ەل ۇكىمەتى تۇرعىندارعا اۋىر سوققان ىندەتتىڭ ەكىنشى تولقىنىنان كەيىن بۇل ناتيجە جاعدايدى جاقسارتادى دەپ وتىر. ۆاكتسينا الۋعا رۇقسات ەتىلگەن حالىقتىڭ 75 پايىزىنا ەكپەنىڭ ءبىرىنشى كومپونەنتىن, ال 30 پايىزىنا ەكەۋىن دە سالىپ ۇلگەرگەن.
1 ميللياردتىق مەجەگە 40 اپتادان از ۋاقىت ىشىندە قول جەتكىزىلگەن. ال ەلدەگى ۆاكتسينانىڭ العاشقى دوزاسى 2021 جىلى 16 قاڭتاردا سالىنا باستاعان. بۇل 1 ميلليارد ۆاكتسينا دوزاسىنىڭ بارلىعى دەرلىك ءۇندىستاندا جاسالعانىن ايتا كەتكەن ءجون.
وسىعان بايلانىستى ءۇندىستاننىڭ قازاقستان رەسپۋبليكاسىنداعى ەلشىسى شۋبدحارشيني تريپاتي پىكىر ءبىلدىردى.
– قازىرگىدەي كۇردەلى كەزەڭگە قاراماستان, ءۇندىستان ماڭىزدى مەجەگە از ۋاقىت ىشىندە قول جەتكىزدى. ەلىمىزدىڭ مۇنداي جەتىستىككە جەتۋى تياناقتى جوسپارلاۋدىڭ, جۇزەگە اسىرۋدىڭ, كاسىبي عىلىمي-زەرتتەۋ جۇمىستارىنىڭ ناتيجەلى بولعانىن كورسەتەدى, – دەدى ءۇندىستاننىڭ قازاقستانداعى ەلشىسى.
ول سونداي-اق ءۇندىستان الەمنىڭ 150-دەن استام ەلىمەن ءوزىنىڭ رەسۋرسىمەن, ءبىلىمى, تاجىريبەسىمەن جانە ءدارى-دارمەكپەن بولىسكەنىن مالىمدەدى.
ەلدىڭ پرەمەر-ءمينيسترى بۇل ناتيجەنى ۇلكەن جەتىستىككە بالاپ, ء«ۇندى عىلىمىنىڭ جەڭىسىنە, 1,3 ميلليارد ءۇندى حالقىنىڭ ىسكەرلىگى مەن ۇجىمدىق رۋحىنا كۋا بولىپ وتىرمىز» دەپ جازدى Twitter پاراقشاسىندا.
ەلدە ىندەتتىڭ ءۇشىنشى تولقىنى بەلەڭ الۋى مۇمكىن دەگەن قورقىنىش ازايا باستادى. ال كوپتەگەن باستاۋىش سىنىپتارىنىڭ وقۋشىلارى 2020 جىلدىڭ ناۋرىزىنان باستاپ جابىلعان مەكتەپتەرىنە ورالا باستادى.
Johns Hopkins Bloomberg قوعامدىق دەنساۋلىق ساقتاۋ مەكتەبىندە جۇمىس ىستەيتىن نيۋ-دەليدەگى ەپيدەميولوگ برايان ۆال بۇل وقيعانى ۇلكەن جەتىستىككە تەڭەدى. ونىڭ ويىنشا, ۆيرۋستىڭ جىلدام تارالۋى مەن جوعارى ۆاكتسينالاۋ دەڭگەيىن ەسكەرە وتىرىپ, ىندەتتىڭ ءۇشىنشى تولقىنى ەكىنشىسىمەن تەڭ نەمەسە ودان دا اۋىر بولۋى مۇمكىن دەگەن بولجامداردىڭ ورىندالۋى ەكىتالاي.
ءۇندىستاندا ءىرى ۆاكتسينا ءوندىرۋشى Serum ينستيتۋتى ورنالاسقانىنا قاراماستان قاڭتاردا باستالعان ۆاكتسينالاۋ پروتسەسى باياۋ جۇرگەن. وعان حالىقتىڭ ەكپە الۋعا نيەتىنىڭ تومەندىگى مەن جەتكىزۋ ماسەلەلەرى قوسىلعان. الايدا «دەلتا» شتامى تاراعاننان باستاپ ۆاكتسيناعا دەگەن سۇرانىس كۇرت وسكەن.
ءۇندىستان 18 جاسقا دەيىنگى بالالاردى ۆاكتسينالاۋدى ءالى باستاعان جوق, بۇل ەل حالقىنىڭ 40 پايىزىن قۇرايدى. سونداي-اق تۇرعىندار اراسىندا ىندەتتەن تولىق قورعايتىن ۆاكتسينانىڭ ەكىنشى كومپونەنتىن الۋعا دەگەن ىنتانىڭ ازايا باستاعانى دا ايتىلا باستادى. بيلىك وكىلدەرى دە بۇل ماسەلەدەن حاباردار. سول سەبەپتى ۇكىمەت ايماق باسشىلارىن ۆاكتسينانىڭ ەكىنشى دوزاسىن سالۋدى نازارعا الۋعا شاقىردى. جانە ەكى دوزا اراسىنداعى ۇلكەن ايىرماشىلىقتى جويۋدىڭ جولدارى قاراستىرىلىپ جاتقانى دا حابارلانعان.
ىندەت ورشىگەن تۇستا حالىق ۆاكتسيناعا مۇقتاج بولىپ, ەكپە الۋعا اسىققان, ال تولقىن اياقتالىپ, جاعداي جاقسارا باستاعاندا ادامدار بۇرىنعى ءومىر ىرعاعىنا قايتا ورالىپ, ەكپەنىڭ ەكىنشى بولىگىن الۋدى ۇمىتىپ تا كەتكەن سەكىلدى.
ءۇندىستاندا پاندەميا باستالعالى بەرى 34 ميلليون ادام ىندەت جۇقتىرعان جانە 450 مىڭنان استامى قايتىس بولعان. تاۋەلسىز ەپيدەميولوگتەر ۆيرۋستىڭ تارالۋى مەن ءولىم-ءجىتىمنىڭ ناقتى سانى رەسمي ستاتيستيكادان الدەقايدا جوعارى بولۋى مۇمكىن دەپ ەسەپتەيدى.
دەگەنمەن ءۇندىستان از ۋاقىتتا جەتكەن, ياعني جوعارىدا اتالعان ناتيجەنى جاقسىلىققا بالاپ, ىندەتتىڭ تارالۋىن ازايتادى دەپ ۇمىتتەنىپ وتىر.
