بۇل تۋرالى بريفينگتە كوكشەتاۋدىڭ باس مەملەكەتتىك سانيتارلىق دارىگەرى قانات ىسقاقوۆ ءمالىم ەتتى.
كوكشەتاۋ قالاسىندا «Ashyq» جوباسىنا 800-دەن استام كاسىپكەرلىك نىسان قاتىسادى. جوبانىڭ تيىمدىلىگى كوروناۆيرۋس ينفەكتسياسىمەن اۋىراتىن ناۋقاستاردى جانە ءۇي كارانتينى رەجيمىن بۇزعان, بايلانىستا بولعان ادامداردى انىقتاۋمەن راستالادى.
«بۇگىنگى تاڭدا «Ashyq» قوسىمشاسىنىڭ كومەگىمەن كوكشەتاۋدا 661 ءتارتىپ بۇزۋشى انىقتاۋ مۇمكىن بولدى, ونىڭ ىشىندە 478 ادامنىڭ «قىزىل», 138 ادامنىڭ «سارى» مارتەبەسى بار. 235 ادام جالپى سوماسى 8 ملن 255 مىڭ 360 تەڭگەگە اكىمشىلىك جاۋاپقا تارتىلدى», دەپ ءتۇسىندىردى ق.ىسقاقوۆ.
كارانتين رەجيمىن بۇزعان 159 ادام قازاقستاننىڭ وزگە وڭىرلەرىنىڭ تۇرعىندارى بولىپ شىقتى. ولار بويىنشا شارالار قابىلداۋ ءۇشىن اقپارات تۇرعىلىقتى جەرىنە جىبەرىلدى.
قالانىڭ باس مەملەكەتتىك سانيتارلىق دارىگەرىنىڭ ايتۋىنشا, مونيتورينگتىك توپتار كوكشەتاۋدا كارانتين تالاپتارىنىڭ بۇزىلۋىن انىقتاۋدى جالعاستىرۋدا.
«1 قازاننان باستاپ ءارتۇرلى مەنشىك نىسانىنداعى 86 نىسان تەكسەرىلىپ, 10 نىساننىڭ قارانتين رەجيمىن بۇزعانى انىقتالدى. ماسكا رەجيمىن بۇزعانى ءۇشىن ءتورت نىساننىڭ جاۋاپتى تۇلعالارى اكىمشىلىك جاۋاپقا تارتىلدى. جۇمىس رەجيمىن بۇزعان ەكى جەكە كاسىپكەر جازالاندى. 50-دەن استام ادامنىڭ قاتىسۋىمەن بۇقارالىق ءىس-شارالار وتكىزگەن ءتورت جەكە كاسىپكەر جاۋاپقا تارتىلدى», دەپ اتاپ ءوتتى وبلىس ورتالىعىنىڭ باس مەملەكەتتىك سانيتارلىق دارىگەرى.
