ۇكىمەت • 27 قازان، 2021

ميلليوننان استام ادام جۇمىسپەن قامتىلادى

162 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميالىق جاعداي جانە حالىقتى جۇمىسپەن قامتۋ شارالارى قارالدى.

سىرقاتتانۋ 4،5 ەسە تومەندەدى

ءبىرىنشى ماسەلە بويىنشا دەنساۋلىق ساقتاۋ ءمينيسترى الەكسەي تسوي، سولتۇستىك قازاقستان وبلىسىنىڭ اكىمى قۇمار اق­ساقالوۆ، اقمولا وبلىسىنىڭ اكىمى ەرمەك مارجىقپاەۆ، نۇر-سۇلتان قالاسىنىڭ اكىمى التاي كولگىنوۆ بايانداما جاسادى.

دەنساۋلىق ساقتاۋ ءمينيسترى ا.تسويدىڭ ايتۋىنشا، الەمدە كۆي-ءدىڭ 244 ملن-نان استام جاعدايى تىركەلگەن، تاۋلىگىنە 300 مىڭنان استام جاعداي تىركەلەدى. 4،9 ملن-نان استام ادام قايتىس بولدى. سوڭعى 14 كۇندە اۋرۋدىڭ ەڭ كوپ ءوسىمى پولشادا تىركەلدى، وندا 160%-دان استام، ۆەنگريادا – 120%، گرۋزيادا – 110%، ازەربايجاندا – 104%-عا ءوستى.

اۋرۋدىڭ ءوسۋى 19 ەلدە، سونىڭ ىشىندە يزرايلدە 58%-عا، يسپانيادا 28%-عا، شۆەيتساريادا 16%-عا، چەرنوگوريادا 4%-عا، يتاليادا 3%-عا تومەندەدى.

قازاقستاندا سوڭعى ەكى اپتادا سىر­قات­تانۋ 11%-عا تومەندەدى. «بۇگىنگى تاڭدا جاسىل ايماقتا 8 ءوڭىر بار: جامبىل، ماڭعىستاۋ، تۇركىستان، اقتوبە، باتىس قازاق­ستان، اتىراۋ، الماتى وبلىستارى جانە شىمكەنت قالاسى. 5 ءوڭىر «سارى ايماقتا» – شىعىس قازاقستان، قىزىلوردا، قاراعاندى وبلىستارى، الماتى جانە نۇر-سۇلتان قالالارى. «قىزىل ايماقتا» 4 ءوڭىر – اقمولا، قوستاناي، پاۆلودار جانە سولتۇستىك قازاقستان وبلىستارى تۇر. رەپرودۋكتيۆتى سانى – 0،96»، دەدى ا.تسوي.

جالپى، قازاقستاندا سوڭعى ەكى ايدا اۋرۋشاڭدىق 4،5 ەسەگە، ال ءولىم-ءجىتىم 4،8 ەسە­گە تومەندەدى. قازاقستان بويىنشا 1 تا­مىزدان باستاپ ينفەكتسيالىق توسەك­تەردىڭ جۇكتەلۋى 56%-دان 37%-عا دەيىن، رەانيماتسيالىق توسەكتەر 45-تەن 30%-عا دەيىن تومەندەگەنى بايقالادى. رەزەرۆ­تە 30 مىڭنان استام ورىن بار. «ەپيدەميالىق جاعدايدىڭ تۇراقتانۋىنا بايلانىستى ۋاقىتشا ينفەكتسيالىق نىسانداردى جابۋ جۇمىستارى جالعاسۋدا. بيىلعى 25 تامىز بەن 18 قازان ارالىعىندا بارلىق وڭىردە 103 نىسان جابىلدى» دەپ اتاپ ءوتتى دەنساۋلىق ساقتاۋ ءمينيسترى.

حالىقتى كۆي-گە قارسى ۆاكتسينالاۋ جۇمىستارى جالعاسۋدا. ايتا كەتۋ كەرەك، مينيسترلىك الداعى 3 ايعا ارنالعان كورو­ناۆيرۋس ينفەكتسياسى بويىنشا ەپيدەميالىق احۋال بولجامىن جاڭارتتى. ماسەلەن، پەسسيميستىك ستسەناري ورىن العان كەزدە تىركەلگەن جاعدايلاردىڭ ورتاشا تاۋلىكتىك سانى قاراشا ايىندا
1 800-گە دەيىن، جەلتوقساندا 2 350-گە دەيىن جەتەدى. ناقتى ستسەناري بويىنشا قاراشا ايىندا 1 650 جاعدايعا دەيىن، جەلتوقساندا
1 600 جاعدايعا دەيىن تىركەلەدى. وپتيميستىك ستسەناري بويىنشا قاراشادا 1 500 جاع­دايعا دەيىن، جەلتوقساندا تاۋلىگىنە 1 100 جاعدايعا دەيىن تىركەلمەك.

دەنساۋلىق ساقتاۋ مينيسترلىگى جەر­گى­لىكتى اتقارۋشى ورگاندارمەن بىرلەسىپ، كۆي بويىنشا پروفيلاكتيكالىق جانە ەپي­دەمياعا قارسى شارالاردى مونيتورينگ­تەۋدى جانە ىسكە اسىرۋدى جالعاستىرۋدا.

ماسەلەنى ۇكىمەت باسشىسى اسقار ما­مين قو­رىتىندىلادى. ونىڭ ايتۋىن­شا، قازاق­ستانداعى سانيتارلىق-ەپيدە­ميا­لىق جاعداي باقىلاۋعا الىنعان. ۆي­رۋستىڭ رەپرودۋكتيۆتى يندەكسى – 0،96. ينفەكتسيالىق ورىندار جۇكتەمەسى – 37%، رەانيماتسيالىق ورىن 30%-دى قۇراپ وتىر. سالىستىرمالى تۇردە جاعداي جامان ەمەس.

كورشى ەلدەردەگى سانيتارلىق-ەپيدە­ميالىق جاعدايدىڭ كۇردەلەنۋىنە بايلانىستى ۇكىمەت باسشىسى دەنساۋلىق ساقتاۋ مينيسترلىگىنە مەملەكەتتىك شە­كا­­راداعى ەپيدەميالىق باقىلاۋدى كۇ­شەي­­تۋدى تاپسىردى. اسىرەسە شەكارا ما­­ڭىنداعى وڭىرلەردىڭ اكىمدەرىنە ساني­تارلىق-ەپي­دە­ميالىق نورمالاردىڭ قاتاڭ ساقتالۋىن قام­­تاماسىز ەتۋ، سىرقات­تانۋشىلىق دەڭ­گەيىنە مونيتورينگ جۇرگىزۋ جانە جەدەل شا­رالار قابىلداۋ، سونداي-اق موني­تو­رينگ­تىك توپتاردىڭ جۇمىسىن جانداندىرۋ تاپسىرىلدى.

ماڭعىستاۋ، باتىس قازاقستان، قوستاناي، اق­مولا وبلىستارى مەن نۇر-سۇلتان قالا­سىنىڭ اكىمدەرىنە كوروناۆيرۋسقا قارسى ۆاكتسينالاۋ قارقىنىن ارتتىرۋ جۇكتەلدى. دەنساۋلىق ساقتاۋ، اقپارات جانە قوعامدىق دامۋ مينيسترلىكتەرىنە حالىققا ۆاكتسينالاۋ مەن رەۆاكتسينالاۋدىڭ ماڭىزىن، دەنساۋلىقتى ساقتاۋدىڭ جالعىز جولى – كوروناۆيرۋسقا قارسى ۆاكتسينا الۋ ەكەنىن ءتۇسىندىرۋ جۇمىستارىن ودان ءارى جۇرگىزۋ تاپسىرىلدى.

 جاستار اراسىنداعى جۇمىسسىزدىق دەڭگەيى تومەندەدى

ۇكىمەت وتىرىسىندا حالىقتى جۇمىس­پەن قامتۋ شارالارى قارالدى. ەڭبەك جانە حالىقتى الەۋمەتتىك قورعاۋ ءمينيسترى سە­رىك شاپكەنوۆ، «اتامەكەن» ۇكپ باس­قار­ما توراعاسى ابىلاي مىرزاحمەتوۆ، قارا­عاندى وبلىسىنىڭ اكىمى جەڭىس قاسىمبەك، قىزىلوردا وبلىسىنىڭ اكىمى گۇلشارا ابدىقالىقوۆا، شىمكەنت قالاسىنىڭ اكىمى مۇرات ايتەنوۆ بايانداما جاسادى.

ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆتىڭ ايتۋىنشا، بيىل وتكەن جىلمەن سالىستىرعاندا ەڭبەك نارىعىنىڭ بىرتىندەپ قالپىنا كەلۋى جالعاسۋدا، ونىڭ نەگىزگى كورسەتكىشتەرى جامان ەمەس. «ۇلتتىق ستاتيستيكا بيۋروسىنىڭ مالىمەتتەرىنە سايكەس بيىلعى 2 توقساندا جۇمىس كۇشىنىڭ سانى 9،3 ملن ادامدى قۇرادى. ونىڭ ىشىندە جۇمىسپەن قام­تىلعاندار سانى 73 مىڭ ادامعا ارتتى. سالالار بويىنشا جۇمىسپەن قامتىل­عان­داردىڭ قاتارىندا قىزمەت كورسەتۋ سالا­سىنىڭ ۇلەسى باسىم. جۇمىس بەرۋشىنىڭ باس­تاماسىمەن ۋاقىتشا جۇمىسپەن قامتىل­ماعاندار سانى 12،3 ەسەگە كەمىدى»، دەدى س.شاپكەنوۆ.

مينيستر جۇمىسسىزدىق دەڭگەيى 4،9% كولەمىندە ساقتالعانىن اتاپ ءوتتى، ال جاس­تار اراسىنداعى جۇمىسسىزدىق دەڭگەيى وتكەن جىلمەن سالىستىرعاندا تومەن­دەپ، 3،7%-دى قۇراعان. بيىل 1،2 ملن ادامدى جۇمىسپەن قامتۋ شارالارىمەن قامتاماسىز ەتۋ جوسپارلانعان. ونىڭ ىشىن­دە 700 مىڭ ادام «ەڭبەك» مەملەكەتتىك باع­دارلاماسى شەڭبەرىندە، 42 مىڭ ادام – جۇمىسپەن قامتۋدىڭ 2020-2021 جىلدارعا ارنالعان جول كارتاسى اياسىندا جانە بۇدان تىس 440 مىڭ جاڭا جۇمىس ورنىن قۇرۋ قاراستىرىلعان.

قازىرگى ۋاقىتتا وسى 3 باعىت بويىنشا 1 ملن-عا جۋىق ادام قولداۋ شارالارىمەن قامتىلدى. «ەڭبەك» مەملەكەتتىك باعدارلاماسى بويىنشا بيىل 9 ايدا 377 مىڭ ادام جۇمىسپەن قامتىلعان بولسا، ونىڭ 70%-ى تۇراقتى جۇمىسقا ورنالاستى. سونىمەن قاتار بارلىعى 65 مىڭ ادام وقىتۋمەن قامتاماسىز ەتىلدى. «كاسىپكەرلىكتى قولداۋ باعىتى بويىنشا 29 مىڭ ادام شاعىن نەسيە مەن قايتارىمسىز گرانتقا يە بولىپ، ونىڭ 25 مىڭنان استامى العاش رەت ءوز ىستەرىن اشتى جانە قوسىمشا 8 مىڭعا جۋىق جاڭا جۇمىس ورىندارىن قۇردى. 5،5 مىڭ ادام سولتۇستىك وڭىرلەرگە قونىس اۋداردى. 2،3 مىڭ جۇمىسقا قابىلەتتى جاستاعى قونىس اۋدارۋشىلاردىڭ 78%-ى جۇمىسپەن قامتىلدى. باعدارلاماعا قاتىسۋشىلاردىڭ 39%-ى – جاستار، 50%-ى – ايەلدەر، 53%-ى – اۋىل تۇرعىندارى»، دەدى ەڭبەك ءمينيسترى.

Nur Otan پارتياسىنىڭ سايلاۋالدى باعدارلاماسىندا قاراستىرىلعان «ەڭبەك» باعدارلاماسى 83%-عا ورىندالدى. اقمولا، قوستاناي، پاۆلودار، جام­بىل وبلىستا­رىندا جانە نۇر-سۇل­تان قالاسىندا بارلىق كورسەتكىش تو­لىعىمەن ورىندالدى. باعدارلامانىڭ تاعى دا ءبىر ما­ڭىز­دى باعىتتىنىڭ ءبىرى – قىس­قامەر­زىم­دى وقىتۋ. بيىل 16،9 مىڭ ادام قىسقامەر­زىمدى وقۋعا جولدانسا، 13،2 مىڭ ادام وقۋدى اياقتادى. ولاردىڭ 81%-ى جۇ­مىس­پەن قامتىلدى.

