پرەزيدەنت • 20 قازان، 2021

پرەزيدەنت ازىق-ت ۇلىك باعاسىنىڭ قىمباتتاۋىنا قاتىستى پىكىر ءبىلدىردى

82 رەت كورسەتىلدى

قاسىم-جومارت توقاەۆ قاراعاندى وبلىسىنا جۇمىس ساپارى اياسىندا جەزقازعان ءوڭىرىنىڭ الەۋمەتتىك دامۋى مەن مينەرالدى-شيكىزات بازاسىن كەڭەيتۋ جونىندەگى «قازاقمىس كورپوراتسياسى» جاۋاپكەرشىلىگى شەكتەۋلى سەرىكتەستىگىنىڭ جوسپارىمەن تانىستى، دەپ حابارلايدى Egemen.kz اقورداعا سىلتەمە جاساپ.

«قازاقمىس» كومپانيالار توبىنىڭ پرەزيدەنتى ۆلاديمير كيم مەملەكەت باسشىسىنا جەزقازعان كەن ورىندارىنداعى قازبا جۇمىستارىنىڭ اسەر ەتۋ ايماعىنان 2 815 وتباسىن كوشىرۋ جانە ينفراقۇرىلىم جۇرگىزۋ جۇمىستارىنىڭ اياقتالعانى تۋرالى باياندادى.

«قازاقمىس حولدينگ» ديرەكتورلار كەڭەسىنىڭ توراعاسى ەدۋارد وگاي مەملەكەت باسشىسىنا قازاقستان رەسپۋبليكاسىن 2025 جىلعا دەيىن دامىتۋدىڭ ۇلتتىق جوسپارى نەگىزىندە قاراعاندى وبلىسىنىڭ اكىمدىگىمەن بىرلەسە وتىرىپ، جەزقازعان مەن بالقاش وڭىرلەرىن دامىتۋدىڭ 2020-2025 جىلدارعا ارنالعان باعدارلاماسىنىڭ ازىرلەنگەنى جونىندە ايتتى. باعدارلامادا نەگىزگى ءۇش باعىت قامتىلعان: الەۋمەتتىك قىزمەتتەردىڭ دەڭگەيىن ارتتىرۋ، ينفراقۇرىلىمدى جەتىلدىرۋ جانە ەكونوميكالىق دامۋ.

سونداي-اق، قاسىم-جومارت توقاەۆقا سۋمەن قامتاماسىز ەتۋ جوبالارىن ىسكە اسىرۋدىڭ پەرسپەكتيۆالارى، ءبىلىم ساپاسىن ارتتىرۋ، ازىق-ت ۇلىك نارىعىنداعى باعالاردى تۇراقتاندىرۋ جونىندە ايتىلدى. سونداي-اق، كورپوراتسيانىڭ الەۋمەتتىك مىندەتتەمەلەردى ورىنداۋى جانە ينۆەستيتسيالىق جوبالاردى ىسكە اسىرۋى جونىندە مالىمەت بەرىلدى. كومپانيا ايماق تۇرعىندارى اراسىندا الەۋمەتتىك ساۋالناما جۇرگىزىپ، ءومىر ءسۇرۋدىڭ قولايلى جاعدايىن جاساۋعا نيەتتى. جەزقازعان مەن بالقاش وڭىرلەرىن وركەندەتۋدە ەلىمىزدىڭ دامىعان ايماعى سانالاتىن الماتى قالاسى ۇلگى بولماق.

ا

«جۇمىس ساپارى بارىسىندا مەملەكەت باسشىسىنا جەزقازعان قالاسىن ساپالى اۋىزسۋمەن قامتاماسىز ەتۋدىڭ قيىندىقتارى تۋرالى باياندالدى. ماسەلەنى شەشۋ ءۇشىن ءۇيتاس-ايدوس سۋقۇبىرىن قايتا جوندەۋدەن وتكىزىپ، قوجامسەيىت كەن ورنىندا جاڭا سۋقۇبىرىن سالۋ قاجەت. پرەزيدەنت ۇكىمەتكە جانە وبلىس اكىمدىگىنە اتالعان جوبانى 1،5 جىلدىڭ ىشىندە جۇزەگە اسىرۋدى تاپسىردى.زەرتتەۋ باعىتتارىڭىز دۇرىس دەپ ەسەپتەيمىن. سۋمەن قامتۋ – شەشۋدى قاجەت ەتەتىن ماڭىزدى الەۋمەتتىك ماسەلە. مەن جولداۋىمدا وسى تۋرالى ايتقانمىن. ۇكىمەت ءتيىستى تاپسىرما الدى. مەنىڭ ويىمشا، ۇكىمەت اكىمدىكپەن جانە سىزدەرمەن بىرلەسىپ، قىسقا مەرزىم ىشىندە، ارى كەتكەندە 1،5 جىلدا وسى ماسەلەنى شەشۋى كەرەك. ءبىز ازاماتتارىمىزدى تازا اۋىزسۋمەن قامتاماسىز ەتۋىمىز قاجەت. مەن بۇل ماسەلەنى ءوز باقىلاۋىما الامىن»، دەدى مەملەكەت باسشىسى.  

پرەزيدەنت «قازاقمىس» كورپوراتسياسىنىڭ ءبىلىم سالاسىنداعى جوبالارعا قولداۋ كورسەتىپ وتىرعانىن وڭ باعالادى.

«شىن مانىندە، ءبىلىم – مەملەكەتىمىزدىڭ بولاشاعى. بۇل جەردە، ەڭ الدىمەن، مۇعالىمدەر دايىنداۋعا كوڭىل ءبولىنۋى كەرەك»، دەدى قاسىم-جومارت توقاەۆ.  

مەملەكەت باسشىسى ازىق-ت ۇلىك باعاسىنىڭ قىمباتتاۋىنا جانە اۋىل شارۋاشىلىعىن سۋبسيديالاۋ ماسەلەسىنە قاتىستى پىكىر ءبىلدىردى.

«بۇل، ارينە، الەم نارىعىندا بولىپ جاتقان كۇردەلى ماسەلە. الەمدە بارلىق تاۋاردىڭ باعاسى شامامەن 40-50 پايىزعا قىمباتتادى. ءبىزدىڭ ەلىمىزدەگى قوردالانعان ماسەلەلەردىڭ سالدارىنان ازىق-ت ۇلىك قىمباتتاپ وتىر. بۇل ماسەلەنى شۇعىل شەشۋگە قانشا تىرىسساق تا، جاعدايدى وزدەرىڭىز دە كورىپ وتىرسىزدار. اتالعان ماسەلەنى جۇيەلى تۇردە شەشۋىمىز قاجەت. اۋىل شارۋاشىلىعى سالاسىنا قىرۋار قارجى بولسەك تە، ازىق-ت ۇلىكتىڭ باسىم بولىگىن سىرتتان الامىز. وزگە ەلدەر سۋبسيديانىڭ نە ەكەنىن دە بىلمەيدى. بىلسە دە، ءدال وسىنداي مول قارجى بولىنبەيدى. ءبىر جاعىنان ادامداردى بوساڭسىتىپ جىبەردىك، ەكىنشى جاعىنان سىبايلاس جەمقورلىققا جول بەرىپ الدىق. بۇل ماسەلەمەن تۇبەگەيلى اينالىسۋىمىز كەرەك. مەن ۇكىمەتكە، اۋىل شارۋاشىلىعىنىڭ جاڭا مينيسترىنە مىندەت جۇكتەدىم»، دەدى پرەزيدەنت.

ءىس-شارا بارىسىندا ەكولوگياعا جانە ءىرى كاسىپورىنداردىڭ شىعاراتىن قالدىقتارىنا قاتىستى ماسەلەگە نازار اۋدارىلدى.

ء«بىز 2060 جىلى كاربونيزاتسيا دەڭگەيىن نولگە تۇسىرەمىز دەپ جاريالادىق. ەكونوميكامىزدىڭ ەرەكشەلىگىن جانە ونىڭ قۇرىلىمىن ەسكەرۋىمىز قاجەت. ەنەرگيالىق تەڭگەرىمنىڭ 70 پايىزى كومىرگە تيەسىلى ەكەنى بەلگىلى. ءبىز ەرتەڭ ءبارىن جاۋىپ تاستاپ، كومىرتەگىنەن ارىلدىق دەپ ايتا المايمىز. بۇل سىزدەردىڭ كاسىپورىندارىڭىزعا دا قاتىستى. بىراق 2060 جىلعا قاراي كومىرتەگىنەن ارىلۋ باعىتى بويىنشا جۇرۋگە ءتيىسپىز. ايتپەسە، الەمدىك دامۋدىڭ كوشىنەن قالىپ قويامىز. بۇل نەگىزگى كاسىپورىنداردىڭ مۇددەسىن ەسكەرە وتىرىپ، ۇكىمەتكە جانە مەملەكەت باسشىسى رەتىندە ماعان دا جۇكتەلگەن اسا جاۋاپتى مىندەت»، دەدى قاسىم-جومارت توقاەۆ. 

جيىندى قورىتىندىلاي كەلە، پرەزيدەنت بارلىق بەكىتىلگەن باعىتتار بويىنشا مەملەكەت وتاندىق جەتەكشى كاسىپورىندارمەن بىرلەسىپ، ءتيىستى جۇمىستاردى بەلسەندى جالعاستىرۋى كەرەك ەكەنىن ايتتى.

ا

سوڭعى جاڭالىقتار

مەركەل قىزمەتىنەن كەتتى

ساياسات • بۇگىن، 17:30

ساراپشى گولوۆكيندى قاتتى سىناپ تاستادى

كاسىپقوي بوكس • بۇگىن، 16:15

ۇقساس جاڭالىقتار