11 قازاننان باستاپ ماڭعىستاۋ وبلىسىندا 14 وبلىستان كەلگەن 2000-نان استام قاتىسۋشى سپورتتىڭ 14 تۇرىنەن: تەڭگە ءىلۋ, جامبى اتۋ, اۋدارىسپاق, قۇسبەگىلىك, ۆولەيبول, شاعىن فۋتبول, قازاق كۇرەسى, توعىزقۇمالاق, اسىق اتۋ, گىر سپورتى, قول كۇرەسى, ۇستەل تەننيسى, جازعى پرەزيدەنتتىك كوپسايىس جانە كيكبوكسينگتەن سىنعا ءتۇستى. ءتورت جىلدا ءبىر رەت ۇيىمداستىرىلاتىن كەشەندى دودادا كاسىپقوي سپورتشىلار ەمەس, سالاماتتى ءومىر سالتىن سەرىك ەتكەن جاندار ونەر كورسەتتى.
رەسپۋبليكالىق سايىستىڭ سالتاناتتى جابىلۋ راسىمىندە ماڭعىستاۋ وبلىسى اكىمىنىڭ ءبىرىنشى ورىنباسارى ابزال مەڭدىباەۆ ءسوز الىپ, جەڭىمپاز كوماندالاردى ماراپاتتادى. ويىنداردىڭ سوڭعى كۇنى شاعىن فۋتبولدان ۇزدىك شىققان كوماندالار بەلگىلى بولدى. الا دوپ باسەكەسىندە تۇركىستان وبلىسى توپ جارسا, قىزىلوردا وبلىسىنىڭ وكىلدەرى ەكىنشى, اتىراۋ وبلىسىنىڭ سپورتشىلارى ءۇشىنشى ورىنعا يە بولدى.
وسىدان كەيىن «اق بيداي» رەسپۋبليكالىق اۋىل سپورتى ويىندارىنىڭ قورىتىندى ۇپايىن جاريالاۋ جانە جەڭىمپازداردى ماراپاتتاۋ راسىمىنە كەزەك كەلدى. قورىتىندى ەسەپتە 199 ۇپاي جيناعان تۇركىستان وبلىسى 1-ورىندى يەلەندى. ەنشىسىندە 183 ۇپايى بار الماتى وبلىسى 2-ورىن السا, 164 ۇپايمەن قىزىلوردا وبلىسىنىڭ كومانداسى ءۇشىنشى ورىنعا تۇراقتادى.
ءداستۇر بويىنشا ءتورت جىلدان كەيىن «اق بيداي» رەسپۋبليكالىق اۋىل سپورتى ويىندارىن قابىلدايتىن ءوڭىر انىقتالدى. ويىنداردىڭ تۋىن ماڭعىستاۋ وبلىسى الماتى وبلىسىنا تاپسىردى.