كاسىپكەرلىكتى قولداۋ اياسىندا Nur Otan پارتياسىنىڭ سايلاۋالدى باعدارلاماسىنا سايكەس جاستارعا قاراستىرىلعان 10 مىڭ گرانتتىڭ 7،6 مىڭى بەرىلدى. ميكروكرەديت جانە گرانت الۋشىلاردىڭ اراسىندا 3،2 مىڭ ستارتاپ باستاماعا قولداۋ كورسەتىلدى. جاڭا قابىلدانعان «كاسىپكەرلىكتى دامىتۋ ۇلتتىق جوباسى» شەڭبەرىندە كاسىپكەرلىكتى قولداۋ قۇرالدارىن ء«بىر تەرەزە» قاعيداتى بويىنشا ونلاين پورتال ارقىلى ۇسىنۋ كوزدەلۋدە.

سونىمەن قاتار اۋدانداردىڭ ەكو­نو­ميكالىق ماماندانۋىن انىقتاۋ ءۇشىن 163 باس جوسپار ازىرلەنىپ، مەملەكەتتىك گرانت پەن ميكروكرەديت وسى باس جوسپارمەن كوزدەلگەن باعىتتار بويىنشا ۇسىنىلادى. مەملەكەتتىك گرانت ۇسىنۋ پروتسەسى تولىق اۆتوماتتاندىرىلىپ، بيزنەس-جوسپاردىڭ تيىمدىلىگىن باعالاۋ جۇرگىزىلەدى. بۇل مەملەكەتتىك گرانتتاردى تاعايىنداۋ بارىسىندا ادامي فاكتورلاردى جويۋعا، گرانت الۋعا وتىنىمدەردىڭ قارالۋ مەرزىمىن ەداۋىر قىسقارتۋعا مۇمكىندىك بەرەدى.

سونداي-اق ۇلتتىق جوبا شەڭبەرىندە 2025 جىلعا دەيىن 150 مىڭ ادامدى كاسىپ­كەرلىك نەگىزدەرىنە وقىتۋ، جاستار مەن الەۋ­مەتتىك وسال توپتارعا 100 مىڭ جاڭا بيزنەس يدەيانى ىسكە اسىرۋ ءۇشىن قايتارىمسىز مەملەكەتتىك گرانت بەرۋ سياقتى شارالار كوزدەلگەن.

جۇمىسپەن قامتۋدىڭ 2020-2021 جىل­دارعا ارنالعان جول كارتاسىن جۇزەگە اسىرۋ جالعاسۋدا. ۆەدومستۆوارالىق كوميسسيا­دا بارلىعى 241 جوبا بەكىتىلگەن، ونىڭ 225 جوباسى بويىنشا جۇمىس جۇرگىزىلۋدە. قازىرگى تاڭدا جول كارتاسى جوبالارىندا 7،7 مىڭ ادام جۇمىسپەن قامتىلدى، بۇل جوسپاردىڭ 68%-ىن قۇرايدى. جۇمىسقا تۇرعان ازاماتتاردىڭ 67%-ىنا مىندەتتى زەينەتاقى جارنالارى تۇسكەن، قالعان ازاماتتار تولىق باقىلاۋدا.

جول كارتاسىنا بولىنگەن قاراجاتتىڭ 51%-ى يگەرىلگەن. قىزىلوردا وبلىسىندا جول كارتاسى شەڭبەرىندە 9 جوبا جوسپارلانعان بولاتىن. كونكۋرستىق راسىمدەردىڭ كەش باستالۋىنا بايلانىستى قازىر 4 جوبادا عانا جۇمىستار جۇرۋدە. «ۇلتتىق قوردان بولىنگەن نىسانالى ترانسفەرتتەر 13،8%-عا عانا يگەرىلدى. الماتى وبلىسى بويىنشا جول كارتاسى جوبالارىندا 2،4 مىڭ ادامدى جۇمىسپەن قامتۋ جوسپارلانعان بولسا، بۇگىندە 84 ادام عانا جۇمىسقا ورنالاستى»، دەدى مينيستر.

جۇمىسپەن قامتۋ سالاسىنداعى قىز­مەت­تەردىڭ قولجەتىمدىلىگىن ارتتىرۋ ماق­ساتىندا تسيفرلىق جۇمىسپەن قامتۋ ورتالىقتارىن ەنگىزۋ بويىنشا جۇمىس كەزەڭ-كەزەڭىمەن جالعاسۋدا. بيىلدان باس­تاپ جۇمىسسىز رەتىندە تىركەۋ، جۇمىسىنان ايىرىلۋىنا بايلانىستى الەۋمەتتىك تولەم تاعايىنداۋ جانە سۋبسيديالاناتىن جۇمىس ورىندارىنا جولداما بەرۋ قىزمەتتەرى ەلەكتروندى ەڭبەك بيرجاسى ارقىلى تولىق اۆتوماتتاندىرىلدى.

