مەديتسينا • 27 قازان، 2021

QazVac ۆاكتسيناسىن جاساۋشىلارعا مەملەكەتتىك سىيلىق بەرىلەدى

بعم «قر ءال-فارابي اتىنداعى عىلىم مەن تەحنيكا سالاسىنداعى 2021 جىلعى قازاقستان رەسپۋبليكاسىنىڭ مەملەكەتتىك سىيلىعىن بەرۋ تۋرالى» قر پرەزيدەنتى جارلىعىنىڭ جوباسىن دايىندادى، دەپ حابارلايدى Egemen.kz.

بوتاكوز باقبەرگەن

قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى ەكى مەملەكەتتىك سىيلىق بەرىلەدى:

«روزەوفۋنگين-اس» جاڭا وتاندىق بىرەگەي دارىلىك پرەپاراتىن ازىرلەۋ جانە ءوندىرۋدى ۇيىمداستىرۋ» تاقىرىبىنداعى جۇمىسى ءۇشىن،
«قازاقستان رەسپۋبليكاسىنىڭ بيولوگيالىق قاۋىپسىزدىگىن قامتاماسىز ەتۋ: وزىق عىلىمي تەحنولوگيالار جانە ءوندىرىس» تاقىرىبىنداعى جۇمىستار تسيكلى ءۇشىن.

بعم تۇسىندىرمە جازباسىنا سايكەس، 2021 جىلعا ارنالعان «مەملەكەتتىك سىيلىقتار مەن ستيپەنديالار» بيۋدجەتتىك باعدارلاماسى بويىنشا ءال-فارابي اتىنداعى عىلىم مەن تەحنيكا سالاسىنداعى قر مەملەكەتتىك سىيلىعىنىڭ سوماسى 37 200 000 تەڭگەنى قۇرايدى. ەكى ۇجىم 18 600 000 تەڭگەدەن سىياقى الادى.

جارلىق جوباسى 5 قاراشاعا دەيىن «اشىق نقا» سايتىندا جاريا تالقىلاۋ ءۇشىن ورنالاستىرىلعان.

«ميكروبيولوگيا جانە ۆيرۋسولوگيا عىلىمي-وندىرىستىك ورتالىعى» ينستيتۋت قىزمەتكەرلەرى ازىرلەگەن بيوپرەپاراتتاردىڭ 7 ءتۇرىن شىعارادى، ونىڭ ىشىندە «روزەوفۋنگين-اس» – بۇل وتاندىق پرودۋتسەنت نەگىزىندە الىنعان، زەڭگە قارسى جانە ۆيرۋسقا قارسى بەلسەندىلىگى جوعارى العاشقى بىرەگەي ءجۇز پايىز وتاندىق پرەپارات. ينستيتۋت زاۋىتىندا ميكروورگانيزمدى ءوسىرۋ ءۇشىن قورەكتىك ورتا دايىنداۋدان باستاپ پرەپارات الۋعا جانە تۋباعا جاقپا وراۋعا دەيىنگى بۇكىل ءوندىرىس تىزبەگى ىسكە قوسىلدى.

«بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى» حالىقتى ۆاكتسيناتسيالاۋدا بەلسەندى قولدانىلاتىن QazVac كوروناۆيرۋستىق ينفەكتسياسىنا قارسى وتاندىق ۆاكتسينانى ازىرلەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز