ايماقتار • 25 قازان، 2021

سەنىم ارت ماعان، تۋعان ەل!

37 رەت كورسەتىلدى

شوقتاي ەكشەلىپ، ۇلى دا ىزگى مۇرات جولىندا توپتاسىپ جۇدىرىقتاي جۇمىلعان جالىندى جاستاردىڭ ۇلكەن كۇش ەكەندىگى بەلگىلى. وبلىستىق ىشكى ساياسات باسقارماسى وبلىستىق جاستار رەسۋرستىق ورتالىعىمەن بىرلەسىپ جاستار فورۋمىن وتكىزدى.

«جاس كەلسە – ىسكە» دەيدى حال­قىمىز. جاستار – قاشاندا تىڭ يدەيا­لاردىڭ قاينار كوزى، وڭ وزگە­رىستەردىڭ قوزعاۋشى كۇشى. سون­دىقتان وسكەلەڭ ۇرپاقتىڭ وسىنداي الەۋەتىن دۇرىس ارناعا باعىتتاپ، ءتيىمدى پايدالانۋى­مىز كەرەك» دەپ ەل پرەزيدەنتى قاسىم-جومارت توقاەۆ ءبىر سوزىندە اتاپ كورسەتكەن بولاتىن. بۇگىنگى جاستار بارىنشا ءبىلىمدى بولىپ، ور­كەنيەتتى ەلدەردىڭ ءورىسىن اڭداپ، جاسامپاز جاڭالىقتاردى جاس جانىنا ءسىڭىرىپ، العا ۇمتىلۋلارى كەرەك.

فورۋمعا ەل ىشىندەگى يگى­لىكتى ىستەرگە ۇيىتقى بولىپ جۇر­گەن جاستار قوزعالىسىنىڭ جە­تەك­شىلەرى، ەل شەتىنە جامان تۇ­ماۋدىڭ جان تىتىرەنتەر سۇراپىل حابارى جەتكەندە باستارىن باي­گەگە تىگىپ، نەبىر تولىمدى شارۋا­لاردى اتقارعان ەرىكتىلەر ۇيىم­دارىنىڭ وكىلدەرى، الدارىنان جۇمىس ۇركىپ وتىراتىن، تەپكەن تاسى ورگە دومالاپ تۇرعان جاس كاسىپكەرلەر مەن تاۋەلسىزدىك­تىڭ قۇرداستارى قاتىستى.

الدىمەن ءسوز العان وبلىستىق ىشكى ساياسات باسقارماسى باسشى­سىنىڭ ورىنباسارى ناريمان ءابدىراحمانوۆ ەل ءۇمىت ارتىپ وتىرعان جاستاردىڭ تاۋەلسىزدىك جىلدارى اتقارعان تولىمدى ءىسىن تارقاتىپ ايتىپ بەردى. الداعى اسقارالى مىندەت جۇگى سارالاندى.

– بۇگىنگى تاڭدا جاستاردىڭ ماسەلەلەرى دە از ەمەس. ايتا­لىق، جوعارى وقۋ ورنىنىڭ ستۋ­دەنتتەرى ءبىلىم بەرۋدىڭ ءداستۇرلى فور­ماتىنا كوشكەن كەزدە بىر­قاتار وڭىردە جاتاقحانا جە­تىس­پەي، قيىندىق كورۋدە، – دەدى «قازاقستان ستۋدەنتتەرىنىڭ اليان­سى» رەسپۋبليكالىق ستۋدەنتتەر قوزعالىسى» قوعام­دىق بىرلەستىگىنىڭ پرەزيدەنتى ءىلياس تۇستىكباەۆ. – جاتاقحانا بولمەلەرىنە الەۋمەتتىك قا­شىق­تىقتى ساقتاپ ورنالاسۋ تار­تىبى­نە بايلانىستى ورىننىڭ ازايىپ قالۋى سەبەپتى زارۋلىك تۋىن­داپ وتىر. وسى ورايدا ءبىز وقۋ ورىندارىنىڭ باسشىلا­رىنا قالاداعى قوناقۇي يەلە­رىمەن جانە پاتەرلەرىن جالعا بەرۋشىلەرمەن كەلىسىم جاساسىپ، ورنالاستىرۋ جاعىن قاراس­تىرۋدامىز. كوكشەتاۋدان اسا كوپ ارىز-شاعىم ءتۇسىپ جاتقان جوق. جالپى، ستۋدەنتتەر بەلسەندى بولۋلارى كەرەك. ولار ءبىلىم بەرۋ سالاسىنىڭ تىنىس-تىرشىلىگىنە وزدەرى ارالاسىپ، قوزعاۋشى كۇش بولىپ، ستيپەنديا تاعايىنداۋ مەن وقۋ گرانتتارىن بولۋگە قا­تىسىپ وتىرسا، بارلىق ماسەلە ءادىل شەشىلەتىندىگىنە كۇمان جوق.