وسى ۋاقىتتا جۇمىسپەن قامتۋ ورتا­لى­عىنا جۇگىنگەن ءار ءۇشىنشى ادام نەمەسە 122 مىڭ ازامات ونلاين قىزمەت الدى. پورتال ارقىلى 44 مىڭ ادام جۇمىسقا ورنالاسۋعا مۇمكىندىك السا، 15 مىڭنان استام ادامعا جۇمىسىنان ايىرىلۋىنا بايلانىستى الەۋمەتتىك تولەم ەلەكتروندى ەڭبەك بيرجاسى ارقىلى ونلاين تۇردە تاعايىندالدى.

سونىمەن قاتار پاندەميا، جاڭا دەموگرافيالىق احۋال ەڭبەك نارىعىندا جۇيەلى جۇمىستى تالاپ ەتەتىن جاڭا تالاپتار قويۋدا. بىرىنشىدەن، جۇمىس كۇشىنە قويىلاتىن تالاپتاردىڭ تەز وزگەرۋى. ساراپشىلاردىڭ پىكىرىنشە، الداعى 5 جىلدا جۇمىس كۇشىنە قاجەتتى نەگىزگى داعدىلاردىڭ 40%-ى وزگەرەدى، ءاربىر ەكىن­شى قىزمەتكەرگە قايتا دايارلاۋدان ءوتۋ قاجەتتىگى تۋىندايدى ەكىنشىدەن، دەمو­گرا­فيالىق قاتەرلەر. ونەركاسىپ سالاسىندا كادرلاردىڭ قارتايۋ پروتسەسى ءجۇرىپ جاتىر. بۇل سالادا جاستاردىڭ تەك 20%-ى جۇ­مىسپەن قامتىلعان. ۇشىنشىدەن، جۇ­مىس­تىڭ جاڭا فورماتتارى. قازىرگى ۋاقىتتا «ەركىن تابىس ەكونوميكاسى» نەمەسە گيگ-ەكونوميكا، فريلانسەرلەر قارقىندى دامۋدا. ولاردىڭ قىزمەتىن زاڭنامالىق رەتتەۋ جانە ەڭبەك قۇقىقتارىن قورعاۋ شارالارىن قابىلداۋ قاجەت.

قاراعاندى وبلىسىندا تۇراقتى جۇمىس ورىندارىنا ورنالاسۋ كورسەتكىشى جوعارى. وبلىس اكىمى جەڭىس قاسىمبەكتىڭ اي­تۋىنشا، جۇمىسپەن قامتۋ شارالارىمەن قامتاماسىز ەتۋ ءۇشىن «ەڭبەك» باع­دار­لاماسىنىڭ، جۇمىسپەن قامتۋ جول كار­تاسىنىڭ جانە باسقا دا مەملەكەتتىك باع­دارلامالاردىڭ الەۋەتى تولىق پايدالا­نىلۋدا. جالپى، 70 مىڭنان استام ادامدى قامتۋ جوسپارلانۋدا. «ەڭبەك» باع­دار­لاماسى اياسىندا 31 مىڭنان استام ادام قامتىلدى، ونىڭ 20 مىڭنان استامى تۇراقتى جۇمىسقا ورنالاستىرىلدى. جۇمىسقا ورنالاستىرۋ ەلەكتروندى ەڭبەك بيرجاسىندا تىركەلگەن جۇمىسپەن قامتۋ ورگاندارىنا بەرىلگەن بوس ورىندار بو­يىنشا جۇزەگە اسىرىلدى. بۇگىنگى تاڭدا 5 مىڭنان استام كاسىپورىن مەن ۇيىم بوس جۇمىس ورىندارى تۋرالى اقپارات بەرەدى. جىل باسىنان 27 مىڭنان استام بوس جۇمىس ورىندارى ۇسىنىلدى»، دەدى وبلىس اكىمى.

