۋىلىنا جەتكىزۋ جوسپارلانعان. ساربازدى تۋعان ۇرپاقتارى, تۇركىستان وبلىستىق اكىمدىگى مەن قوعامدىق ۇيىمدار وكىلدەرى قارسى الىپ, تۋعان جەردىڭ توپىراعىنا تاپسىرادى.