جاستاردىڭ بويىنداعى جا­لىن جىگەردىڭ، قيىن كەزەڭدە ەل يىعىنا تۇسكەن سالماقتى بىر­لەسە كوتەرىپ، جالپاق جۇرتتىڭ بىرلىگىن نىعايتىپ، يگىلىكتى ىستەر­گە ۇيىتقى بولىپ، ايانباي اتسالىساتىنىن كوز كورىپ ءجۇر. پان­دەميا باستالعالى وبلىس جاستارى جالعىزباستى، ەگدە ادامداردى، كوپبالالى وتباسىلارىن قامقورلىقتارىنا الىپ، كەلەلى شارۋالار اتقاردى. ەمحاناعا بەكىتىلگەن سوزىلمالى سىرقاتى بار ادامدارعا ءدارى-دارمەكتەرىن جەتكىزىپ بەردى. قارعا ادىم جەر مۇڭ بولىپ، قول قىسقارعاندا ازىق-ت ۇلىك سەبەتتەرىن دايىنداپ، جان جىلۋىن توكتى. كۇندەلىكتى تۇرمىسقا قاجەتتى زاتتارمەن بىرگە جىلى كيىمدەر جيناستى. قاقاعان قىستا سولتۇستىكتىڭ سى­رەس­كەن قارىنان اۋلالاردى تا­زارتىپ، وتىن-كومىرلەرىن ءۇيىپ بەرۋگە قولۇشىن بەردى. وسى­لايشا، جاناشىرلىعى مول جاس­تار قام كوڭىلدى قاريالار­دىڭ قيىندىقتىڭ قۇرساۋىندا جال­عىز قالىپ قويمايتىنىن اڭعار­تىپ، ەت جۇرەكتەرىن ەلجىرەتتى.

كاسىپكەر جاستار ءوز الدىنا تىربانىپ، بويلارىنداعى ءبى­لىم مەن بىلىكتى، قاجىر مەن قاي­راتتى جۇمىلدىرىپ، ەل يگى­لىگىن مولايتۋعا اتسالىسۋدا. ولار وزدەرىنىڭ قاراقان باس­تا­رىنىڭ قامى ءۇشىن ەمەس، زامان­داستارىنىڭ دا الەۋمەتتىك-تۇرمىستىق جاعدايلارىن جاق­سارتۋعا مول ۇلەس قوسۋدا. اي­تالىق، ءبىر كاسىپكەر ءوز ءىسىن باستاسا، سونىڭ ماڭايىندا توپتاسقان وزگەلەر جۇمىسقا ورنالاسادى، ياعني جاڭا جۇمىس ورىندارى اشىلادى.

– ءبىز ءوزىمىزدىڭ قولىمىزدان ءىس كەلەتىنىن كورسەتۋىمىز كەرەك، – دەيدى تاۋەلسىزدىك قۇرداسى، جات­تىقتىرۋشى ميرزادا سەيىتقا­لي. – ول ءۇشىن ءبىزدىڭ زامانداستارىمىز سالاماتتى ءومىر سالتىن بەرىك ۇستاپ، سپورتتى سەرىك ەتكەندەرى ءلازىم. تەپسە تەمىر ۇزەتىن دەنى ساۋ ۇرپاق جالقىنىڭ عانا جەتىستىگى ەمەس، قوعامنىڭ بايلىعى.

فورۋمعا قاتىسۋشىلار سۇ­راق-جاۋاپ تۇرىندەگى سۇحبات الاڭىن­دا وزدەرىن تولعاندى­رىپ جۇر­گەن كەلەلى ماسەلەلەردى كەڭىنەن تالقىلاپ، وي تالقىسىن ءوربىتتى. وبلىس ورتالىعىنداعى شوقان ءۋاليحانوۆ اتىنداعى، اباي مىر­­زاحمەتوۆ اتىنداعى ۋنيۆەرسي­تەتتەرمەن ستۋدەنت­تەر ماسەلەسى ەكشەلگەن مەموراندۋم­عا قول قويىلدى.

جاستاردىڭ ماسەلەسىن كوك­سەگەن جيىن Jas sarbaz لاگەرىن­دە جالعاستى. تامىلجىعان تابي­عات اياسىندا جاس كوكىرەكتەر­دەن ۇشقىنداعان الاۋ وتى جالپاق ەلدىڭ جاس بۋىنىن قامتىپ، ارمان وتىن جاندىرىپ تۇرعانداي ادەمى اسەر قالدى.

 ا

كوكشەتاۋ

سوڭعى جاڭالىقتار

ۇقساس جاڭالىقتار