كونە شاھارداعى «بالاساعۇن» ورتالىق كونتسەرت زالىنىڭ الدىنا كيىز ءۇي تىگىلىپ, كوركەمونەرپازدار ءان مەن كۇيدەن شاشۋ شاشتى. سونىمەن قاتار تالاس اۋدانىنىڭ اۋىلشارۋاشىلىق ونىمدەرىنىڭ جارمەڭكەسى ۇيىمداستىرىلدى. جارمەڭكەگە اۋداننان 2 توننا كارتوپ, 1 توننا كوكونىس, 300 كگ جىلقى ەتى, 500 كگ قوي ەتى, 250 كگ سيىر ەتى, 300 كگ ءسۇت ونىمدەرى مەن 200 كگ بالىق جانە «ابدراحمانوۆا» جەكە كاسىپكەرلىگىنىڭ ءتاتتى ونىمدەرى قويىلدى.
اتالعان شاراعا جامبىل وبلىسىنىڭ اكىمى بەردىبەك ساپارباەۆ ارنايى كەلىپ قاتىستى. تالاس اۋدانىنىڭ اكىمى قاناتبەك مادىبەك ءوڭىر باسشىسىن اۋدان كۇندەرى اياسىندا ۇيىمداستىرىلعان جۇمىستارمەن تانىستىردى. وبلىس اكىمى اۋەلى اۋداندىق ورتالىق كىتاپحانا ۇيىمداستىرعان كىتاپ كورمەسىن ارالاپ كوردى. ودان كەيىن ب.ساپارباەۆ اۋداندىق ولكەتانۋ مۇراجايىنىڭ كورمەسىنە قويىلعان تاريحي جادىگەرلەرمەن تانىستى. اۋدان كۇندەرى اياسىندا «بالالار ونەر مەكتەبى» ۇستازدارىنىڭ ونەرىن تاماشالاعان وبلىس باسشىسى ولارعا جوعارى باعاسىن بەردى. سونداي-اق اۋدان كۇندەرىنە كەلگەن كوپشىلىك ۇلتتىق سپورت تۇرلەرىنەن ۇيىمداستىرىلعان جارىستاردى تاماشالاپ, ۇلتتىق ەتنومادەني ورتالىقتاردىڭ جانە قولونەر شەبەرلەرىنىڭ كورمەلەرىن كوردى. بۇدان ءارى تالاس توپىراعىنىڭ تالانتتى انشىلەرى اسەم اننەن شاشۋ شاشتى. كونتسەرتكە ارنايى شاقىرتىلعان ەلىمىزگە بەلگىلى ونەر ادامدارى جىگەر اۋپباەۆ پەن سارا امانگەلدى كوپشىلىكتىڭ ىقىلاسىنا بولەندى. ءىس-شارا بارىسىندا تالاس اۋدانىنىڭ اكىمدىگى ارنايى تىككەن ون التى قانات الىپ كيىز ءۇيدى تاراز قالاسىنا كونە شاھاردىڭ كەرەگەسى كەڭ بولسىن دەگەن جاقسى نيەتپەن سىيعا تارتتى. جالپى, بۇعان دەيىن دە تالاس اۋدانى وبلىس اكىمىنىڭ باستاماسىمەن قولعا الىنعان «تارازعا تارتۋ» جوباسى اياسىندا قازىبەك بي كوشەسىنىڭ بويىنان بالالار ويىن الاڭشاسى مەن Street workout سالىپ بەرگەن بولاتىن.
قازاق حالقىندا قولدا بارىن وزگەمەن ءبولىسۋ, كومەك قولىن سوزۋ, جومارتتىق تانىتۋ ىزگى قاسيەت بولىپ سانالادى. عاسىرلار بويى قازاق دالاسىندا جالعاسىپ كەلە جاتقان وسىناۋ ءداستۇردىڭ جەلىسى ۇزىلمەي, بۇگىنگە جەتىپ وتىر. وبلىس اكىمى ب.ساپارباەۆتىڭ باستاماسىمەن قولعا الىنعان «جومارت تۇلەك» جوباسى دا بۇگىندە ءوز جەمىسىن بەرۋدە. اۋليەاتا وڭىرىنەن شىققان بەلگىلى ازاماتتار اۋىلدىڭ گۇلدەنۋىنە, دامۋىنا وزدەرىنىڭ ۇلەسىن قوسىپ كەلەدى.
