جىل سايىن ينۆەستيتسيا سالۋ نارىعىندا ءتۇرلى جاڭالىقتار مەن جاڭاشىلدىقتار پايدا بولىپ جاتىر. ەگەر وسىدان ون جىل بۇرىن عانا ازاماتتار تابىسىنان ارتىلعان ازىن-اۋلاق اقشاسىن نە ۇيدە ساقتاپ, نە دەپوزيتتە جيناپ قانا امالداسا, قازىر ينۆەستيتسيا جاساپ, ءوز كاپيتالدارىن ەسەلەۋدىڭ دە جولىن تابا باستاعان. ەكىنشى دەڭگەيلى بانكتەردەگى دەپوزيت جوبالارىنان بولەك, قۇندى قاعازدار نارىعىندا بەلسەندى جۇمىس ىستەيتىن بروكەرلىك جانە ساقتاندىرۋ, سونداي-اق اكتيۆتەردى باسقارۋ كومپانيالارى ينۆەستيتسيالاۋعا ارنالعان ونىمدەردى ۇسىنۋعا كوشتى.
قازاقستان قۇندى قاعازداردىڭ ورتالىق دەپوزيتاريى تاراتقان اقپار بويىنشا, قازىردىڭ وزىندە ەلىمىزدە جەكە تۇلعالار اشقان 196,6 مىڭ دەربەس شوت تىركەلگەن. جىل باسىنان بەرى ولاردىڭ سانى 52,1 پايىزعا نەمەسە 67,4 مىڭعا كوبەيگەن. Finprom-نىڭ حابارلاۋىنشا, جۇمىسپەن قامتىلعان ازاماتتاردىڭ 2,2 پايىزى قۇندى قاعازدار نارىعىنداعى وپەراتسيالارعا دايىن نەمەسە قازىردىڭ وزىندە قاتىسىپ جاتىر.
جەكە تۇلعالار ءۇشىن بۇل سەگمەنتتەگى تانىمال قۇرالداردىڭ ءبىرى – جارنالىق ينۆەستيتسيالىق قورلار. وندا ۇجىمدىق قارجى سالۋ فورماسى دا قاراستىرىلعان. قور كليەنتتەرىنىڭ قارجىسى باسقارۋشى كومپانيانىڭ سەنىمگەرلىك باسقارۋىنا بەرىلەدى. باسقارۋشى كومپانيانى تاڭداۋ كەزىندە اسا مۇقيات بولعان ءجون: قازىر ەلىمىزدە قارجىلىق قاداعالاۋشىدان ليتسەنزيا الماي جۇمىس ىستەپ جاتقان بىرنەشە كومپانيا بار. وزدەرىن باسقارۋشى كومپانيا دەپ جارنامالايتىن قارجى پيراميدالارى دا كوپ. سوعان بايلانىستى جاقىندا قارجى نارىعىن رەتتەۋ جانە دامىتۋ اگەنتتىگى نارىقتا زاڭسىز قىزمەت ەتىپ جۇرگەن كومپانيالار ءتىزىمىن جاريا ەتتى. تىزىمگە جالپى 121 سۋبەكت ەنگىزىلگەن. ونىڭ 56-سىندا قارجى پيراميداسىنىڭ بەلگىلەرى بار بولسا, 65-ءى – زاڭسىز ينۆەستيتسيالىق دەلدال (جالعان بروكەرلەر) قىزمەتىن اتقارعان. سوندىقتان باسقارۋشى كومپانيا تاڭداۋ كەزىندە اداسپاۋ كەرەك. ماسەلەن, نارىقتا تانىمال, سەنىمدى كومپانيا رەتىندە قالىپتاسقان ۇيىمدارعا ازاماتتاردىڭ كوبى زەينەتاقى جيناعىنداعى ارتىق قارجىسىن بەرىپ جاتىر.
بيىلعى 1 قىركۇيەكتەگى جاعداي بويىنشا ينۆەستيتسيالىق قورلاردىڭ اشىق جانە ينتەرۆالدىق اكتيۆتەرى جىل باسىنان بەرى 38,9 پايىزعا كوبەيىپ, 124,9 ملرد تەڭگەنى قۇراعان. جارنالىق ينۆەستيتسيالىق قورلار اكتيۆتەرىنىڭ كوپ سوماسى Halyk Finance-قا تيەسىلى – 53,5 ملرد تەڭگە. بۇل بىلتىرمەن سالىستىرعاندا ەكى ەسە جوعارى كورسەتكىش. قازىر كومپانيا 4 ۆاليۋتالىق جارنالىق ينۆەستيتسيالىق قورعا باسشىلىق ەتەدى. ونىڭ ىشىندە ەڭ ءىرىسى – Halyk — ۆاليۋتنىي قورى. اكتيۆتەر سوماسى 41,5 ملرد تەڭگەگە جەتكەن. ينۆەستيتسيالىق قورلاردىڭ ەكىنشى ساتىسىندا BCC Invest تۇر: 52,9 ملرد تەڭگە. قازىر كومپانيا قاراماعىندا «تسەنتركرەديت – ۆاليۋتنىي» اتتى ينتەرۆالدىق ينۆەستيتسيالىق قور بار. ۇزدىك ۇشتىكتى 8,8 ملرد تەڭگەمەن Jusan Invest تۇيىندەيدى.
ەگەر تازا اكتيۆتەر قۇنىنا ءمان بەرەر بولساق, 1 قازانداعى جاعداي بويىنشا نارىق ليدەرى رەتىندە Halyk Finance پەن BCC Invest كومپانيالارىن اتاي الامىز.
