سوڭعى اپتادا العاشقى سايكەس مەرزىممەن سالىستىرعاندا دەرتكە شالدىعۋ دەڭگەيى 1,6 پايىزعا وسكەن. دەرت دەندەگەن دەرەكتەردى ساراپتاساڭىز, قازان ايىندا قاۋىپ-قاتەردىڭ بۇرىنعىدان الدەقايدا كوبەيە تۇسكەنىن ايقىن اڭعارۋعا بولادى. اسىرەسە, وبلىس ورتالىعىندا, بۋراباي, ارشالى, بۇلاندى اۋداندارى مەن ستەپنوگورسك قالاسىندا ىندەت ءورشىپ تۇر. وتكەن تاۋلىكتە ينفەكتسيا جۇقتىرعان 110 ادام انىقتالدى. ولاردىڭ 94-ءى سيمپتومدى بولسا, 16-ى سيمپتومسىز. قازىر 474 ادام اۋرۋحانادا ەمدەلىپ جاتسا, جانساقتاۋ بولىمشەسىنە 43 ناۋقاس ءتۇستى.
جاڭا وقۋ جىلىنان باستاپ ءبىلىم وشاقتارىنداعى جاعداي دا كۇردەلى. وندا 584 جاعداي تىركەلسە, 173-ءى مەكتەپتەن تىس جەردە ىندەتكە ىلىككەندەر. ساقتىق شارالارى بۇلجىتپاي ورىندالىپ وتىر دەگەنىمەن وتكەن تاۋلىكتە عانا 14 وقۋشى دەرت شەڭگەلىنە ىلىككەن. 48 ءبىلىم بەرۋ ۇيىمىندا كوروناۆيرۋس ينفەكتسياسىنىڭ تىركەلۋىنە بايلانىستى 65 سىنىپ قاشىقتان وقىتۋعا كوشىرىلدى. مۇعالىمدەر اراسىندا دا اۋىرعاندار سانى كۇننەن-كۇنگە ءوسىپ كەلەدى. جاڭا وقۋ جىلىنان بەرى 142 مۇعالىم اۋرۋعا شالدىققان. مەكتەپ جاسىنا دەيىنگى بالالاردىڭ اۋرۋعا شالدىعۋى الاڭداۋشىلىق تۋعىزۋدا. كۇن سايىن كىشكەنتاي بالالاردىڭ اۋرۋ دەرەكتەرى شىعىپ جاتىر.
ءبىزدىڭ پايىمداۋىمىزشا, ىندەتتىڭ ەتەك الۋى ءوزىمىزدىڭ بەيقامدىعىمىزدان. قازىر داۋاسىز دەرتتىڭ قاۋپىنە ەلدىڭ ەتى ۇيرەنىپ كەتكەن سىڭايلى. ءتىپتى, ىندەتتى ەلەمەي اس بەرۋ, توي جاساۋ, تۋعان كۇندەرىن اتاپ ءوتۋ تىيىلماي وتىر. جىل باسىنان بەرى مونيتورينگتىك توپتار 28 944 نىساندا ساقتىق شارالارىنىڭ ساقتالۋ دەڭگەيى قانشالىقتى ەكەنىن تەكسەرگەن. تەكسەرىس ناتيجەسىندە 624 تالاپ بۇزۋشىلىق انىقتالعان. وسى ايدا 468 نىسان تەكسەرىلىپ, كارانتيندىك شارالاردى بۇزۋدىڭ 17 فاكتىسى بەلگىلى بولىپ وتىر. بۇل انىقتالعاندارى عانا, ايتپەسە وبلىس ورتالىعىنداعى مەيرامحانالار مەن ءدامحانالاردىڭ الدىندا جۇزدەگەن كولىكتىڭ قاڭتارىلىپ تۇرعانىن كوز كورىپ ءجۇر.
