تايلاندتاعى ۇكىمەت ءۇيى وپپوزيتسيا قورشاۋىنان بوساتىلدى

بۇگىن, تايلاند بيلىگى ەكى اي بويى وپپوزيتسيا وكىلدەرىنىڭ قورشاۋىندا بولعان بانگكوك ورتالىعىنداعى ۇكىمەت ءۇيىن ءوز باقىلاۋىنا الدى. بۇل تۋرالى ريا «نوۆوستي» حابارلادى. بۇدان بۇرىن تايلاند ۇلتتىق قاۋىپسىزدىك كەڭەسىنىڭ باسشىسى پارادورن پاتتاناتابۋت مالىمدەگەندەي, بيلىك ۇكىمەت ۇيىمەن قاتار تاعى ءتورت نىساندى ءوز باقىلاۋىنا الۋدى جوسپارلاپ وتىر. ونىڭ ىشىندە ىشكى ىستەر مينيسترلىگى ورتالىق اپپاراتىنىڭ عيماراتى دا بار.ۇكىمەت ءۇيىن بوساتۋ شاراسى بارىسىندا ەرەۋىلشىلەر ءتارتىپ ساقشىلارىنا قارسىلىق كورسەتپەگەن.«ۇكىمەت ءۇيىنىڭ قىزمەتكەرلەرى 17 اقپاننان باستاپ جۇمىسقا شىعادى», – دەپ مالىمدەدى ەڭبەك ءمينيسترى چالەرم يۋبامرۋنگ. تايلاندتاعى جاپپاي نارازىلىق اكتسيالارى وتكەن جىلدىڭ قاراشا ايىندا باستالعان ەدى. جەلتوقساندا ەرەۋىلشىلەر پارلامەنتتىڭ تاراتىلۋى مەن پرەمەر-مينيستر كابينەتىنىڭ وتستاۆكاعا كەتۋىنە قول جەتكىزدى. الايدا, 2 اقپاندا وتكەن پارلامەنت سايلاۋىنىڭ قورىتىندىسى بويىنشا, بۇرىنعى پرەمەر ينگلاك چيناۆاتتىڭ پارتياسى جەڭىسكە جەتتى. ايدار ورىسباەۆ. دەرەككوز: Ria.ru. فوتو: Ria.ru.