تالاس اۋدانى تۇرىمقۇل ەلدى مەكەنىنىڭ ازاماتتارى ۇيىمداسىپ, ەلگە, جەرگە دەگەن پەرزەنتتىك قۇرمەتىن ىستەرىمەن كورسەتتى. تۋعان جەرگە تۋ تىگۋدى ماقسات ەتكەن تۇلەكتەر ءوز قاراجاتتارىنا اۋىلدان سوعىس ارداگەرلەرىنە ارناپ «ماڭگىلىك الاۋ» ەسكەرتكىشى, بالالار ويىن الاڭى, «ويىق بابا» مەشىتى جانە سۋبۇرقاق سياقتى بىرنەشە نىسان سالىپ, ەل يگىلىگىنە بەردى. اۋىلدان وسىنداي نىسانداردىڭ سالىنعانىنا جەرگىلىكتى تۇرعىندار دا ريزاشىلىقتارىن بىلدىرۋدە. ال اۋىلدان شىققان اتىمتاي جومارت ازاماتتار بۇل جۇمىسىن تاۋەلسىزدىكتىڭ 30 جىلدىعىنا ارناپ وتىر. اتالعان شاراعا اقمولا وبلىستىق سوتىنىڭ توراعاسى دوسجان ءامىروۆ, قازاقستان مۇسىلماندارى ءدىني باسقارماسىنىڭ جامبىل وبلىسى بويىنشا وكىلى بەيبىت مىرزاگەلديەۆ, تالاس اۋداندىق ارداگەرلەر كەڭەسىنىڭ توراعاسى جۇمابەك اسەموۆ, اۋىل قارياسى ءازىمباي بايتەنوۆ جينالعان كوپشىلىككە تىلەكتەستىك ءبىلدىرىپ, وسىناۋ يگى ءىستىڭ اۋىلدا اتقارىلۋى ورىندى ەكەنىن جەتكىزدى. ال تالاس اۋدانىنىڭ اكىمى ق.مادىبەك اۋىلدىڭ دامۋىنا ۇلەس قوسقان ازاماتتارعا جامبىل وبلىسى اكىمىنىڭ جانە تالاس اۋدانى اكىمىنىڭ قۇرمەت گراموتاسى مەن العىسحاتىن تابىس ەتتى. سونىمەن قاتار كاسىپكەر ماقۇلبەك مىرزاقۇلوۆ «شىڭعىسحان» شارۋا قوجالىعىنىڭ اتىنان جاڭا مەشىتتىڭ جۇمىسىنا اتسالىسقان ازاماتتارعا سىي-سياپات جاساپ, قۇرمەت كورسەتتى. اۋىلدىقتاردىڭ ۇيىمشىلدىعىنىڭ ناتيجەسىندە «ويىق بابا» مەشىتى ءبىر جارىم جىلعا جۋىق ۋاقىت ىشىندە تولىعىمەن اياقتالدى. جالپى قۇنى 80 ملن تەڭگەگە سالىنعان مەشىتكە قارجىلاي دەمەۋشىلىك تانىتقان دا م.مىرزاقۇلوۆ ەكەنىن ايتا كەتكەن ءجون. جيىندا جيەمبەت بەگادىلوۆ اۋىلدىق ىنىلەرىنىڭ اتىنان م.مىرزاقۇلوۆقا ات مىنگىزىپ, شاپان جاپتى. بۇدان كەيىن جينالعان كوپشىلىك «ماڭگىلىك الاۋ» ەسكەرتكىشىنىڭ, بالالار ويىن الاڭىنىڭ, «ويىق بابا» مەشىتىنىڭ جانە سۋبۇرقاقتىڭ اشىلۋ ءساتىن تاماشالادى.
اۋىلدان شىققان سوعىس ارداگەرلەرىنىڭ ەسىمدەرى جازىلعان «ماڭگىلىك الاۋ» ەسكەرتكىشىن «ارالبەك» شارۋا قوجالىعىنىڭ توراعاسى ەرلان ارالبەكوۆ ءوز قاراجاتى ەسەبىنەن سالىپ بەرىپ وتىر. نىساننىڭ قۇرىلىسىنا 5,5 ملن تەڭگە جۇمسالعان. ال «نۇرتاس» شارۋا قوجالىعىنىڭ توراعاسى نۇرداۋلەت سارسەن 3,5 ملن تەڭگەگە بالالار ويىن الاڭىن سالسا, «باستاۋباي» شارۋا قوجالىعىنىڭ توراعاسى عالىم باستاۋباەۆ سۋبۇرقاقتىڭ قۇرىلىسىنا ءوز ەسەبىنەن 2,5 ملن تەڭگە ءبولىپ, ەل يگىلىگىنە بەردى. تۋعان جەرگە دەگەن پەرزەنتتىك پارىزىن سوزبەن عانا ەمەس, ىسپەن دە دالەلدەپ جۇرگەن ازاماتتار اۋىلدى كوركەيتۋ شارالارى مۇنىمەن شەكتەلمەيتىنىن, الداعى ۋاقىتتا دا جالعاسىن تاباتىنىن ايتىپ وتىر. ەندى تۇرلىباي اۋىلىنان اۋىل جاستارى ءۇشىن سپورت الاڭى مەن قىستىق سپورت زالى سالىنادى. سالتاناتتى جيىننان سوڭ كوپشىلىك كوركەمونەرپازداردىڭ ۇيىمداستىرۋىمەن كونتسەرتتىك باعدارلامانى تاماشالادى. شارا سوڭى الامان بايگە, تاي بايگە سياقتى ۇلتتىق ويىندارعا ۇلاستى. بايگەدەن وزا شاۋىپ كەلگەن جۇيرىكتەرگە ۇيىمداستىرۋشىلار تاراپىنان قارجىلاي سىيلىقتار مەن ارنايى جۇلدەلەر تابىستالدى.
