«اسسوتسياتسيانىڭ ماقساتى – شەتەلدەگى قانداستاردىڭ باسىن بىرىكتىرۋ. وسى ورايدا باق-تىڭ دا ءرولى ەرەكشە. بىزدەگى مالىمەت بويىنشا, الەم ەلدەرىندە 88 قازاقتىلدى باق جۇمىس ىستەپ جاتىر. اسسوتسياتسيا قۇرۋداعى ماقسات – قازاقشا باق-تىڭ اياسىن كەڭەيتۋ, شەتەلدەگى قانداستارىمىزعا انا تىلىندە اقپارات الۋىنا مۇمكىندىك جاساۋ. سونىمەن قاتار جالپى قازاق ءتىلىن دارىپتەۋ. اسسوتسياتسيانى قۇرۋدىڭ ارقاسىندا سىرتتاعى باۋىرلارىمىز ەلدە بولىپ جاتقان جاڭالىقتاردان تىكەلەي حاباردار بولىپ وتىرادى. ياعني قازاقستانداعى حابارلاردى شەتەلگە جەتكىزۋ, تيىسىنشە شەتەلدەگى قانداستاردىڭ تىنىس-تىرشىلىگىمەن قازاقستاندىقتاردى تانىستىرۋ», دەدى «وتانداستار قورى» كەاق ۆيتسە-پرەزيدەنتى ماعاۋيا سارباسوۆ.
ونىڭ ايتۋىنشا, الداعى ۋاقىتتا شەتەلدەگى باق قاۋىمداستىعىنىڭ جۇمىس جوسپارى بەكىتىلەدى.
«اسسوتسياتسيا قۇرامىنا وتاندىق جانە شەتەلدىك باق وكىلدەرىن مۇشە ەتىپ قابىلدايمىز. سول ارقىلى بىرلەسكەن بىرقاتار شارا ۇيىمداستىرۋ ويىمىزدا بار. بۇل - وتاندىق باق پەن شەتەلدەگى قازاق ءتىلدى باق-تىڭ ەكىجاقتى قارىم-قاتىناسىن نىعايتا تۇسسەك دەگەن نيەت. مىسالى, وتكەن جىلى موڭعولياداعى «Kaznews» اقپارات پورتالىنىڭ ءتىلشىسى «ۇركەر» سىيلىعىن جەڭىپ الدى. بۇل - وتە قۋانتارلىق جاعداي. مىنە, وسى باعىتتاعى جۇمىستى جالعاستىرۋىمىز كەرەك», دەيدى ول.