ماسەلەنى ۇكىمەت باسشىسى اسقار مامين تۇيىندەدى. ونىڭ ايتۋىنشا، قازاق­ستاندا حالىقتى جۇمىسپەن قامتۋ بويىنشا داعدارىسقا قارسى شارالار كەشەنى قا­بىلداندى. 2021 جىلدىڭ 9 ايىنىڭ قورى­تىندىسى بويىنشا جۇمىسپەن قامتۋ شارالارىمەن 1 ملن-نان استام قازاق­ستاندىق قامتىلدى. جىلدىڭ سوڭىنا دەيىن قوسىمشا 200 مىڭ ادامدى قامتۋ كوزدەلگەن. ۇكىمەت باسشىسى بەلگىلەنگەن جوسپارلار ورىندالاتىنىن اتاپ ءوتتى. سونىمەن قاتار بۇگىنگى تاڭدا ەكونوميكانىڭ بارلىق سالاسىنىڭ قىزمەتى قالپىنا كەلتىرىلىپ جاتىر. «بۇل شارالار جۇمىسسىزدىقتىڭ وسۋىنە جول بەرمەۋگە جانە ونى 4،9% دەڭگەيىندە ۇستاپ تۇرۋعا مۇمكىندىك بەرەدى. ماڭىزدى ماسەلە – تۇراقتى جۇمىس ورىندارىن قۇرۋ، بيىل كەمىندە 440 مىڭ جۇمىس ورنى قۇرىلۋى ءتيىس»، دەدى ا.مامين.

پرەمەر-مينيستر اتىراۋ (بوس ورىن­دارعا جۇمىسقا ورنالاسقانداردىڭ ۇلەسى – 68%)، قاراعاندى (66%) جانە قوستاناي (66%) وبلىستارىنداعى تۇراقتى جۇمىس ورىندارىن قۇرۋدىڭ وڭ تاجىريبەسىن اتاپ ءوتتى.

سونىمەن قاتار «ەڭبەك» باعدارلاماسى بويىنشا جىلدىق جوسپاردىڭ ورىن­دا­لۋىنىڭ تومەن دەڭگەيى الماتى جانە شىمكەنت قالالارىندا، سونداي-اق با­تىس قازاقستان وبلىسىندا بايقالادى. جۇ­مىس­پەن قامتۋدىڭ جول كارتاسى اياسىندا جوبالاردى ىسكە اسىرۋ دەڭگەيى شىمكەنت قالاسىندا، قىزىلوردا، اقمولا جانە اقتوبە وبلىستارىندا تومەن. ۇكىمەت باس­شىسى ارتتا قالعان وڭىرلەرگە «ەڭبەك» باعدارلاماسى مەن جۇمىسپەن قامتۋدىڭ جول كارتاسى اياسىندا جوسپارلاردى ورىنداۋ جۇمىسىن جانداندىرۋدى تاپسىردى.

ەڭبەك مينيسترلىگىنە سالالىق مەملە­كەت­تىك ورگاندارمەن، وڭىرلەردىڭ اكىمدىك­تەرىمەن بىرلەسىپ، ءبىر اي مەرزىمدە ەكونو­مي­كانىڭ ساپالى جانە ورنىقتى ءوسۋىن قامتا­ماسىز ەتۋ ءۇشىن كادر قاجەتتىلىگىن انىقتاۋ ماسەلەسىن وزەكتەندىرۋ تاپسىرىلدى.

ا.مامين رەتتەۋ تەتىگىن جەدەل ازىرلەۋ جانە ەكونوميكالىق بەلسەندىلىككە جۇ­مىسپەن قامتۋدىڭ جاڭا فورمالارىن تارتۋ قاجەت ەكەنىن اتاپ ءوتتى. ەڭبەك مينيسترلىگىنە سالالىق مەملەكەتتىك ورگاندارمەن، «اتامەكەن» ۇكپ-مەن، كاسىپوداقتارمەن، ساراپشىلار قاۋىمداستىعىمەن بىرلەسىپ، «كاسىپتىك بىلىكتىلىكتەر تۋرالى» زاڭ جوبا­سىن ازىرلەپ، تالقىلاۋدى تەزدەتۋدى تاپسىردى. ۇكىمەت باسشىسىنىڭ ايتۋىنشا، «باس­تاۋ بيزنەس» جوباسىن ىسكە اسىرۋ كاسىپ­كەرلىك جونىندەگى ۇلتتىق جوبا اياسىن­دا جالعاستىرىلادى. جۇمىس ىستەپ تۇر­عان كاسىپكەرلىك جونىندەگى جوبالىق وفيس جۇمىسىندا ەڭبەك جانە حالىقتى الەۋ­مەتتىك قورعاۋ ءمينيسترى سەرىك شاپكەنوۆتىڭ توراعالىعىمەن جۇمىسپەن قامتۋ باعىتى قۇرىلادى. ۇكىمەت باسشىسى وسى سەكىلدى ماسەلەلەردى نازاردا ۇستاۋدى تاپسىردى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار