16 قازان، 2021

جامبىل وبلىسىندا ەتنوسارالىق كەلىسىم كونفەرەنتسياسى اياقتالدى

161 رەت كورسەتىلدى

«قازىرگى كەزەڭدەگى ەتنوسارالىق كەلىسىم: تاجىريبە مەن بولاشاققا مىندەتتەر» حالىقارالىق عىلىمي-پراكتيكالىق كونفەرەنتسياسى اياقتالدى، دەپ حابارلايدى Egemen.kz.

ۋكراينا، يزرايل، بولگاريا، وزبەكستاننان كەلگەن ەتنوسارالىق قاتىناستار سالاسىنداعى 200-دەن استام ساراپشى، قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى، جوعارعى سوتتىڭ، باس پروكۋراتۋرانىڭ، ۇلتتىق ەكونوميكا، ىشكى ىستەر، ءبىلىم جانە عىلىم مينيسترلىكتەرىنىڭ، فيلوسوفيا، ساياساتتانۋ جانە ءدىنتانۋ ينستيتۋتتارىنىڭ وكىلدەرى قاتىستى.

كونفەرەنتسيا جۇمىسى مۋلتيكۋلتۋراليزم ورتاسىنىڭ قاقتىعىستاردىڭ الدىن الۋداعى عىلىمي-ساراپتامالىق الەۋەتىن پايدالانۋعا، سونداي-اق قوعامدىق كەلىسىمدى نىعايتۋداعى قازاقستان حالقى اسسامبلەياسى مەن بۇقارالىق اقپارات قۇرالدارىنىڭ رولىنە ارنالدى.

سەكتسيالىق جۇمىستار بارىسىندا حالىقارالىق ساراپشىلار ەتنوسارالىق قاتىناستار سالاسىنداعى تاجىريبەلەرىمەن ءبولىستى، اقپاراتتىق كەڭىستىكتە رەتتەۋ تاسىلدەرى مەن قاقتىعىستى جۇمىلدىرۋ تۋرالى، كوپ مادەنيەتتى قوعامداعى كرەاتيۆتى ءبىلىم تۋرالى اتاپ ءوتتى، سونداي-اق بىرەگەيلىك ساياساتىنا جانە ۇلتتىق جانە ءدىني بىرەگەيلىكتىڭ سينتەزىنە توقتالدى.

وتاندىق ساراپشىلار ەتنوساياسات ماسەلەلەرىندە زەرتتەۋ، تالداۋ جانە ساراپتامالىق سۇيەمەلدەۋدى جۇزەگە اسىراتىن ينستيتۋتسيونالدىق قۇرىلىمدار مەن ۇيىمداردى تانىستىردى. قاتىسۋشىلار قولدانبالى ەتنوساياسي زەرتتەۋلەر ينستيتۋتى جانە قحا كافەدرالارى قاۋىمداستىعىنىڭ قىزمەتىمەن ەگجەي-تەگجەيلى تانىستى.

سونىمەن قاتار، قحا دەپۋتاتتىق توبىنىڭ ءرولى جانە وڭىرلەردە قحا مۇشەلەرى ىسكە اسىرىپ جاتقان الەۋمەتتىك جوبالار، قازىرگى قوعامداعى ازاماتتىق بىرەگەيلىك پەن تولەرانتتىلىقتى نىعايتۋ تۋرالى ماسەلەلەر كوتەرىلدى.

ەتنوسارالىق قاتىناستار سالاسىنداعى ماسەلەلەردى ەكى كۇندىك تالقىلاۋ قورىتىندىسى بويىنشا كونفەرەنتسياعا قاتىسۋشىلار ەتنوساياساتتى ىسكە اسىرۋ بارىسىندا پروبلەمالىق ماسەلەلەردى قالىپتاستىرۋدىڭ، نىعايتۋدىڭ جانە ءتيىمدى شەشۋدىڭ ماڭىزدى اسپەكتىلەرىن كورسەتەتىن قارار قابىلدادى.

كونفەرەنتسيانىڭ قورىتىندى بولىمىندە جامبىل وبلىسىنىڭ اكىمى ب.ساپارباەۆ كونفەرەنتسيانى قورىتىندىلاپ، بارلىق قاتىسۋشىلارعا ەتنوسارالىق بەيبىتشىلىك پەن كەلىسىمدى نىعايتۋعا قوسقان ۇلەسى ءۇشىن العىسىن ءبىلدىردى.

 

سوڭعى جاڭالىقتار

ۇقساس جاڭالىقتار