شاعىن جانە ورتا بيزنەسكە, سونداي-اق جەكە تۇلعالارعا قاتىستى كارانتين شارالارىن بۇزعانى ءۇشىن اكىمشىلىك شارالار قولدانىلۋدا. جالپى, كولەمى 864 ملن تەڭگە بولاتىن 654 ايىپپۇل سالىنىپ, 16 ماتەريال اكىمشىلىك سوتتىڭ قاراۋىنا جىبەرىلگەن. 27 قىركۇيەكتەن باستاپ قاۋىپسىز مارتەبەسى بار كەلۋشىلەردىڭ قاتىسۋىمەن وتباسىلىق سالتاناتتى شارالار, ۇيلەنۋ تويلارى مەن مەرەيتويلاردى وتكىزۋگە رۇقسات بەرىلگەن بولاتىن. ارينە, شەكتەۋ بار. بىراق سونىڭ وزىندە دە وسى جەڭىلدىك دەرت دەڭگەيىنىڭ ازايماۋىنا سەبەپ بولىپ تۇرعان سىڭايلى. شىنتۋايتىندا كاسىبىنىڭ جايىن ويلاعان مەيرامحانا مەن ءدامحانا قوجايىندارى ۆەدومستۆولىق كوميسسيا قابىلداعان شەشىمدى ورىنداي بەرمەيدى. ءسوزىمىز دالەلدى بولۋى ءۇشىن مىسال كەلتىرە كەتەلىك. ماسەلەن وتكەن دەمالىس كۇندەرى تسەلينوگراد اۋدانىنىڭ مونيتورينگتىك توبى ادام سانى رۇقسات ەتىلگەن مولشەردەن اسقان ءۇش وقيعانى انىقتاعان. قوسشى قالاسىنداعى «ارۋجان پلازا» مەيرامحاناسىندا 160 ادام قاتىسقان ۇيلەنۋ تويى وتكىزىلىپتى. «باياندى» مەيرامحاناسىندا 150 اداممەن توي ۇيىمداستىرۋ دا ءتارتىپ بۇزۋشىلىق. ارقيلى بانكەتتەر وتكىزۋ كەزىندە دە Ashyq پلاتفورماسىنا قاتىسۋشىلار جۇمىس كەستەسىن بۇزىپ وتىر. قوياندى اۋىلىنداعى Ashyq توبىنا كىرمەيتىن «الاش» مەيرامحاناسىندا جۇزدەن استام ادامنىڭ قاتىسۋىمەن توي وتكەن. اتباسارداعى «دارينا» مەيرامحاناسىندا 70 قوناقتىڭ قاتىسۋىمەن تۋعان كۇن كەشى ۇيىمداستىرىلعان. مۇنداي مىسالداردى كوپتەپ كەلتىرۋگە بولادى. وسىدان شىعاتىن قورىتىندى, ادامداردىڭ وزدەرى ءتونىپ تۇرعان قاتەردى ەلەمەي, بەيقامدىق تانىتۋدا.
كارانتين تالاپتارىن بۇزۋشىلاردىڭ اششى ىشەكتەي شۇباتىلعان ءتىزىمىن كوكشەتاۋ قالاسى مەن بۋراباي جانە استراحان اۋداندارىنداعى بەتپەردە كيۋ تالابى ساقتالماعان نىساندارمەن تولىقتىرۋعا بولادى. قازىر ءوڭىر تۇرعىندارىنا بارلىق شەكتەۋ شارالارىن بۇلجىتپاي ورىنداۋ ۇسىنىلىپ وتىر. ءتىپتى وتباسىلارىندا دا شاعىن شارا وتكىزۋگە تىيىم سالىنعان.
«شىعاسىعا يەسى باسشى» دەگەندەي, شىرعالاڭعا ءتۇسىرىپ وتىرعان شىتىرماننىڭ ءتۇيىنىن ءتۇيىپ وتىرعان ءوزىمىز. باسقا تۇسكەن بەينەتتى باسقادان ەمەس, وزىمىزدەن كورىپ, تىيىلساق تا بولار ەدى. قاراقان باستىڭ قامى ءۇشىن عانا ەمەس, قارا ورمانداي قالىڭ ەلدىڭ اماندىق-ساۋلىعى ءۇشىن.
