سپورت • 18 قازان، 2021

دانقتى بالۋاننىڭ ەسكەرتكىشى اشىلدى

193 رەت كورسەتىلدى

بيىل قازاقتىڭ ايگىلى بالۋانى قاجىمۇقان مۇڭايتپاس ۇلىنىڭ تۋعانىنا – 150 جىل. مادەنيەت جانە سپورت مينيسترلىگىنىڭ ۇيىتقى بولۋىمەن جىل باسىنان بەرى ەلىمىزدىڭ بارلىق ايماعىندا باتىر بابامىزدىڭ ەسىمىن ەل جادىندا جاڭعىرتۋ ماقساتىندا كوپتەگەن مادەني، سپورتتىق-بۇقارالىق، اقپاراتتىق-يميدجدىك ءىس-شارالار وتكىزىلىپ كەلەدى.

ال كۇنى كەشە ەلوردادا كۇش اتاسى قاجىمۇقاننىڭ ەسىمى بەرىلگەن وليم­پيا­دا رەزەرۆىنىڭ مامانداندىرىلعان رەس­پۋب­­­ليكالىق مەكتەپ-ينتەرنات-كول­لەد­جىن­دە داڭقتى بالۋاننىڭ ەسكەرتكىشى اشىلدى. سونىمەن قاتار مەرەيلى داتاعا وراي «جاس با­تىر» سپورت كەشەنىنە «قاجىمۇقان» اتاۋى بەرىلدى.

سالتاناتتى ءىس-شاراعا مادەنيەت جانە سپورت ءمينيسترى اقتوتى رايىمقۇلوۆا، نۇر-سۇلتان قالاسى اكىمىنىڭ ورىنباسارى ەرمەك قيزاتوۆ، گرەك-ريم كۇرەسىنەن ەكى دۇركىن وليمپيادا جۇلدەگەرى داۋلەت تۇرلىحانوۆ، پارلامەنت ءماجىلىسىنىڭ دەپۋتاتى باقىتبەك سماعۇل مەن بىرقاتار سپورت جانە قوعام قايراتكەرى قاتىستى.

ەسكەرتكىشتىڭ اشىلۋىندا ءسوز العان اقتوتى رايىمقۇلوۆا كۇش اتاسى قا­جى­مۇقان مۇڭايتپاس ۇلىنىڭ 150 جىل­دىعىن اتاپ وتۋگە ەلىمىزدىڭ بارلىق ءوڭىرى ءبىر كىسىدەي جۇمىلىپ، ەرەكشە اتسالىسىپ جاتقانىن اتاپ ءوتتى.

«قاجىمۇقان مۇڭايتپاس ۇلى – قازاق حالقىنىڭ تاريحىنداعى تۇڭعىش كاسىپقوي بالۋان. ول بۇكىل عۇمىرىن كۇرەس ونەرىنە ارناپ، ەلىمىزدى وزگە جۇرتقا پاش ەتكەن. تالاي بەلدەسۋدە قارسىلاسىنان ايلاسىن اسىرىپ، كوزى تىرىسىندە ەرلىگى اڭىزعا اينالىپ ۇلگەردى. وراسان كۇشتىڭ يەسى بولعان بالۋان بابامىز، كۇرەستىڭ بىرنەشە تۇرىنەن قازاقتان شىققان تۇڭعىش الەم چەمپيونى اتاندى.

جىل باسىندا قاجىمۇقان مۇڭايت­پاس ۇلىنىڭ ەسىمىن ۇلىقتاۋ، ماڭگىلىككە ەستە قالدىرۋ ماقساتىندا ارنايى جال­پى­رەسپۋبليكالىق ءىس-شارالار جوسپارى əزىرلەندى. كەشەندى جوسپارعا سəيكەس كوپتەگەن مادەني، سپورتتىق-بۇقارالىق، اقپاراتتىق-يميدجدىك ءىس-شارا وتكىزىلىپ كەلەدى. بۇل قاتاردا ارنايى پوشتا ماركالارى شىعارىلعانىن، «قاجىمۇقان» كوركەم ءفيلمىنىڭ تۇسىرىلگەنىن ايتۋعا بولادى. سونىمەن قاتار ەلىمىزدىڭ تۇك­پىر-تۇكپىرىندە مارافوندار، دوڭگەلەك ۇستەل­دەر، تاقىرىپتىق اشىق ساباقتار، بىرنەشە حالىقارالىق كونفەرەنتسيا مەن باسقا دا ءىس-شارالار وتكىزىلدى.

بۇگىن ەر ەسىمىن ۇلىقتاۋعا ارنالعان سونداي ءىس-شارانىڭ بىرىندە باس قوسىپ تۇرمىز. ەلوردا تورىندە كۇش اتاسى قاجىمۇقان بابا­مىزدىڭ ەسكەرتكىشىن سالتاناتتى تۇردە اشقالى جاتىرمىز. سونىمەن قاتار قالا­مىزداعى «جاس باتىر» سپورت كەشەنى بۇدان بىلاي «قاجىمۇقان» سپورت كەشەنى دەپ اتالادى. بۇل ءىس-شارالار بالۋانعا كورسەتىلگەن تاعزىمنىڭ شاعىن دا بولسا، ماڭىزدى كورىنىسى. الداعى ۋاقىتتا دا اڭىز ادامنىڭ رۋحىن اسقاقتاتىپ، ەرلىگىن كەلەر ۇرپاققا جەتكىزۋ ءبىزدىڭ ماقساتىمىز بولىپ قالا بەرەدى»، دەدى مينيستر.

ايتا كەتەيىك، ەسكەرتكىشتىڭ جالپى بيىكتىگى 5،7 مەتر (تۇعىرى – 2،2 مەتر، ءمۇسىن 3،5 مەتر). اۆتورلارى – جالىن باۋىرقان، بولاتبەك سالاەۆ.

سوڭعى جاڭالىقتار

ۇقساس جاڭالىقتار