سپورت • 22 قازان، 2021

كىمدەرگە ءۇمىت ارتامىز؟

103 رەت كورسەتىلدى

الداعى جەكسەنبى كۇنى سەربيا استاناسى – بەلگرادتا بوكستان ەرەسەكتەر اراسىنداعى 21-ءشى الەم چەمپيوناتىنىڭ جالاۋى جەلبىرەيدى. جاڭا ەرەجەلەر بويىنشا وتەتىن بيىلعى جاھاندىق بىرىنشىلىكتىڭ جا­ڭالىعى كوپ. ماسەلەن، سەر­بياداعى دودادا بىلعارى قول­عاپ شەبەرلەرى تاريحتا تۇڭ­عىش رەت 13 سالماق دارەجەسى بويىنشا جۇدىرىقتاساتىن بولسا، جەڭىمپاز بەن جۇلدەگەر اتانعان بوكس­شى­لارعا العاش رەت سىياقى تاعايىندالىپ وتىر.

«سەربيادا توپ جارعان بوكس­شىلار ەندى بۇرىنعىداي ءوز ەلدەرىنە تەك مەدالمەن عانا ەمەس، سونىمەن قاتار قوماقتى اق­شا­لاي سىياقىمەن ورالادى. بۇل جاس­تاردى بوكس ۇيىر­مەسىنە بارۋعا، شى­نىعىپ، جات­تىعۋعا جانە جاڭا شىڭداردى با­عىندىرۋعا جە­تەلەيتىنىنە سە­نىمدىمىن. ال­داعى جارىستاردا وسى ءداستۇردى جال­عاستىرامىز دەپ ويلايمىن. بوكس­شىلاردىڭ دايىندىققا كەتەتىن ۋاقىتى مەن جاتتىعۋ زالىنداعى ەڭبەگىن، شار­شى الاڭداعى ماڭداي تەرىن ەسكەرە وتىرىپ، ولارعا قار­جىلاي سىياقى تاعايىنداۋ تۋرا­لى شە­شىم قابىلدادىق. بوكس­شىلار رينگتە عانا تابىسقا جەتىپ قوي­ماي، ماتەريالدىق تۇرعىدان دا ءوزىن ءوزى قامتاماسىز ەتىپ، ودان ءارى دامۋى ءتيىس»، دەيدى AIBA پرە­زيدەنتى ۋمار كرەملەۆ.

سونىمەن قاتار بەلگرادتا وتەتىن الەم چەمپيوناتىندا بوكس­شىلار رينگكە العاش رەت اق قولعاپ كيىپ شىعادى. ال ولاردىڭ سپورت كيىمىنىڭ ءتۇسى بۇرىنعىسىنشا، كوك جانە قىزىل بولىپ قالا بەرەدى. «اق قولعاپتار جاڭا باس­تا­ما­لارىمىزدىڭ، سونداي-اق ءبىز ۇيىم­داستىرىپ جاتقان وسىنداي اۋقىمدى ءىس-شارانىڭ ادىلدىگىن بىلدىرەدى. ءبىز ءاربىر سپورتشى ءادىل جەڭىسكە جەتۋ ءۇشىن بار كۇشى­مىزدى سالامىز»، دەپ اتاپ ءوتتى ۋ.كرەملەۆ.

قازاقستاندىق بوكسشىلاردىڭ توكيوداعى توقىراۋىنان كەيىن جانكۇيەرلەر الەم چەمپيوناتىن­دا وتانداستارىمىزدان تەك التىن جۇلدە كۇتەتىنى انىق. الاي­دا تۇعىردىڭ بيىك ساتىسىنان كورىنۋ كەز كەلگەن بوكسشىعا بۇ­يىرا بەرمەيتىنى تاعى بار. سون­دىقتان بەلگرادتا قاي بوكسشىمىز توپ جارۋى مۇمكىن ەكەنىن سارالاپ كورەيىك. قازاقستاندىق بوكس ساراپشىلارى سەربيادا ءانۇرانىمىزدى شىرقاتۋعا ەڭ جەڭىل سالماقتا ونەر كورسەتەتىن تەمىرتاس ءجۇسىپوۆتىڭ، توكيو وليم­­پياداسىنىڭ قولا جۇلدەگەرى سا­كەن بيبوسىنوۆتىڭ (51 كيلو) جانە بەك نۇرماعانبەتتىڭ (86 كيلو) ايتارلىقتاي مۇمكىندىكتەرى بار دەپ ەسەپتەيدى.

تەمىرتاس ءجۇسىپوۆتى قازىر نا­عىز بابىندا تۇرعان بوكسشىنىڭ ءبىرى دەپ ايتۋعا بولادى. ويتكەنى ول جۋىردا عانا رەسەي استاناسى – ماسكەۋدە وتكەن اسكەريلەر اراسىنداعى الەم چەمپيوناتىندا 49 كيلو سالماقتا چەمپيون اتاندى. سونىمەن قاتار اسا جەڭىل سالماق دارەجەسى وليمپيادالىق سالماقتىڭ قاتارىنان شىعىپ قال­عان سوڭ 48 كيلوداعى ساقا بوكس­شىلاردىڭ ءبىرازى سالماق دارەجەلەرىن وزگەرتكەن. ماسەلەن، ريو وليمپياداسىنىڭ چەمپيو­نى وزبەكستاندىق حاسانباي دۋس­ماتوۆ، ازيا ويىندارىنىڭ جەڭىمپازى ۇندىستاندىق اميت پانگال جانە تاعى باسقا جەڭىل سالماقتىڭ ۇزدىكتەرى قازىر 51 كيلودا جۇدىرىقتاسادى. سوندىقتان بۇل سىندا ت.جۇسىپوۆكە باس­تى قارسىلاس وزبەكستاندىق نودير­جون ميرزا­احمەدوۆ اتانۋى مۇم­كىن. 2019 جانە 2021 جىلدارى ەكى دۇركىن ازيا چەمپيونى اتان­عان ول جۋىردا عانا دۋبايدا وتكەن سارى قۇرلىق بىرىنشىلىگىندە بىلتىرعى قازاقستان چەمپيوناتىندا ءجۇسى­پوۆتى جەڭگەن دانيال سابيتتەن اي­لا­سىن اسىرىپ، التىن جۇلدەگە يەلىك ەتكەن بولاتىن.

ساكەن بيبوسىنوۆتىڭ توكيو وليمپياداسىنداعى جارقىن ون­ەرىنەن كەيىن باپكەرلەر دە، جان­كۇيەرلەر دە وتانداسىمىزدان التىن مەدال كۇتەتىنى راس. بىراق جوعارىدا ءبىز اتاپ وتكەن دۋسماتوۆ، پانگال سياقتى بوكس­شىلار بيبوسىنوۆقا 51 كيلودا قيىندىق تۋدىراتىنى انىق.

ال الەم چەمپيونى اتانۋ ءۇشىن كاسىپقوي بوكستان اۋەسقويعا قاي­تا ورالعان بەك نۇرماعانبەت سەر­­بيادا جاڭا سالماقتا باق سىنايدى. 86 كيلو اۋەسقوي بوكسقا جاڭادان قوسىلعان سوڭ، ءالى بۇل سالماق دارەجەسىنىڭ ناقتى ءبىر كوشباسشىسى جوق. سوندىقتان بەك وسى مۇمكىندىكتى ءتيىمدى پايدالانۋى كەرەك.

سونىمەن قاتار الەم چەمپيو­ناتىندا سابىرحان ماحمۇد (54 كيلو)، ءساناتالى تولتاەۆ (63،5 كيلو)، ابىلايحان ءجۇسىپوۆ (67 كيلو) جانە اعايىندى نۇربەك جانە ايبەك ورالبايلاردىڭ جۇلدە­گەرلەر قاتارىنان كورىنەتىندەي الەۋەتتەرى بار.

