پارلامەنت • 26 قازان، 2021

ورگانيكالىق ونىمدەر تۋرالى زاڭ جوباسىنا باستاماشىل بولدى

92 رەت كورسەتىلدى

بۇگىن سەناتتا پالاتا سپيكەرى ماۋلەن اشىمباەۆتىڭ توراعالىعىمەن ورگانيكالىق ونىمدەردى ءوندىرۋ جانە ولاردىڭ اينالىمى ماسەلەلەرىنە ارنالعان زاڭ جوبالارىن تانىستىرۋ ءراسىمى ءوتتى. بۇل زاڭ جوبالارىنا سەناتورلار باستاماشىل بولدى، دەپ حابارلايدى، Egemen.kz. سەناتتتىڭ ءباسپاسوز قىزمەتىنە سىلتەمە جاساپ.

ءىس-شارا بارىسىندا سەنات توراعاسى «قازاقستان-2050» ستراتەگياسىندا ەلىمىزدى ەكولوگيالىق تازا ونىمدەر نارىعىندا جاھاندىق دەڭگەيگە كوتەرۋ مىندەتى بەلگىلەنگەنىن ايتتى. ەل پرەزيدەنتى دە ءوز جولداۋىندا وسى ماسەلەگە نازار اۋدارعانى بەلگىلى.

«مەملەكەت باسشىسى قاسىم-جومارت توقاەۆ حالىققا ارناعان جولداۋىندا بۇل ماسەلەگە ارنايى توقتالىپ، ەلىمىزدىڭ اۋىل شارۋاشىلىعىنداعى الەۋەتى جانە ورگانيكالىق ءونىم ءوندىرۋ مۇمكىندىگى تولىق پايدالانىلماي وتىرعانىن اتاپ ءوتتى. قازىرگى تاڭدا ورگانيكالىق ءونىم ءوندىرۋ نارىعىندا ۇزاق مەرزىمدى ءوسۋ ترەندى بايقالادى. سوندىقتان بۇل سالانىڭ دامۋ مۇمكىندىگى وتە جوعارى دەۋگە تولىق نەگىز بار»، دەدى ماۋلەن اشىمباەۆ.

سەنات سپيكەرى ءوز سوزىندە ەلىمىزدە ورگانيكالىق ءونىم ءوندىرۋ سالاسى بويىنشا ايتارلىقتاي جۇمىس اتقارىلعانىن ايتا كەلە، بۇل باعىتتا وزەكتى تۇيتكىلدەر بار ەكەنىن تىلگە تيەك ەتتى. ونىڭ ىشىندە زاڭنامالىق رەتتەۋ ماسەلەسىنىڭ ماڭىزى زور. سوندىقتان سەناتورلار وسى سالاداعى زاڭداردى جەتىلدىرۋ ءۇشىن بىرقاتار زاڭ جوبالارىنا باستاماشىلدىق جاسادى.

سوعان سايكەس، «ورگانيكالىق ءونىم ءوندىرۋ جانە ونىڭ اينالىمى تۋرالى»، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ورگانيكالىق ونىمدەردى ءوندىرۋ جانە ولاردىڭ اينالىمى تۋرالى وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە تولىقتىرۋلار ەنگىزۋ تۋرالى» زاڭ جوبالارىنا جاڭاشىلدىقتار ەنگىزۋ كوزدەلىپ وتىر.

جاڭا نورمالاردىڭ ءبارى ورگانيكالىق ءونىم وندىرۋشىلەر ءۇشىن قولايلى جاعداي جاساۋعا جانە وسىنداي ونىمدەردى تۇتىنۋشى ازاماتتاردىڭ سۇرانىستارىن قاناعاتتاندىرۋعا ارنالعان.

اتاپ ايتقاندا، مەملەكەتكە وتپەلى كەزەڭنىڭ شىعىستارىن سۋبسيديالاۋ ۇسىنىلادى. ويتكەنى اۋىلشارۋاشىلىق تاۋارلارىن وندىرۋشىلەر بىرنەشە جىل بويى ءونىم الا الماۋى مۇمكىن. سوعان سايكەس وتپەلى كەزەڭگە تاپ بولىپ، بوس قالعان اۋىل شارۋاشىلىعى جەرلەرىنەن پايدا دا كورە المايدى.

زاڭ جوباسىن تالقىلاۋ بارىسىندا سەناتور اقىلبەك كۇرىشباەۆ تاعى ءبىر جاڭاشىلدىققا توقتالىپ ءوتتى. ول – ورگانيكالىق ءونىمدى مىندەتتى سەرتيفيكاتتاۋدان باس تارتۋ. الەمدىك تاجىريبەگە سايكەس، سوڭعى دايىن ءونىم ەمەس، تەك ورگانيكالىق ءونىمدى ءوندىرۋ ۇدەرىسى عانا سەرتيفيكاتتالادى. مۇنداي شارا ءونىم ءوندىرۋدىڭ وزىندىك قۇنىن تومەندەتەدى جانە شارۋالاردى قوسىمشا قارجىلىق جۇكتەمەدەن بوساتۋعا مۇمكىندىك بەرەدى. ناتيجەسىندە ءونىمدى، اسىرەسە، ىشكى نارىقتا قولجەتىمدى باعامەن وتكىزۋگە جول اشىلادى.

زاڭ جوبالارىن تالقىلاۋعا اۋىل شارۋاشىلىعى ءمينيسترى ەربول قاراشوكەەۆ، اگرارلىق سەكتور ماماندارى، بۇۇ ازىق-ت ۇلىك جانە اۋىل شارۋاشىلىق ۇيىمىنىڭ قازاقستانداعى وكىلى، قازاقستاندا ورگانيكالىق ءونىم وندىرۋشىلەر وداعىنىڭ، ۇلتتىق اگرارلىق عىلىمي-ءبىلىم ورتالىعىنىڭ، «قازاقستان-گەرمانيا اگروساياسي ديالوگى» جوباسىنىڭ وكىلدەرى جانە تاعى باسقا وسى سالاداعى ساراپشىلار قاتىستى.

ءىس-شارا سوڭىندا سەنات توراعاسى تالقىلاۋ بارىسىندا ايتىلعان پىكىرلەر مەن ۇسىنىستار الداعى ۋاقىتتا ەسكەرىلەتىنىن جانە زاڭ جوبالارىن جىل سوڭىنا دەيىن پارلامەنت قاراۋىنا ەنگىزۋ قاجەت ەكەنىن ايتتى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار