اۋىل شارۋاشىلىعى ءمينيسترى ەربول قاراشوكەەۆتىڭ ايتۋىنشا, بۇل قۇجات مەملەكەت باسشىسىنىڭ تاپسىرماسى بويىنشا ازىرلەنگەن, ول كۇش-جىگەر مەن رەسۋرستاردى شوعىرلاندىرۋدى قاجەت ەتەتىن ناقتى, توراپتىق مىندەتتەر مەن جوبالاردى شەشۋگە باعىتتالعان. «ۇلتتىق جوبانى ازىرلەۋ كەزىندە اگروونەركاسىپتىك كەشەندى دامىتۋداعى جاھاندىق سىن-قاتەرلەر مەن الەمدىك ترەندتەر, بۇدان بۇرىنعى مەملەكەتتىك جانە سالالىق باعدارلامالاردى ىسكە اسىرۋ قورىتىندىلارى ەسكەرىلدى. ۇلتتىق جوبانى ازىرلەۋگە بۇۇ جانىنداعى حالىقارالىق FAO ازىق-ت ۇلىك ۇيىمىنىڭ ساراپشىلارى, سالالىق وداقتاردىڭ, قاۋىمداستىقتاردىڭ, عىلىمنىڭ وكىلدەرى تارتىلدى», دەدى ول.
مەملەكەت باسشىسىنىڭ تاپسىرمالارىنا سايكەس ۇلتتىق جوبانىڭ مىناداي نەگىزگى مىندەتتەرى ايقىندالدى: اۋىل شارۋاشىلىعىنداعى ەڭبەك ونىمدىلىگىن 2,5 ەسە ارتتىرۋ; قازاقستان رىنوگىن وتاندىق ءوندىرىستىڭ نەگىزگى ازىق-ت ۇلىك تاۋارلارىمەن قامتاماسىز ەتۋ; وڭدەلگەن ءونىم ۇلەسىن 70%-عا دەيىن جەتكىزە وتىرىپ, اگروونەركاسىپتىك كەشەن ونىمدەرىنىڭ ەكسپورتىن 2 ەسەگە ۇلعايتۋ; 7 ءىرى ەكوجۇيە قالىپتاستىرۋ جانە ينۆەستيتسيالىق جوبالاردى ىسكە اسىرۋ ەسەبىنەن 1 ملن اۋىل تۇرعىنىنىڭ تابىسىن تۇراقتى ارتتىرۋ.
ەڭبەك ونىمدىلىگىن 2,5 ەسە ارتتىرۋ ماقساتىنا قول جەتكىزۋ ءۇشىن جوعارى ساپالى تۇقىمداردى, مينەرالدى تىڭايتقىشتاردى, زاماناۋي تەحنيكا مەن تەحنولوگيانى, سۋارمالى ەگىنشىلىكتى جانە ت.ب. قولدانۋ قاجەت. سونداي-اق تۇقىم شارۋاشىلىعىن مەملەكەتتىك قولداۋ شارالارىن ىسكە اسىرۋ, تۇقىمداردى قاداعالاۋ جۇيەسىن قۇرۋ, تۇقىم ءوسىرۋ
شارۋاشىلىقتارىن قازىرگى زامانعى تەحنيكامەن جانە جابدىقتارمەن تەحنيكالىق جاراقتاندىرۋ ەسەبىنەن دامىتۋ جوسپارلانىپ وتىر.
مينەرالدى تىڭايتقىشتاردى قولدانۋ دەڭگەيىن ارتتىرۋ ماقساتىندا ونەركاسىپتىك ءوندىرىستىڭ ورگانيكالىق تىڭايتقىشتارىن سۋبسيديالاۋ جانە اگروحيميالىق قىزمەتتىڭ رەسپۋبليكالىق عىلىمي-ادىستەمەلىك ورتالىعىنىڭ قىزمەتى مەن ماتەريالدىق-تەحنيكالىق بازاسىن جەتىلدىرۋ كوزدەلگەن.
وسى شارالاردىڭ قابىلدانۋى جوعارى ساپالى تۇقىمداردى پايدالانۋ ۇلەسىن قاجەتتىلىكتىڭ 93%-ىنان 98%-ىنا دەيىن, مينەرالدى تىڭايتقىشتاردى قولدانۋ دەڭگەيىن 20%-دان 29%-عا دەيىن ارتتىرۋعا مۇمكىندىك بەرەدى. ناتيجەسىندە, ءداندى داقىلداردىڭ ونىمدىلىگى 10-15%-عا ارتادى.
تەحنيكالىق جاراقتاندىرۋ دەڭگەيىن ارتتىرۋ ماقساتىندا ينۆەستيتسيالىق سۋبسيديالاۋ جالعاسادى, اۋىل شارۋاشىلىعى تەحنيكاسى ليزينگىنىڭ باعدارلامالارى كەڭەيتىلەدى. ناتيجەسىندە, اۋىل شارۋاشىلىعى تەحنيكاسىن جاڭارتۋ دەڭگەيى 4%-دان 6%-عا دەيىن ارتادى.
سۋ ۇنەمدەۋ تەحنولوگيالارىن كەڭىنەن ەنگىزۋ, سۋ بەرۋدى سۋبسيديالاۋ تەتىگىن جەتىلدىرۋ جونىندە شارالار قابىلدانادى, قازاقستاندا دەمونستراتسيالىق فەرمالار جەلىسىن قۇرۋ جانە قۋاتى جىلىنا 1 مىڭ قوندىرعىعا دەيىنگى قازىرگى زامانعى سۋارۋ جۇيەلەرىن شىعاراتىن زاۋىت سالۋ جوباسى ىسكە اسىرىلادى. بۇل سۋ ۇنەمدەۋ تەحنولوگيالارى قولدانىلاتىن الاڭداردى 450 مىڭ گەكتارعا دەيىن ۇلعايتۋعا مۇمكىندىك بەرەدى.
يمپورتقا تاۋەلدىلىكتى تومەندەتۋ جانە مال شارۋاشىلىعى ءونىمىنىڭ ەكسپورتىن ارتتىرۋ ماقساتىندا قارقىندى مال شارۋاشىلىعىنا كوشۋ جالعاستىرىلادى. بۇل ءۇشىن فەرمەرلىك شارۋاشىلىقتارعا مال ساتىپ الۋعا كرەديت بەرۋ كولەمىن ۇلعايتۋ, ازىق ءوندىرىسىن ىنتالاندىرۋ, شالعايداعى مال شارۋاشىلىعىن جانە جايىلىمداردىڭ ينفراقۇرىلىمىن دامىتۋ, سونداي-اق سەلەكتسيانىڭ قازىرگى زامانعى ادىستەرىن, ونىڭ ىشىندە جاساندى ۇرىقتاندىرۋ مەن ەمبريونداردى تەلۋدى ەنگىزۋدى ىنتالاندىرۋ جوسپارلانۋدا. بۇل وڭدەۋشى كاسىپورىنداردىڭ جۇكتەمە قۋاتتىلىقتارىن 100% قامتاماسىز ەتۋگە, سونداي-اق مال مەن قۇستىڭ ونىمدىلىگىن ارتتىرۋعا مۇمكىندىك بەرەدى.
وبلىستىق دەڭگەيدە بىلىكتىلىكتى دامىتۋ ورتالىقتارى جانە اۋداندىق دەڭگەيدە اۋىلدىق اقپاراتتىق-كونسۋلتاتسيالىق ورتالىقتاردى جاڭعىرتۋ ەسەبىنەن, سونداي-اق فەرمەرلەردىڭ بىلىكتىلىگىن قاشىقتان ارتتىرۋدىڭ قازىرگى زامانعى نىساندارىن ەنگىزۋ ارقىلى اگروونەركاسىپتىك كەشەن سۋبەكتىلەرىنە ءبىلىم تاراتۋ جۇيەسى جەتىلدىرىلەدى. «اگرارلىق عىلىمدى قارجىلاندىرۋدىڭ جەتكىلىكتىلىگىن قامتاماسىز ەتۋ جۇمىسى جالعاستىرىلادى, سالالىق گرانتتىق قارجىلاندىرۋ ەنگىزىلەدى, سونداي-اق اگروونەركاسىپتىك كەشەنگە جان-جاقتى تالداۋ جۇرگىزۋ, پەرسپەكتيۆالارىن باعالاۋ, دامۋىن بولجاۋ ءۇشىن مينيسترلىكتىڭ احۋالدىق-تالدامالىق ورتالىعىن قۇرىپ, جۇمىس ىستەتۋ جوسپارلانۋدا. كوروناۆيرۋس پاندەمياسى ىشكى نارىقتى قامتاماسىز ەتۋ باستى مىندەت ەكەنىن كورسەتىپ بەردى. سوندىقتان باسىم ەكسپورتتىق ساياساتپەن قاتار, يمپورتتى الماستىرۋ ماسەلەلەرى دە كەشەندى تۇردە شەشىلەدى. مينيسترلىك ەڭ كوپ يمپورتتالاتىن پوزيتسيالاردى ايقىندادى, بۇلار – قۇس ەتى, شۇجىق ونىمدەرى, ىرىمشىك پەن سۇزبە, الما, قانت پەن بالىق», دەدى ە.قاراشوكەەۆ.