سابىرحان ماحمۇد – ەلىمىزدەگى تالانتتى جاس بوكسشىلاردىڭ ءبىرى. بىلتىر 52 كيلو سالماقتا ەل چەمپيونى اتانعانىمەن، توكيو وليمپياداسىنا جولى تۇسپەدى. ۇلتتىق قۇرامانىڭ بۇرىنعى باس باپكەرى عالىم كەنجەباەۆ قىزمەتىنەن كەتىپ جاتقاندا وسى بوكسشىنىڭ الەۋەتىن جوعارى باعالاپ، وعان الەمدىك سىنداردا ءوزىن كورسەتۋىنە مۇمكىندىك بەرە الماعانىنا وكىنەتىنىن ايتىپ ەدى. ەندى، مىنە، سابىرحانعا ءوزىنىڭ مىقتىلىعىن دالەلدەۋگە تاماشا ءسات تۋىپ تۇر. بۇل سالماق تا جاڭادان قوسىلعان سوڭ، كىمنىڭ فاۆوريت ەكەنىن تاپ باسىپ ايتۋ قيىن.

2018 جىلعى قازاقستان چەم­پيونى، 2019 جىلعى ازيا بىرىن­شىلىگىنىڭ قولا جۇلدەگەرى ءساناتالى تولتاەۆ تا سوڭعى جىلدارى ءتاۋىر ناتيجە كورسەتىپ كەلەدى. جۋىردا عانا اقتاۋدا اياقتالعان شوقىر بولتەك ۇلى اتىنداعى تۋرنيردە ۇزدىك اتانىپ، الەم چەمپيوناتىنا جولداما الدى.

قاتارىنان ەكى الەم بىرىنشى­لىگىندە قولا جۇلدەگە قول جەتكىزگەن ابىلايحان ءجۇسىپوۆ بيىل ءۇشىنشى دوداسىنا بارا جاتىر. جاستار اراسىندا الەم، وليمپيادا چەمپيونى اتانعان جەرلەسىمىز ەرەسەكتەر ساپىندا سول ناتيجەسىن قايتالاي الماي كەلەدى. بالكىم وسى جولى قولا­سىن التىنعا اۋىس­تىرىپ قالار.

69 كيلودان 71 كيلوعا اۋىسقان اسلانبەك شىمبەرگەنوۆتىڭ جو­لى اۋىرلاۋ بولىپ تۇر. ويت­كەنى بۇل سالماقتا ەكى دۇركىن وليم­پيادا، ءبىر مارتە الەم چەمپيونى اتانعان كۋبالىق رونەل يگلەسياس سوتولونگو، 2017 جىل­عى ازيا جانە الەم چەمپيونى، ريو وليمپياداسىنىڭ كۇمىس جۇل­­دەگەرى وزبەكستاندىق شاحرام گياسوۆ بار. دەسە دە وتانداسىمىز ءساۋىر ايىندا رەسەيدىڭ سانكت-پەتەربۋرگ قالاسىندا وتكەن «گۋ­بەرناتور كۋبوگى» جارىسىندا وليمپيادانىڭ ەكى دۇركىن قو­لا جۇلدەگەرى، 2019 جىلعى الەم چەمپيونى رەسەيلىك اندرەي زام­كو­ۆويدى ايقىن باسىمدىقپەن ۇتىپ، مىقتىلارمەن تايتالاسۋعا قاۋ­قارى بار ەكەنىن دالەلدەگەن ەدى.

قالعان بوكسشىلار دا ەل مە­رەيىن اسىرىپ، بەلگرادتان ابىرويلى ورالادى دەپ ۇمىتتەنەمىز.

سوڭعى جاڭالىقتار

ۇقساس جاڭالىقتار