ال ەندى وسىلاردىڭ ءىشى-سىرتىن جوندەپ, ىسكە جاراتسا, قازىرگى تاڭدا وتكىر تۇرعان باسپانا ماسەلەسىن ءتيىمدى شەشۋدىڭ ءبىر جولى بولادى دا شىعادى. ماسەلەن, بۇقار جىراۋ اۋدانىنداعى دوسكەي اۋىلىندا ءدال وسىنداي توعىز كوپقاباتتى ءۇي كۇردەلى جوندەۋدەن ءوتىپ, قالپىنا كەلتىرىلگەن. بۇل دەگەنىڭىز – 508 پاتەر. ەكى جىل بويى جۇرگىزىلگەن جۇمىس قازىر جەمىسىن بەرە باستاعان.
ەسكى دە جاڭا پاتەرگە يە بولعان ماريا ساريدي ەسىمدى جەرگىلىكتى تۇرعىن جالعىزباستى انا رەتىندە باسپانا كەزەگىندە جەتى جىلعا جۋىق تۇرىپتى.
– باسپانالى بولۋدان ءۇمىت ۇزگەن كەزدە قولىما پاتەر كىلتى ءتيدى. ۇلىم ەكەۋمىزدىڭ باقىتتان باسىمىز اينالدى. ءۇي جىلى, ءتىپتى كىرەبەرىستە دە باتارەيالار ىستىق بولىپ تۇرادى. بارلىق كوممۋنالدىق يگىلىكتەر بار. ماعان ەكى بولمەلى پاتەر ساتىپ الۋ قۇقىعىمەن جالعا بەرىلدى. بەس جىل ىشىندە ونىڭ يەسى بولا الامىن. ايىنا 3 مىڭ تەڭگەگە جۋىق جالداۋ اقىسىن تولەيمىن, – دەيدى ول باقىتتان ءجۇزى بال-بۇل جانىپ.
جالپى, بۇقار جىراۋ اۋدانىندا باسپانا كەزەگىندە تۇرعانداردىڭ سانى 1 100 ادام ەكەن. مۇنىڭ 139-ى دوسكەي اۋىلدىق وكرۋگىنىڭ تۇرعىندارى. ال بۇل اۋىلدا كەلەسى جىلى 40 جانە 60 پاتەرلىك ەكى كوپقاباتتى ءۇي پايدالانۋعا بەرىلەدى دەپ جوسپارلانعان.
ايتا كەتەتىن ءبىر جايت, قالپىنا كەلتىرىلگەن كوپقاباتتى ۇيلەرگە بارلىق ينجەنەرلىك يگىلىك, سونىڭ ىشىندە ورتالىقتاندىرىلعان جىلۋ جەلىلەرى تارتىلعان. «جۇمىسپەن قامتۋدىڭ جول كارتاسى» باعدارلاماسى اياسىندا مودۋلدىك قازاندىق ورناتىلعان. ەكى قازاندىقتىڭ قۋاتى بەس ءۇيدى جىلىتۋعا جەتكىلىكتى. بارلىق كوپقاباتتى ۇيلەر قالپىنا كەلتىرىلگەندە, تاعى ءبىر قازاندىق ىسكە قوسىلماق.
بۇقار جىراۋ اۋدانىنىڭ اكىمى سەرجان ايماقوۆ كەلەسى جىلى پايدالانۋعا بەرىلەتىن ۇيلەردىڭ دە اۋلالارى اباتتاندىرىلىپ, جولىنا اسفالت توسەلەتىنىن ايتادى. «اسىرەسە ءبىز بالالاردىڭ سالاماتتى ءومىر سالتىن سەرىك ەتىپ, سپورتپەن اينالىسۋىنا بارلىق جاعداي جاسايمىز. اۋلالاردا ويىن جانە سپورت الاڭدارى ورنالاسىپ, فۋتبول كورتى قويىلادى», دەيدى
اۋدان اكىمى.