بۇگىنگى تاڭدا وسى باعىتتاردىڭ ارقايسىسى بويىنشا ناقتى ينۆەستيتسيالىق جوبالار ايقىندالىپ, ىسكە اسىرىلۋدا. قويىلعان ماقساتقا قول جەتكىزۋ ءۇشىن بىرقاتار مەملەكەتتىك قولداۋ شاراسى, ونىڭ ىشىندە جەڭىلدىكتى كرەديت بەرۋ, سۋبسيديالاۋ, جەر رەسۋرستارىمەن, ينفراقۇرىلىممەن, ىشكى نارىقتى قورعاۋ شارالارىمەن قامتاماسىز ەتۋ ىسكە اسىرىلادى. ناتيجەسىندە, 2024 جىلعا قاراي قانتتى قوسپاعاندا, وسى ءونىم تۇرلەرى بويىنشا قامتاماسىز ەتىلۋ 100%, ال قانت بويىنشا 80%-دى قۇرايدى.
ۇلتتىق جوبانىڭ باسىم باعىتتارىنىڭ ءبىرى وڭدەلگەن اۋىل شارۋاشىلىعى ونىمدەرىنىڭ ءوندىرىسى مەن ەكسپورتىن دامىتۋ بولماق. بۇل ءۇشىن جۇمىس ىستەپ تۇرعان كاسىپورىنداردى تولىق جۇكتەۋدى, قازىرگى زامانعى كاسىپورىندار سالۋدى جانە جۇمىس ىستەپ تۇرعان كاسىپورىنداردى جاڭعىرتۋدى كوزدەيتىن شارالار كەشەنى ازىرلەندى. بۇگىنگى تاڭدا ينۆەستيتسيالىق جوبالار پۋلىنداعى 194 جوبا – وڭدەۋ ءوندىرىسىنىڭ قوسىمشا ءوسۋىن جانە تيىسىنشە قوسىمشا ەكسپورت كولەمىن قامتاماسىز ەتۋگە مۇمكىندىك بەرەتىن جاڭا جوبالار. وسىلاردىڭ ءبارى قوسىلا كەلىپ, اگروونەركاسىپتىك كەشەن ەكسپورتىنىڭ جالپى كولەمىندەگى وڭدەلگەن ءونىم ۇلەسىن 70%-عا دەيىن جەتكىزە وتىرىپ, اگروونەركاسىپتىك كەشەن ونىمدەرىنىڭ ەكسپورتىن 2 ەسەگە ۇلعايتۋ تۋرالى العا قويىلعان ماقساتقا قول جەتكىزۋگە مۇمكىندىك بەرەدى.
مەملەكەت باسشىسىنىڭ تاپسىرماسى بويىنشا ۇلتتىق جوبانىڭ باسىمدىعى ەت, جەمىس, كوكونىس, قانت, ءداندى, مايلى داقىلدار, ءسۇت ونىمدەرىن ءوندىرۋ مەن وڭدەۋدى قوسا العاندا, ءىرى ينۆەستيتسيالىق جوبالاردىڭ اينالاسىندا 7 ەكوجۇيە قالىپتاستىرۋ بولماق. بۇل قوسىلعان قۇنى جوعارى تۇپكىلىكتى قازاقستاندىق ءونىم جاساۋعا قاتىسا الاتىن كەمىندە 350 مىڭ فەرمەرلىك جانە ءۇي شارۋاشىلىقتارىن ىسكە تارتۋعا مۇمكىندىك بەرەدى. «جالپى, 5 جىل ىشىندە 4,1 ترلن تەڭگەگە 582 ينۆەستيتسيالىق جوبانى ىسكە اسىرۋ جوسپارلانىپ وتىر. جالپى, ۇلتتىق جوبانى ىسكە اسىرۋ ناتيجەسىندە بەس جىل ىشىندە ەڭبەك ونىمدىلىگىن 2,5 ەسەگە ارتتىرۋ, 500 مىڭ ادامدى جۇمىسپەن قامتاماسىز ەتۋ, وسىلايشا 1 ملن اۋىل تۇرعىنىنىڭ تابىسىن ارتتىرۋ جوسپارلانۋدا», دەدى اۋىل شارۋاشىلىعى ءمينيسترى.
