الەم • 24 قازان، 2021

وزبەكستاندا پرەزيدەنتتىك سايلاۋ ءوتىپ جاتىر

75 رەت كورسەتىلدى

وزبەكستاندا پرەزيدەنتتىك سايلاۋ باستالدى، دەپ حابارلايدى Egemen.kz وزبەكستاننىڭ Uza.uz سايتىنا سىلتەمە جاساپ.

بيىلعى سايلاۋعا ەلدەگى ۇيىمداستىرىلعان سايلاۋ ۋچاسكەلەرىندە جالپى 19 ميلليون 859 مىڭ 127 سايلاۋشى تىزىمگە ەنگىزىلگەن. ونىڭ ىشىندە 9 ميلليون 459 مىڭ 273 نەمەسە 48 پايىزى ەر ادامدار، 10 ميلليون 399 مىڭ 854 نەمەسە 52 پايىزى ايەلدەر. 6 ميلليون 458 مىڭ 283 ازامات 30 جاسقا دەيىنگى جاستار بولىپ، ونىڭ 887 686-سى سايلاۋدا العاش رەت داۋىس بەرەدى.

شەت مەملەكەتتەردە جالپى 54 سايلاۋ ۋچاسكەسى اشىلعان. ولارداعى سايلاۋشىلار تىزىمىنە بارلىعى 299 780 ازامات ەنگىزىلگەن.

سايلاۋ پروتسەسىن قاداعالاۋعا حالىقارالىق بايقاۋشى رەتىندە شەتەلدەن 971 ازامات كەلگەن. ونىڭ ىشىندە 20-عا جۋىق ىقپالدى حالىقارالىق ۇيىم، ەقىۇ پارلامەنتتىك اسسامبلەياسى مەن دەموكراتيالىق ينستيتۋتتار جانە ادام قۇقىقتارى جونىندەگى بيۋرو، شانحاي ىنتىماقتاستىق ۇيىمى، تاۋەلسىز مەملەكەتتەر دوستاستىعى مەن تمد پارلامەنتارالىق اسسامبلەياسى، تۇركىتىلدەس مەملەكەتتەر ىنتىماقتاستىعى كەڭەسى، تۇركى كەڭەسى پارلامەنتتىك اسسامبلەياسى مەن يسلام ىنتىماقتاستىعى ۇيىمى جانە باسقا دا حالىقارالىق ۇيىمداردان بارلىعى 631، سونداي-اق الەمنىڭ 50-گە جۋىق ەلىنەن 340 حالىقارالىق باقىلاۋشى جاعدايدى تىكەلەي باقىلاۋدا.

ازاماتتاردىڭ داۋىس بەرۋ پروتسەسى ساعات 20:00 -گە دەيىن جالعاسادى.

قازاقستانداعى نۇر-سۇلتان، الماتى جانە اقتاۋ قالالارىنداعى وزبەكستاننىڭ ديپلوماتيالىق وكىلدىكتەرىنەن سايلاۋ ۋچاسكەلەرى اشىلدى. سونداي-اق بارلىق وبلىستاردا كوشپەلى سايلاۋ كوميسسيالارى جۇمىس ىستەيدى.

سوڭعى جاڭالىقتار

ۇقساس جاڭالىقتار